T20 WC 2026: ഇതു ശരിയല്ല, ഇന്ത്യക്ക് പ്രത്യേക പരിഗണന!! നമീബിയന്‍ നായകന്‍ കലിപ്പില്‍, കാരണമറിയാം

ഇന്ത്യയ്‌ക്കെതിരായ ?ഗ്രൂപ്പ് മത്സരത്തിന് മുന്നോടിയായി ഷെഡ്യൂളിംഗിലെ വിവേചനത്തെക്കുറിച്ച് ശക്തമായ ആശങ്ക പ്രകടിപ്പിച്ച് നമീബിയന്‍ ക്യാപ്റ്റന്‍. നിലവിലെ ചാമ്പ്യന്മാരായ ഇന്ത്യയെ അവരുടെ നാട്ടില്‍ നേരിടാന്‍ ഒരുങ്ങുന്ന നമീബിയന്‍ ടീം ഐസിസി നല്‍കുന്ന പരിശീലന സൗകര്യങ്ങളിലെ നീതികേടിനെക്കുറിച്ച് പറയുകയാണ്. ആദ്യ മത്സരത്തില്‍ തോല്‍വി വഴങ്ങിയ നമീബിയയ്ക്ക് സൂപ്പര്‍ 8 പ്രതീക്ഷകള്‍ നിലനിര്‍ത്താന്‍ ഈ മത്സരം ജയിക്കേണ്ടത് അനിവാര്യമാണ്.

തന്റെ ടീമിന് രാത്രികാല പരിശീലന സെഷനുകള്‍ (Night training sessions) അനുവദിക്കാത്ത ഐസിസി നടപടിയെ നമീബിയന്‍ നായകന്‍ ഗെര്‍ഹാര്‍ഡ് ഇറാസ്മസ് പരസ്യമായി ചോദ്യം ചെയ്തു. മത്സരത്തിന് മുന്നോടിയായി മാധ്യമപ്രവര്‍ത്തകരോട് സംസാരിക്കവെ, ഇരു ടീമുകള്‍ക്കും അനുവദിച്ച പരിശീലന സമയത്തിലെ വലിയ വ്യത്യാസം അദ്ദേഹം വെളിപ്പെടുത്തി. അരുണ്‍ ജെയ്റ്റ്ലി സ്റ്റേഡിയത്തില്‍ ഇന്ത്യയ്ക്ക് ഫ്‌ലഡ്ലൈറ്റിന് കീഴില്‍ രണ്ട് പരിശീലന സെഷനുകള്‍ ലഭിച്ചപ്പോള്‍, നമീബിയയ്ക്ക് ഉച്ചയ്ക്ക് 2 മണി മുതല്‍ 5 മണി വരെയുള്ള സമയമാണ് നല്‍കിയത്. രാത്രി 7 മണിക്ക് തുടങ്ങുന്ന മത്സരത്തിലെ സാഹചര്യങ്ങളുമായി പൊരുത്തപ്പെടാന്‍ ഇത് നമീബിയയെക്കാള്‍ ഇന്ത്യയ്ക്ക് സഹായകമാകും.

'എന്തുകൊണ്ടാണ് ഞങ്ങള്‍ക്ക് രാത്രി പരിശീലന സെഷന്‍ നല്‍കാത്തതെന്ന് അറിയില്ല. ഇന്ത്യയ്ക്ക് രണ്ട് സെഷനുകള്‍ ലഭിച്ചു, ഇപ്പോള്‍ കാനഡയ്ക്കും രാത്രി പരിശീലനത്തിന് അവസരം നല്‍കുന്നുണ്ട്. നിങ്ങള്‍ക്ക് ഇതിനെ എങ്ങനെ വേണമെങ്കിലും വ്യാഖ്യാനിക്കാം, പക്ഷേ ഞങ്ങള്‍ നമീബിയന്‍ ശൈലിയില്‍ തന്നെ പോരാടും,' ഇറാസ്മസ് പറഞ്ഞു.

സ്വന്തം നാട്ടില്‍ അന്താരാഷ്ട്ര നിലവാരത്തിലുള്ള ഫ്‌ലഡ്ലൈറ്റ് സൗകര്യങ്ങള്‍ ഇല്ലാത്തതിനാല്‍ നമീബിയയെ സംബന്ധിച്ചിടത്തോളം ഇത് വലിയൊരു വെല്ലുവിളിയാണ്. ഐഎല്‍ടി20 (ILT20) പോലെയുള്ള ഫ്രാഞ്ചൈസി ലീഗുകളില്‍ കളിക്കുന്ന ചില താരങ്ങള്‍ക്കല്ലാതെ ഭൂരിഭാഗം താരങ്ങള്‍ക്കും ഫ്‌ലഡ്‌ലൈറ്റ് വെളിച്ചത്തിന് കീഴില്‍ കളിച്ചു പരിചയമില്ല. ഇത്തരം സാഹചര്യങ്ങള്‍ തങ്ങളെപ്പോലെയുള്ള അസോസിയേറ്റ് രാജ്യങ്ങളെ വലിയ ടീമുകള്‍ക്കെതിരെ കളിക്കുമ്പോള്‍ പിന്നിലാക്കുന്നുവെന്ന് ക്യാപ്റ്റന്‍ സൂചിപ്പിച്ചു.

ടി20 ലോകകപ്പ് 2026: ഇന്ത്യ vs നമീബിയ

ഫെബ്രുവരി 12-ന് നടക്കുന്ന ഗ്രൂപ്പ് എ മത്സരത്തില്‍, തുടര്‍ച്ചയായ രണ്ടാം വിജയം ലക്ഷ്യമിട്ടാണ് ഇന്ത്യ ഇറങ്ങുന്നത്. ആദ്യ മത്സരത്തില്‍ യുഎസ്എയെ പരാജയപ്പെടുത്തിയതിന്റെ ആത്മവിശ്വാസത്തിലാണ് സൂര്യകുമാര്‍ യാദവും സംഘവും. എന്നാല്‍ ഓപ്പണര്‍ അഭിഷേക് ശര്‍മ്മയ്ക്ക് അസുഖം ബാധിച്ചത് ഇന്ത്യയെ അല്പം വലയ്ക്കുന്നുണ്ട്. പാകിസ്ഥാനെതിരായ ഞായറാഴ്ചത്തെ നിര്‍ണ്ണായക മത്സരം മുന്നിലുള്ളതിനാല്‍ അഭിഷേകിനെ കളിപ്പിക്കാന്‍ സാധ്യത കുറവാണ്. ഇത് സഞ്ജു സാംസണ് ഓപ്പണറായി അവസരം ലഭിക്കാന്‍ വഴിയൊരുക്കും.

നെതര്‍ലന്‍ഡ്സിനോട് ഏഴ് വിക്കറ്റിന് തോറ്റാണ് നമീബിയ എത്തുന്നത്. ജെജെ സ്മിത്ത്, ഇറാസ്മസ് എന്നിവരുടെ പ്രകടനത്തിലാണ് നമീബിയന്‍ പ്രതീക്ഷകള്‍. ഡല്‍ഹിയിലെ ചെറിയ ബൗണ്ടറികളും മഞ്ഞുീഴ്ചയും (Dew factor) രണ്ടാമത് ബാറ്റ് ചെയ്യുന്ന ടീമിന് ഗുണകരമാകാറുണ്ട്. എന്നാല്‍ ഒരിക്കല്‍ പോലും രാത്രിയില്‍ പരിശീലിക്കാന്‍ അവസരം ലഭിക്കാത്ത നമീബിയയ്ക്ക് മഞ്ഞിനെ നേരിടുക പ്രയാസകരമാകും. കൂടാതെ, പനിയില്‍ നിന്ന് മുക്തനായി ജസ്പ്രീത് ബുംറ തിരിച്ചെത്തുന്നത് നമീബിയന്‍ ബാറ്റര്‍മാര്‍ക്ക് വലിയ ഭീഷണിയാണ്.