ഓപ്പണിങ് സ്ഥാനം വിട്ടുകൊടുത്തിട്ടും ഈ ഗതികേടോ? അവനെ മാറ്റി ഋതുരാജിനെ കളിപ്പിക്കൂ! തുറന്ന് പറഞ്ഞ് ​ഗവാസ്കർ

ഇന്ത്യൻ ക്രിക്കറ്റിൽ നിലവിൽ ഏറ്റവും കൂടുതൽ ചർച്ച ചെയ്യപ്പെടുന്ന ബാറ്റിങ് സ്ഥാനങ്ങളെക്കുറിച്ച് പ്രതികരണവുമായി മുൻ ഇന്ത്യൻ നായകനും ഇതിഹാസ താരവുമായ സുനിൽ ഗവാസ്കർ രംഗത്തെത്തിയിരിക്കുകയാണ്. യുവ ഓപ്പണർ ഋതുരാജ് ഗെയ്ക്‌വാദിനെ ഉടൻ തന്നെ ഇന്ത്യയുടെ ഏകദിന സ്ക്വാഡിൽ ഉൾപ്പെടുത്തണമെന്നാണ് ഗവാസ്കറിന്റെ ശക്തമായ നിലപാട്. നിലവിൽ ടീമിലുള്ള യശസ്വി ജയ്‌സ്വാൾ ഏകദിന ക്രിക്കറ്റിന് ഇനിയും പൂർണ്ണ സജ്ജനായിട്ടില്ലെന്നും ഇതോടൊപ്പം ശ്രേയസ് അയ്യർ ഫോം കണ്ടെത്താൻ വലിയ രീതിയിൽ ബുദ്ധിമുട്ടുകയാണെന്നും അദ്ദേഹം തുറന്നടിച്ചു.

ശ്രീലങ്കയിൽ നടക്കുന്ന മത്സരങ്ങളിൽ ഗെയ്ക്‌വാദ് നടത്തുന്ന സ്ഥിരതയാർന്ന പ്രകടനത്തെ ചൂണ്ടിക്കാണിച്ചായിരുന്നു ഗവാസ്കറിന്റെ ഈ നിരീക്ഷണം. ഋതുരാജ് ശ്രീലങ്കയിൽ കളിച്ച ഏകദേശം എല്ലാ മത്സരങ്ങളിലും റൺസ് കണ്ടെത്തുന്നുണ്ടെന്നും, മാത്രമല്ല അവസാനമായി ഒരു ഏകദിന മത്സരം കളിച്ചപ്പോഴും താരം സെഞ്ച്വറി നേടിയിരുന്നുവെന്നും അദ്ദേഹം ഓർമ്മിപ്പിച്ചു. അതുകൊണ്ടുതന്നെ ഋതുരാജ് ഏകദിന ടീമിൽ സ്ഥാനം അർഹിക്കുന്നുണ്ടെന്ന് വ്യക്തമാക്കിയ ഗവാസ്കർ, ജയ്‌സ്വാളിന് ഏകദിന ഫോർമാറ്റിൽ ഇനിയും പക്വത വരാനുണ്ടെന്നും കൂട്ടിച്ചേർത്തു.

ഏകദിനത്തിൽ താളം കണ്ടെത്താനാവാതെ ജയ്‌സ്വാൾ; ആരാധകരിലും ആശങ്ക!

ടി20യിലും ടെസ്റ്റിലും തകർപ്പൻ പ്രകടനം പുറത്തെടുക്കുന്ന യശസ്വി ജയ്‌സ്വാളിന് പക്ഷേ ഏകദിന ഫോർമാറ്റിൽ ഇതുവരെ ആ ഫോം ആവർത്തിക്കാൻ കഴിഞ്ഞിട്ടില്ല എന്നതാണ് യാഥാർത്ഥ്യം. തന്റെ കരിയറിലെ ആദ്യ മൂന്ന് ഏകദിന മത്സരങ്ങളിലും താരം പൂർണ്ണമായി പരാജയപ്പെട്ടിരുന്നു. പിന്നീട് ദക്ഷിണാഫ്രിക്കയ്‌ക്കെതിരെ കഠിനമായി പാടുപെട്ട് ഒരു സെഞ്ച്വറി നേടിയെങ്കിലും കളിയിൽ സ്ഥിരത നിലനിർത്താൻ ജയ്‌സ്വാളിന് സാധിച്ചില്ല.

നിലവിലെ അഫ്ഗാനിസ്ഥാൻ പരമ്പരയിൽ വിരാട് കോഹ്‌ലിക്ക് പരിക്കേറ്റതോടെയാണ് ഋതുരാജ് ഗെയ്ക്‌വാദിനെ മറികടന്ന് ജയ്‌സ്വാളിന് വീണ്ടും ഇന്ത്യൻ നിരയിലേക്ക് വിളിയെത്തിയത്. ഈ പരമ്പരയിൽ ജയ്‌സ്വാളിനായി പതിവ് ഓപ്പണറായ ശുഭ്മൻ ഗിൽ തന്റെ ഓപ്പണിങ് സ്ഥാനം വരെ ത്യാഗം ചെയ്യുകയും രോഹിത് ശർമ്മയ്‌ക്കൊപ്പം ജയ്‌സ്വാളിന് ഓപ്പൺ ചെയ്യാൻ സുവർണ്ണാവസരം നൽകുകയും ചെയ്തു. എന്നാൽ ഈ വലിയ അവസരത്തിലും താരം വീണ്ടും നിരാശപ്പെടുത്തുന്ന പ്രകടനമാണ് പുറത്തെടുത്തത്. ഇടങ്കയ്യൻ ഓപ്പണറായ യശസ്വി ജയ്‌സ്വാൾ എത്രയും വേഗം ഏകദിന ക്രിക്കറ്റിന്റെ ശൈലി മനസ്സിലാക്കി തന്റെ സ്വാഭാവിക താളം കണ്ടെത്തുമെന്ന പ്രതീക്ഷയിലാണ് ആരാധകർ.

അഫ്ഗാനിസ്ഥാനെതിരെയുള്ള രണ്ടാം ഏകദിന മത്സരത്തിൽ ഇന്ത്യ ഇഷാൻ കിഷന്റെയും നായകൻ ശുഭ്മൻ ഗില്ലിന്റെയും തകർപ്പൻ സെഞ്ച്വറികളുടെ മികവിൽ നിശ്ചിത ഓവറിൽ 402 റൺസ് എന്ന കൂറ്റൻ സ്കോർ പടുത്തുയർത്തി. ശുഭ്മൻ ​ഗിൽ 154 റൺസാണ് അടിച്ചുകൂട്ടിയത്. കരിയറിലെ 1000 ഏകദിന റൺസ് തികച്ച ഇഷാൻ കിഷൻ വെറും 79 പന്തുകളിൽ നിന്ന് 14 ഫോറുകളും 7 സിക്സറുകളുമടക്കം 125 റൺസ് അടിച്ചുകൂട്ടി റെക്കോർഡ് നേട്ടം സ്വന്തമാക്കിയെങ്കിലും, മത്സരത്തിന്റെ രണ്ടാം ഇന്നിങ്സിൽ അക്രോബാറ്റിക് ക്യാച്ചിന് ശ്രമിക്കുന്നതിനിടെ ഇടത് തോളെല്ലിന് കടുത്ത പരിക്കേറ്റ് മൈതാനം വിടേണ്ടി വന്നത് ഇന്ത്യൻ ക്യാമ്പിന് വലിയ ആശങ്കയായി മാറി.