വിലക്ക് നീക്കിയെങ്കിലും ശ്രീശാന്തിന്റെ മടങ്ങിവരവ് നടക്കാനിടയില്ല; പന്ത് ബിസിസിഐയുടെ കോര്‍ട്ടില്‍

ബിസിസിഐ തീരുമാനിക്കും

വിചാരണക്കോടതി കുറ്റവിമുക്തനാക്കിയിട്ടും ബിസിസിഐ വിലക്ക് തുടരുന്നത് ശരിയല്ലെന്നുകാട്ടിയാണ് ശ്രീശാന്ത് സൂപ്രീംകോടതിയെ സമീപിച്ചത്. കോടതി ബിസിസിഐ നടപടി അംഗീകരിക്കുമ്പോള്‍തന്നെ ആജീവനാന്ത വിലക്ക് പിന്‍വലിക്കാനാണ് നിര്‍ദ്ദേശിച്ചത്. ശ്രീശാന്തിനുള്ള ശിക്ഷാ നടപടി ബിസിസിഐയ്ക്ക് തീരുമാനിക്കാമെന്നുള്ള സുപ്രീംകോടതി നിരീക്ഷണം ശ്രദ്ധേയമാണ്.

മടങ്ങിവരവ് ശ്രമകരമാകും

ശ്രീശാന്ത് എപ്പോള്‍ കളിക്കളത്തില്‍ ഇറങ്ങണമെന്ന് ബിസിസിഐയ്ക്ക് തീരുമാനിക്കാം. ബിസിസിഐ ശ്രീശാന്തിനോടുള്ള നിലപാട് തുടരുകയാണെങ്കില്‍ താരം വീണ്ടും കളിക്കാന്‍ ഇനിയും കാത്തിരിക്കേണ്ടിവരും. മുപ്പത്തിയാറുവയസ് പ്രായമായ താരത്തിന് ഇനി ഏതെങ്കിലും ടീമിനായി കളിക്കുക ശ്രമകരമായിരിക്കും. നീണ്ടനാള്‍ കളിക്കളത്തില്‍നിന്നും വിട്ടുനിന്നതിനാല്‍ ശ്രീശാന്തിന് ഫിറ്റ്‌നസും ഫോമും വീണ്ടെടുക്കുകയും വെല്ലുവിളിയാകും.

രഞ്ജി ടീമിലൂടെ ഐപിഎല്ലിലെത്തുമോ

അതേസമയം, വിദേശ ലീഗുകളില്‍ കളിക്കാന്‍ ശ്രീശാന്തിന് ബിസിസിഐ സമ്മതം കൊടുക്കുമോ എന്നതും കാത്തിരുന്ന് കാണേണ്ടതാണ്. കേരള രഞ്ജി ടീമിലൂടെ കുറഞ്ഞപക്ഷം ഐപിഎല്ലിലെങ്കിലും കളിക്കാമെന്ന പ്രതീക്ഷ ശ്രീശാന്തിനുണ്ട്. എന്നാല്‍, യുവതാരങ്ങളെ മാറ്റിനിര്‍ത്തി ശ്രീശാന്തിന് കേരള ടീമില്‍ ഇനി അവസരം നല്‍കാന്‍ ഇടയില്ല. എന്തായാലും ബൗളറായി കളത്തിലിറങ്ങാന്‍ കഴിഞ്ഞില്ലെങ്കിലും ക്രിക്കറ്റുമായി ബന്ധപ്പെട്ട മറ്റുകാര്യങ്ങളില്‍ വൈകാതെ തന്നെ സജീവമാകാമെന്നത് ശ്രീശാന്തിനെ സംബന്ധിച്ച് ആശ്വാസകരമാണ്.