T20 WC 2026: സൂപ്പർ എട്ടിൽ പാക് പടയ്ക്ക് എട്ടിന്റെ പണി, സെമിയിൽ കടക്കണമെങ്കിൽ ഇനി അത്ഭുതങ്ങൾ സംഭവിക്കണം

ടി20 ലോകകപ്പില്‍ പാകിസ്താന്റെ സെമി ഫൈനല്‍ പ്രതീക്ഷകള്‍ക്ക് കനത്ത തിരിച്ചടി. ബുധനാഴ്ച കൊളംബോയില്‍ നടന്ന സൂപ്പര്‍ 8 പോരാട്ടത്തില്‍ ശ്രീലങ്കയെ ന്യൂസിലന്‍ഡ് തകര്‍ത്തുവിട്ടതോടെ പാക് പടയുടെ ഭാവി തുലാസിലായിരിക്കുകയാണ്. മിച്ചല്‍ സാന്റ്‌നറുടെ ബാറ്റിംഗും റച്ചിന്‍ രവീന്ദ്രയുടെ തകര്‍പ്പന്‍ ബൗളിംഗും (4/27) കിവീസിന് വലിയ വിജയം സമ്മാനിച്ചപ്പോള്‍, അത് പാകിസ്താന്റെ സാധ്യതകളെ ഏതാണ്ട് ഇല്ലാതാക്കി എന്ന് തന്നെ പറയാം.

പോയിന്റ് പട്ടികയിലെ പോരാട്ടം

നിലവില്‍ രണ്ട് മത്സരങ്ങളില്‍ നിന്ന് 4 പോയിന്റുള്ള ഇംഗ്ലണ്ട് സെമി ഉറപ്പിച്ചു കഴിഞ്ഞു. ന്യൂസിലന്‍ഡ് രണ്ട് മത്സരങ്ങളില്‍ നിന്ന് 3 പോയിന്റുമായി (+3.050 NRR) രണ്ടാം സ്ഥാനത്താണ്. എന്നാല്‍ പാകിസ്താന്‍ രണ്ട് മത്സരങ്ങളില്‍ നിന്ന് വെറും ഒരു പോയിന്റുമായി (-0.461 NRR) മൂന്നാം സ്ഥാനത്താണ്. ശ്രീലങ്ക ടൂര്‍ണമെന്റില്‍ നിന്ന് പുറത്തായിക്കഴിഞ്ഞു. ഫെബ്രുവരി 28-ന് ശ്രീലങ്കയ്‌ക്കെതിരെയാണ് പാകിസ്താന്റെ അവസാന മത്സരം.

പാകിസ്താന്‍ സെമിയിലെത്താന്‍ ഇനി എന്ത് സംഭവിക്കണം?

സല്‍മാന്‍ അലി ആഘ നയിക്കുന്ന പാകിസ്താന്‍ ടീമിന് സെമിയിലെത്തണമെങ്കില്‍ ഇനി രണ്ട് 'അത്ഭുതങ്ങള്‍' നടക്കണം:

സാധ്യത 1: ഫെബ്രുവരി 27-ന് നടക്കുന്ന മത്സരത്തില്‍ ഇംഗ്ലണ്ട് ന്യൂസിലന്‍ഡിനെ വമ്പന്‍ മാര്‍ജിനില്‍ തോല്‍പ്പിക്കണം. തുടര്‍ന്ന് പാകിസ്താന്‍ ശ്രീലങ്കയെ ചരിത്രപരമായ ഒരു വലിയ സ്കോറിന് പരാജയപ്പെടുത്തണം. അങ്ങനെയെങ്കില്‍ രണ്ട് ടീമിനും 3 പോയിന്റ് വീതമാകും. കിവീസിന്റെ നിലവിലെ മികച്ച റണ്‍റേറ്റ് (+3.050) മറികടന്നാല്‍ മാത്രമേ പാകിസ്താന് സെമി ടിക്കറ്റ് ലഭിക്കൂ.

സാധ്യത 2: പാകിസ്താന്‍ ശ്രീലങ്കയോട് തോറ്റാല്‍ ടീം നേരിട്ട് പുറത്താകും. അതുപോലെ ന്യൂസിലന്‍ഡ് ഇംഗ്ലണ്ടിനെ തോല്‍പ്പിച്ചാലും പാകിസ്താന്റെ സെമി മോഹങ്ങള്‍ അവസാനിക്കും. ഇനി ഇംഗ്ലണ്ട്-ന്യൂസിലന്‍ഡ് മത്സരം മഴ മൂലം ഉപേക്ഷിക്കപ്പെട്ടാലും പാകിസ്താന്‍ പുറത്താകും.

ശ്രീലങ്കയ്‌ക്കെതിരെ 169 റണ്‍സ് പിന്തുടര്‍ന്ന ലങ്കയെ 107 റണ്‍സില്‍ ഒതുക്കിയാണ് കിവീസ് വിജയം ആഘോഷിച്ചത്. റച്ചിന്‍ രവീന്ദ്രയുടെ സ്പിന്‍ കെണിയില്‍ ലങ്കന്‍ മധ്യനിര തകരുകയായിരുന്നു. ഈ വമ്പന്‍ ജയം കിവീസിന്റെ റണ്‍റേറ്റ് കുത്തനെ ഉയര്‍ത്തി. പാകിസ്താന്‍ ആരാധകര്‍ക്കിനി പ്രാര്‍ത്ഥനകള്‍ മാത്രമേ തുണയ്ക്കാനുള്ളൂ. ഇംഗ്ലണ്ട് കിവീസിനെ 'അടിച്ചു തകര്‍ക്കുകയും' പാകിസ്താന്‍ ലങ്കയെ 'കശാപ്പ് ചെയ്യുകയും' ചെയ്താല്‍ മാത്രമേ സല്‍മാനും സംഘത്തിനും സെമിയിലേക്ക് വഴിയൊരുങ്ങൂ.

അതേസമയം, ഇം​ഗ്ലണ്ടിനോട് ഏറ്റ പരാജയമാണ് പാകിസ്താനെ കുരുക്കിയത്. ന്യൂസിലാൻഡിനെതിരായ ആദ്യ സൂപ്പർ 8 പോരാട്ടം മഴ തടസപ്പെടുത്തിയപ്പോൾ രണ്ടാം മത്സരം വിജയിച്ച് സെമി പ്രവേശന സാധ്യതകൾ ഊട്ടിയുറപ്പിക്കാനായിരുന്നു പാക് ശ്രമം. ഷഹീൻ അഫ്രീദിയുടെ നാല് വിക്കറ്റ് പ്രകടനം പാകിസ്താന് തുണയാകാതെ വന്നപ്പോൾ നായകൻ ഹാരി ബ്രൂക്കിന്റെ മനോഹര സെഞ്ച്വറിയുടെ പച്ചപ്പിൽ ഇം​ഗ്ലണ്ട് പാകിസ്താനെ മലർത്തി അടിക്കുകയായിരുന്നു. ഇനി സെമിയിലേക്ക് പ്രവേശിക്കണമെങ്കിൽ പാക് പടയ്ക്കായി ടി20 ലോകകപ്പിൽ പല അത്ഭുതങ്ങളും സംഭവിക്കണം.