408 ദിവസത്തെ 'വനവാസം', യുവി തിരിച്ചെത്തി, ആദ്യ റണ്‍സിനായി നേരിട്ട പന്തുകള്‍ കേട്ടാല്‍ ഞെട്ടും!!

408 ദിവസങ്ങള്‍ക്കു ശേഷം

408 ദിവസത്തെ ഇടേവളയ്ക്കു ശേഷം രഞ്ജി ട്രോഫിയില്‍ യുവി കളിച്ച മല്‍സരം കൂടിയായിരുന്നു ഇത്. തന്റെ ഫേവറിറ്റ് പൊസിഷനായ നാലാം നമ്പറിലാണ് താരം പഞ്ചാബിനായി ആദ്യ ഇന്നിങ്‌സില്‍ ബാറ്റിങിന് ഇറങ്ങിയത്. എന്നാല്‍ റണ്‍സ് കണ്ടെത്താന്‍ യുവി തുടക്കത്തില്‍ നന്നായി വിഷമിച്ചു. നേരിട്ട ആദ്യത്തെ 27 പന്തുകളിലും റണ്‍സൊന്നും നേടാന്‍ അദ്ദേഹത്തിനായില്ല. ഒടുവില്‍ 28ാം പന്തിലാണ് യുവി അക്കൗണ്ട് തുറന്നത്.
പതിയെ താളം വീണ്ടെടുത്ത യുവിക്ക് പക്ഷെ വലിയ ഇന്നിങ്‌സ് കളിക്കാനായില്ല. 88 പന്തില്‍ 24 റണ്‍സെടുത്ത് അദ്ദേഹം പുറത്തായി. നാലു ബൗണ്ടറികള്‍ മാത്രമേ താരത്തിന്റെ ഇന്നിങ്‌സിലുണ്ടായിരുന്നുള്ളൂ.

ഐപിഎല്ലില്‍ പുതിയ ടീം

കഴിഞ്ഞ ഐപിഎല്ലില്‍ കിങ്‌സ് ഇലവന്‍ പഞ്ചാബിനു വേണ്ടി മോശം പ്രകടനമാണ് യുവി കാഴ്ചവച്ചത്. രണ്ടു കോടി രൂപയ്ക്കു ടീമിലേക്കു തിരികെ കൊണ്ടുവന്ന അദ്ദേഹം പക്ഷെ മൂല്യത്തിനൊത്തുയര്‍ന്നില്ല. അടുത്തിടെ യുവിയെ പഞ്ചാബ് തങ്ങളുടെ ടീമില്‍ നിന്നൊഴിവാക്കുകയും ചെയ്തു. ഇതോടെ ഡിസംബറില്‍ നടക്കാനിരിക്കുന്ന ലേലത്തില്‍ പുതിയൊരു ടീം തനിക്കായി രംഗത്തു വരുമെന്ന പ്രതീക്ഷയിലാണ് അദ്ദേഹം.
എന്നാല്‍ നിലവിലെ ഫോമില്‍ യുവിയെ ഏതെങ്കിലും ഫ്രാഞ്ചൈസി വാങ്ങാന്‍ ധൈര്യം കാണിക്കാന്‍ സാധ്യത കുറവാണ്. അതുകൊണ്ടു തന്നെ രഞ്ജി ട്രോഫിയില്‍ യുവിക്ക് തന്റെ പഴയ ഫോമിലേക്കുയര്‍ന്നേ തീരൂ. ഇല്ലെങ്കില്‍ അദ്ദേഹത്തിന്റെ കരിയര്‍ തന്നെ അവസാനിക്കാന്‍ സാധ്യതയുണ്ട്.

ഒരു വര്‍ഷത്തിലേറെയായി ടീമിന് പുറത്ത്

കഴിഞ്ഞ ഒരു വര്‍ഷത്തിലേറെയായി യുവി ഇന്ത്യന്‍ ടീമിനു പുറത്താണ്. 2017ലാണ് അദ്ദേഹം ദേശീയ ടീമിനു വേണ്ടി അവസാനമായി ഏകദിനത്തിലും ട്വന്റി20യിലും കളിച്ചത്. അതേസമയം, ടെസ്റ്റ് ക്രിക്കറ്റില്‍ യുവിയെ അവസാനമായി കണ്ടത് ആറു വര്‍ഷങ്ങള്‍ക്കു മുമ്പാണ്. ദേശീയ ടീമില്‍ തിരിച്ചെത്തണമെന്ന് പല തവണ ആഗ്രഹം പ്രകടിപ്പിച്ച യുവിക്ക് ഇനി അതിനു കഴിയുമോയെന്ന കാര്യം സംശയമാണ്.
നിലവിലെ ടീമില്‍ കാര്യമായ മാറ്റങ്ങള്‍ കൊണ്ടുവരാന്‍ താല്‍പ്പര്യമില്ലെന്ന് കോച്ച് രവി ശാസ്ത്രി പറഞ്ഞതും യുവിയുടെ പ്രതീക്ഷകള്‍ക്കു മങ്ങലേല്‍പ്പിക്കുന്നു. ഇപ്പോള്‍ നടക്കുന്ന രഞ്ജിയില്‍ തിളങ്ങിയാല്‍ ഒരുപക്ഷെ യുവിക്ക് ഒരവസരം കൂടി ടീം ഇന്ത്യ നല്‍കിയേക്കും.