ടെസ്റ്റ് ക്രിക്കറ്റില്‍ ചരിത്രമെഴുതി ശ്രീലങ്ക; ദക്ഷിണാഫ്രിക്കയെ രണ്ടാം ടെസ്റ്റിലും തരിപ്പണമാക്കി

ഇരു ടീമുകളുടെയും സ്‌കോര്‍

നേരത്തെ ദക്ഷിണാഫ്രിക്ക ആദ്യ ഇന്നിങ്‌സില്‍ 222 റണ്‍സ് ആണ് നേടിയത്. തുടര്‍ന്ന് ശ്രീലങ്കയെ 154 റണ്‍സിന് പുറത്താക്കുകയും ചെയ്തു. എന്നാല്‍, 128 റണ്‍സ് മാത്രമാണ് ദക്ഷിണാഫ്രിക്കയ്ക്ക് രണ്ടാം ഇന്നിങ്‌സില്‍ നേടാനായത്. നാല് വിക്കറ്റ് വീഴ്ത്തിയ സുരംഗ ലക്മല്‍ ആണ് രണ്ടാം ഇന്നിങ്‌സില്‍ ദക്ഷിണാഫ്രിക്കയെ തകര്‍ത്തത്. ക്യാപ്റ്റന്‍ ഫാഫ് ഡു പ്ലസിസ് നേടിയ 50 റണ്‍സ് ആണ് അവരുടെ ടോപ് സ്‌കോര്‍.

മൂന്നാം ദിനത്തിലെ കൂട്ടുകെട്ട്

ജയിക്കാനായി കളിച്ച ശ്രീലങ്ക രണ്ടാം ഇന്നിങ്‌സിലെ മൂന്നാം വിക്കറ്റില്‍ 163 റണ്‍സ് കൂട്ടുകെട്ടാണ് പടുത്തുയര്‍ത്തിയത്. ദക്ഷിണാഫ്രിക്ക ബൗളര്‍മാരെ മാറിമാറി പരീക്ഷിച്ചെങ്കിലും കൂട്ടുകെട്ട് തകര്‍ക്കാനായില്ല. ഇതോടെ സ്വന്തം നാട്ടില്‍ കഴിഞ്ഞ ഏഴ് ടെസ്റ്റ് പരമ്പരയും തോല്‍ക്കാത്ത ദക്ഷിണാഫ്രിക്കയ്ക്ക് അടിതെറ്റുകയും ചെയ്തു.

ഓസ്‌ട്രേലിയയ്ക്കും ഇംഗ്ലണ്ടിനുമൊപ്പം

1991ന് ശേഷം ദക്ഷിണാഫ്രിക്കയില്‍ ഓസ്‌ട്രേലിയയും ഇംഗ്ലണ്ടും മാത്രമാണ് ടെസ്റ്റ് പരമ്പര ജയിച്ചിട്ടുള്ളത്. 5 തവണ ഓസ്‌ട്രേലിയ ടെസ്റ്റ് സീരീസ് ജയിച്ചപ്പോള്‍ 2 തവണ ഇംഗ്ലണ്ടും സ്വന്തമാക്കി. ഇവര്‍ക്കൊപ്പം ശ്രീലങ്കയും പട്ടികയില്‍ ഇടംപിടിച്ചു. കഴിഞ്ഞ ഒക്ടോബറിന് ശേഷം ഒരു ഫോര്‍മാറ്റിലും ഒരു മത്സരംപോലും ജയിക്കാത്ത ശ്രീലങ്കയാണ് ഇത്തരമൊരു നേട്ടത്തിലെത്തിനില്‍ക്കുന്നത്.

തോല്‍വിയുടെ കാരണവുമായി ക്യാപ്റ്റന്‍

തോല്‍വിക്ക് ന്യായീകരണമില്ലെന്ന് ദക്ഷിണാഫ്രിക്കന്‍ ക്യാപ്റ്റന്‍ ഫാഫ് ഡു പ്ലസിസ് പറഞ്ഞു. പരമ്പരയിലുടനീളം തങ്ങളുടെ ബാറ്റിങ് ശരാശരിയിലും താഴ്ന്നതായിരുന്നു. രണ്ടു ടീമുകളും ബാറ്റിങ്ങില്‍ മികവു കാട്ടിയില്ല. ശരിയായ സമയത്ത് അവര്‍ വിജയം സ്വന്തമാക്കി. സ്വന്തം നാട്ടില്‍ ശക്തരായിരുന്നു തങ്ങള്‍. എന്നാല്‍, കഴിഞ്ഞ രണ്ട് മത്സരങ്ങളില്‍ ഒരു ടീമായി കളിക്കാനായില്ലെന്നും അദ്ദേഹം പറഞ്ഞു.