കളിക്ക് മുമ്പേ ഇന്ത്യയ്ക്ക് റെയ്‌നയെ നഷ്ടം.. ന്യൂസിലന്‍ഡിനെ വീഴ്ത്തിയാല്‍ മൂന്നാം റാങ്ക് വരെ എത്താം!

ഭാഗ്യത്തിന് കിട്ടിയ അവസരം

ആഭ്യന്തര ക്രിക്കറ്റില്‍ ശരാശരി പ്രകടനം മാത്രം കാഴ്ചവെച്ച സുരേഷ് റെയ്‌നയ്ക്ക് ഭാഗ്യം കൊണ്ടാണ് ന്യൂസിലന്‍ഡിനെതിരായ ഏകദിന ടീമില്‍ ഇടം കിട്ടിയത്. വൈറല്‍ ഫീവര്‍ ബാധിച്ച് റെയ്‌നയ്ക്ക് ഒക്ടോബര്‍ 16ന് ധരംശാലയില്‍ നടക്കുന്ന ആദ്യ ഏകദിനത്തില്‍ കളിക്കാന്‍ പറ്റില്ല.

ബൗളിംഗിലും നഷ്ടം

പ്രമുഖ ബൗളര്‍മാരെല്ലാം പരിക്ക് മൂലമോ വിശ്രമം അനുവദിച്ചത് കൊണ്ടോ ആയി ടീമിന് പുറത്താണ്. ഈ സാഹചര്യത്തില്‍ സുരേഷ് റെയ്നയുടെ പാര്‍ട്ട് ടൈം സ്പിന്‍ ബൗളിംഗ് ഉപകാരപ്രദമാകുമെന്നാണ് ടീം പ്രഖ്യാപിക്കുമ്പോള്‍ സെലക്ഷന്‍ കമ്മിറ്റി ചെയര്‍മാന്‍ എം എസ് കെ പ്രസാദ് പറഞ്ഞത്. റെയ്‌ന ഒന്നാം ഏകദിനത്തിന് ഇല്ലാത്തത് ഇന്ത്യയുടെ പാര്‍ട് ടൈം ബൗളിംഗ് ഓപ്ഷനില്‍ കുറവ് വരുത്തും.

ധോണിയുടെ ടീം

അഞ്ച് മത്സരങ്ങളുള്ള പരമ്പരയില്‍ ആദ്യത്തെ മൂന്ന് മത്സരങ്ങള്‍ക്കുള്ള ടീമിനെയാണ് പ്രഖ്യാപിച്ചത്. ക്യാപ്റ്റനായി എം എസ് ധോണി തിരിച്ചെത്തി. വിരാട് കോലിയാണ് വൈസ് ക്യാപ്റ്റന്‍. വെറ്ററന്‍ താരം യുവരാജ് സിംഗിനെ ടീമിലേക്ക് പരിഗണിച്ചിരുന്നില്ല.

പ്രമുഖരൊന്നും ഇല്ല

പ്രമുഖ താരങ്ങളായ ആര്‍ അശ്വിന്‍, രവീന്ദ്ര ജഡേജ, മുഹമ്മദ് ഷമി എന്നിവര്‍ക്ക് വിശ്രമം അനുവദിച്ചു. രോഹിത് ശര്‍മയുടെ ഓപ്പണിംഗ് പങ്കാളി ശിഖര്‍ ധവാനും പകരക്കാരന്‍ ഓപ്പണര്‍ രാഹുലിനും പരിക്കാണ്. ഭുവനേശ്വര്‍ കുമാറിനെയും പരിക്ക് കാരണം പരിഗണിച്ചില്ല.

യുവതാരങ്ങള്‍ക്ക് ചാകര

ഓസ്ട്രേലിയന്‍ പര്യടനത്തില്‍ എ ടീമിന് വേണ്ടി ഓപ്പണറായി ഇറങ്ങി മികച്ച പ്രകടനം പുറത്തെടുത്ത മന്‍ദീപ് സിംഗ് ടീമിലുണ്ട്. മനീഷ് പാണ്ഡെ, കേദാര്‍ ജാദവ്, ഹര്‍ദീക് പാണ്ഡ്യ, ജയന്ത് യാദവ് എന്നീ പുതുമുഖങ്ങളും ടീമിലുണ്ട്.

ബൗളിംഗ് കുറച്ച് വീക്ക്

ഉമേഷ് യാദവ്, ജസ്പ്രീത് ഭുമ്ര, ധവാല്‍ കുല്‍ക്കര്‍ണി എന്നിവരാണ് ടീമിലെ പ്രധാന ഫാസ്റ്റ് ബൗളര്‍മാര്‍. വെറ്ററന്‍ സ്പിന്നര്‍ അമിത് മിശ്രയും യുവതാരം അക്ഷര്‍ പട്ടേലും ചേര്‍ന്നാകും സ്പിന്‍ ഡിപ്പാര്‍ട്ട്‌മെന്റ് കൈകാര്യം ചെയ്യുക.