വൈഭവിനെ കാണാൻ മണിക്കൂറുകളോളം യാത്ര ചെയ്തെത്തി ലങ്കൻ ഇതിഹാസം, കാൽ തൊട്ട് വന്ദിച്ച് കൗമാര താരം!

ഇന്ത്യ എ - ശ്രീലങ്ക എ ടീമുകൾ തമ്മിൽ നടന്ന ആവേശകരമായ സൂപ്പർ ഓവർ പോരാട്ടത്തിന് ശേഷം ക്രിക്കറ്റ് ലോകത്തിന്റെ ഹൃദയം കവർന്ന് ഒരു അപൂർവ്വ നിമിഷം. മത്സരത്തിൽ ഇന്ത്യ എ ടീം നാടകീയമായി പരാജയപ്പെട്ടതിന് പിന്നാലെ, ഇന്ത്യൻ ക്രിക്കറ്റിലെ കൗമാര വിസ്മയം വൈഭവ് സൂര്യവംശിയെ നേരിട്ട് കണ്ട് ആശ്വസിപ്പിക്കാനും ഉപദേശിക്കാനുമായി മണിക്കൂറുകളോളമാണ് ശ്രീലങ്കയുടെ ആദ്യ ഏകദിന ക്യാപ്റ്റനായിരുന്ന അനുര തെന്നക്കൂൻ കാത്തുനിന്നത്. ദാംബുള്ളയിലെ രംഗിരി അന്താരാഷ്ട്ര സ്റ്റേഡീയത്തിലായിരുന്നു നാടകീയ രംഗങ്ങൾ അരങ്ങേറിയത്.

മത്സരത്തിൽ ബാറ്റിംഗിൽ തിളങ്ങാൻ കഴിയാതെ പോയതിന്റെയും, സൂപ്പർ ഓവറിലെ നാടകീയമായ തോൽവിയുടെയും നിരാശയിൽ ഡ്രെസ്സിംഗ് റൂമിൽ നിന്നും പുറത്തേക്ക് വന്ന 15-കാരൻ സൂര്യവംശി തനിക്കായി കാത്തുനിന്ന എഴുപതുകാരനായ ലങ്കൻ ഇതിഹാസത്തെ കണ്ട് വികാരാധീനനായി. ഓടിയെത്തി തെന്നക്കൂന്റെ പാദങ്ങൾ തൊട്ട് വന്ദിച്ച യുവതാരത്തെ അദ്ദേഹം ചേർത്തുപിടിച്ചു.

അടുത്ത കാലത്തായി വലിയ മാധ്യമശ്രദ്ധയും വിമർശനങ്ങളും ഒരുപോലെ നേരിടുന്ന സൂര്യവംശിയോട് തെന്നക്കൂൻ പറഞ്ഞ വാക്കുകൾ ഇതായിരുന്നു:

"നീ നിന്റെ കളിയിൽ മാത്രം ശ്രദ്ധ കേന്ദ്രീകരിക്കുക, പുറത്തുനിന്നുള്ള ബഹളങ്ങൾക്കൊന്നും ചെവികൊടുക്കരുത്. ഇന്ന് നിനക്ക് പ്രതീക്ഷിച്ച പോലെ കളിക്കാൻ കഴിഞ്ഞില്ല എന്നത് ശരിയാണ്. പക്ഷേ അത് ക്രിക്കറ്റിന്റെ ഭാഗമാണ്, എല്ലാ ദിവസവും നമുക്ക് മികച്ചതാക്കാൻ കഴിയില്ല."

"അവൻ ഒരു അത്ഭുത പ്രതിഭയാണ്"

കഴിഞ്ഞ ഐപിഎൽ സീസണിൽ വൈഭവ് സൂര്യവംശി നടത്തിയ തകർപ്പൻ ബാറ്റിംഗ് പ്രകടനമാണ് തന്നെ ഏറെ ആകർഷിച്ചതെന്ന് അനുര തെന്നക്കൂൻ പിന്നീട് മാധ്യമങ്ങളോട് പറഞ്ഞു. ഈ പ്രായത്തിൽ വിദേശ മണ്ണിൽ വന്ന് ഭയമില്ലാതെ സിക്സറുകളും ഫോറുകളും അടിച്ചുപറത്തുന്ന സൂര്യവംശിയുടെ കളി അവിശ്വസനീയമാണെന്നും അദ്ദേഹം കൂട്ടിച്ചേർത്തു.

മത്സരശേഷം ഇന്ത്യൻ ക്യാപ്റ്റൻ തിലക് വർമ്മയുമായി സംസാരിച്ച തെന്നക്കൂൻ, സൂര്യവംശിയെ കാണാനായി മാത്രം കൊളംബോയിൽ നിന്നും ദാംബുള്ള വരെ യാത്ര ചെയ്താണ് എത്തിയത്. പരാജയത്തിന്റെ കനത്ത നിരാശയിലും വിവാദങ്ങളിലും ഉലഞ്ഞുനിന്ന ഒരു കൗമാരതാരത്തിന് ലങ്കൻ ഇതിഹാസത്തിന്റെ ഈ വാക്കുകൾ നൽകിയ ആത്മവിശ്വാസം ചെറുതല്ല. വരും മത്സരങ്ങളിൽ ശക്തമായി തിരിച്ചുവരാൻ വൈഭവിന് ഈ ഉപദേശം കരുത്താകുമെന്നാണ് ക്രിക്കറ്റ് പ്രേമികളുടെ പ്രതീക്ഷ.

മത്സരത്തിൽ സംഭവിച്ചത്!

ദാംബുള്ളയിൽ നടന്ന 2026-ലെ ട്രൈ-നേഷൻ എ സീരീസിലെ നാലാം മത്സരത്തിൽ ഇന്ത്യ എ ടീമിനെ സൂപ്പർ ഓവറിൽ 7 റൺസിന് പരാജയപ്പെടുത്തി ശ്രീലങ്ക എ ടീം ആവേശകരമായ വിജയം സ്വന്തമാക്കി. നിശ്ചിത 50 ഓവറിൽ ഇരുടീമുകളും ഒപ്പത്തിനൊപ്പം എത്തിയതോടെയാണ് മത്സരം നാടകീയമായ ടൈയിൽ കലാശിച്ചതും സൂപ്പർ ഓവറിലേക്ക് നീണ്ടതും.

ആദ്യം ബാറ്റ് ചെയ്ത ശ്രീലങ്ക സദീര സമരവിക്രമയുടെ 93 റൺസിന്റെ മികവിൽ മികച്ച സ്കോറിലേക്ക് നീങ്ങിയെങ്കിലും, ഡെത്ത് ഓവറുകളിൽ ഇന്ത്യൻ ബൗളർമാർ നടത്തിയ തകർപ്പൻ തിരിച്ചുവരവാണ് മത്സരത്തെ സമനിലയിൽ എത്തിച്ചത്. തുടർന്ന് നടന്ന സൂപ്പർ ഓവറിൽ ശ്രീലങ്ക എ ടീം 18 റൺസ് അടിച്ചുകൂട്ടിയപ്പോൾ, മറുപടി ബാറ്റിംഗിന് ഇറങ്ങിയ ഇന്ത്യ എ ടീമിന് 11 റൺസ് മാത്രമേ നേടാനായുള്ളൂ. മത്സരത്തിന്റെ കടുത്ത സമ്മർദ്ദവും നാടകീയമായ അന്ത്യവും മൈതാനത്ത് കളിക്കാർ തമ്മിലുള്ള വാക്കേറ്റങ്ങൾക്ക് കാരണമാവുകയും, മത്സരശേഷം കൗമാര താരം വൈഭവ് സൂര്യവംശി ഉൾപ്പെട്ട തർക്കങ്ങളിലേക്ക് വഴിമാറുകയും ചെയ്തു.