ലോകകപ്പ് ഫൈനലില്‍ ശ്രീശാന്തിന് സാധ്യത?

മുംബൈ: ശ്രീലങ്കയ്‌ക്കെതിരെ ശനിയാഴ്ച നടക്കുന്ന ലോകകപ്പ് ക്രിക്കറ്റ് ഫൈനലില്‍ ഇന്ത്യന്‍ ബൗളര്‍ ആശിഷ് നെഹ്‌റ കളിക്കില്ലെന്ന് ഏതാണ്ട് ഉറപ്പായതോടെ നെഹ്‌റയ്ക്ക് പകരമാരെന്ന ചോദ്യമുയരുന്നു.

നേരത്തെ നെഹ്‌റയെ മാറ്റിനിര്‍ത്തി സ്പിന്നറായ അശ്വിനെ ഇന്ത്യ പരീക്ഷിച്ചിരുന്നു. സെലക്ടര്‍മാര്‍ തന്നില്‍ അര്‍പ്പിച്ച വിശ്വാസം കാത്തുരക്ഷിയ്ക്കുന്നതിന് മികച്ച പ്രകടനത്തിലൂടെ അശ്വിന് സാധിയ്ക്കുകയും ചെയ്തു.അശ്വിനെ മാറ്റിനിര്‍ത്തിയാല്‍ മുനാഫ് എന്ന സാധ്യത മാത്രമാണ് ഇന്ത്യയ്ക്ക് മുന്നിലുള്ളത്. അതേ സമയം ലങ്കന്‍ ടീമിനെതിരെ ഒരു പേസറെ തന്നെ നെഹ്‌റയ്ക്ക് പകരം അന്വേഷിയ്ക്കുകയാണെങ്കില്‍ ശ്രീശാന്ത് എന്നാണ് ഉത്തരം. ബംഗ്ലാദേശിനെതിരെയുള്ള ആദ്യ മത്സരത്തിലെ നിരാശജനകമായ പ്രകടനത്തിന് ശേഷം ശ്രീശാന്തിനെ കളിപ്പിയ്ക്കാന്‍ ഇന്ത്യ തയാറായിട്ടില്ല. നെഹ്‌റയ്ക്ക് പകരം പേസറെ മതിയെന്ന് തീരുമാനിച്ചാല്‍ ശ്രീശാന്തിന് നറുക്കുവീഴും. പരിക്കേറ്റ പ്രവീണ്‍ കുമാറിന് പകരം തീര്‍ത്തും അപ്രതീക്ഷിതമായാണ് ശ്രീശാന്ത് ലോകകപ്പ് ടീമില്‍ ഇടംപിടിച്ചത്. എന്നാല്‍ ക്യാപ്റ്റന്‍ ധോണിയ്ക്ക് ശ്രീശാന്തിനെ ഉള്‍പ്പെടുത്തുന്നതില്‍ എതിര്‍പ്പുണ്ടെന്ന് റിപ്പോര്‍ട്ടുകളുണ്ടായിരുന്നു.

പാകിസ്താനെതിരെ ബുധനാഴ്ച മൊഹാലിയില്‍ നടന്ന സെമിഫൈനല്‍ മത്സരത്തില്‍ ഫീല്‍ഡ് ചെയ്യുന്നതിനിടെയാണ് നെഹ്‌റയുടെ കൈവിരലിന് പരിക്കേറ്റത്. വിരലിന് പൊട്ടലുള്ളതായി എക്‌സ് റെയില്‍ വ്യക്തമായിട്ടുണ്ട്. പാകിസ്ഥാനെതിരെ നടന്ന മത്സരത്തില്‍ മിഡ് വിക്കറ്റില്‍ നിന്ന് അഫ്രീദിയുടെ ക്യാച്ച് എടുക്കാന്‍ ശ്രമിക്കുന്നതിനിടയിലാണ് നെഹ്‌റയുടെ വലം കൈയിലെ വിരലിന് പരിക്കേറ്റത്. വിരലില്‍ ഒന്നിലധികം ഒടിവുകള്‍ ഉള്ളതിനാല്‍ ശസ്ത്രക്രിയ ആവശ്യമായി വരും എന്നാണ് നിഗമനം. നെഹ്‌റയുടെ ഐപിഎല്‍ മത്സരങ്ങള്‍ക്കും ഇത് ഭീഷണിയാണ്.