സച്ചിനെ നൂറാം സെഞ്ചുറി എടുപ്പിക്കില്ല: അഫ്രീദി

കറാച്ചി: ഇന്ത്യയുടെ ബാറ്റിങ് ഇതിഹാസം സച്ചിന്‍ തെന്‍ഡുല്‍ക്കര്‍ക്ക് പാകിസ്താന്‍ ക്രിക്കറ്റ് ടീം ക്യാപ്റ്റന്‍ ഷാഹിദ് അഫ്രീദിയുടെ വെല്ലുവിളി. രാജ്യാന്തര തലത്തിലെ 100ാം സെഞ്ചുറി എന്ന നേട്ടത്തിലെത്താന്‍ സച്ചിനെ ഈ ലോകകപ്പില്‍ അനുവദിക്കില്ലെന്നാണ് അഫ്രീദി പറയുന്നത്. അതിനായി സച്ചിന്‍ ഇനിയും കാത്തിരിക്കേണ്ടിവരുമെന്നും താരം പറഞ്ഞു.

സെമിഫൈനലില്‍ ഇന്ത്യ പാകിസ്താന്‍ മത്സരത്തില്‍ സച്ചിനെ എന്നല്ല ഒരു ഇന്ത്യന്‍ കളിക്കാരനെയും മികച്ച പ്രകടനം പുറത്തെടുക്കാന്‍ അനുവദിക്കില്ലെന്നും ഒരു പാക് ദിനപ്പത്രത്തിനു നല്‍കിയ അഭിമുഖത്തില്‍ അഫ്രീദി പറഞ്ഞു.ഇന്ത്യക്കെതിരെയുള്ള മത്സരത്തിനായി കാത്തിരിക്കുകയാണ്. നിലവിലെ ഫോമില്‍ ഞങ്ങള്‍ക്ക് ഇന്ത്യയെ തോല്‍പ്പിക്കാനാവും. അക്കാര്യത്തില്‍ എനിക്കു തികഞ്ഞ ആത്മവിശ്വാസം ഉണ്ട്. സ്വന്തം രാജ്യത്ത് ആരാധകരുടെ മുന്‍പില്‍ കളിക്കുമ്പോള്‍ ഇന്ത്യന്‍ ടീമിനു കൂടുതല്‍ സമ്മര്‍ദം ഉണ്ടാകും.

ലോകകപ്പില്‍ ഇതുവരെ ഇന്ത്യയെ പാകിസ്താന്‍ തോല്‍പ്പിച്ചിട്ടില്ലെന്നതു ചരിത്രം മാത്രമാണ്. പാക്ക് ടീമിനു ചരിത്രം മാറ്റിയെഴുതുന്ന ശീലമുണ്ട്- അഫ്രീദി പറഞ്ഞു. മാര്‍ച്ച് 30ന് ബുധനാഴ്ച മൊഹാലിയിലാണ് ഇന്ത്യ പാക്കിസ്തന്‍ സെമി ഫൈനല്‍. ടെസ്റ്റിലും ഏകദിനത്തിലുമായി ഇതിനകം സച്ചിന്‍ 99 സെഞ്ചുറികള്‍ എടുത്തിട്ടുണ്ട്.