ടീം ഇന്ത്യയ്ക്ക് ലഭിച്ചത് ഡ്യൂപ്ലിക്കേറ്റ് കപ്പ്

മുംബൈ: ക്രിക്കറ്റ് മാമാങ്കത്തില്‍ വിജയം നേടിയ ടീം ഇന്ത്യയ്ക്ക് സ്‌റ്റേഡിയത്തില്‍ കൈമാറിയത് യഥാര്‍ത്ഥ ലോകകപ്പ് അല്ലെന്ന് റിപ്പോര്‍ട്ട്. ടീമംഗങ്ങള്‍ മുത്തമിട്ടതും ഉയര്‍ത്തിപ്പിടിച്ച് നടന്നതുമൊന്നും യഥാര്‍ത്ഥ ട്രോഫി ആയിരുന്നില്ലെന്നാണ് റിപ്പോര്‍ട്ട്.

പിന്നീട് ഞായറാഴ്ച ഇന്ത്യാ ഗേറ്റിന് മുമ്പില്‍ താരങ്ങള്‍ ഓരോരുത്തരായി ഫോട്ടോയ്ക്ക് പോസ് ചെയ്തപ്പോള്‍ ഉണ്ടായിരുന്ന ട്രോഫിയും ഡ്യൂപ്ലിക്കേറ്റ് തന്നെയായിരുന്നുവെന്നാണ് റിപ്പോര്‍ട്ടില്‍ പറയുന്നത്. ബിസിസിഐ വൃത്തങ്ങള്‍ ഇക്കാര്യം സൂചിപ്പിക്കുകയും ചെയ്തിട്ടുണ്ട്. യഥാര്‍ത്ഥ ട്രോഫി ഇപ്പോഴും കസ്റ്റംസ് ഉദ്യോഗസ്ഥരുടെ കസ്റ്റഡിയിലാണത്രേ. കപ്പിന്റെ വിലയുടെ 35ശതമാനം തീരുവ നല്‍കാത്തതിനെത്തുടര്‍ന്നാണ് കസ്റ്റംസ് ഉദ്യോഗസ്ഥര്‍ കപ്പ് പിടിച്ചുവച്ചരിക്കുന്നത്. 35ശതമാനം കസ്റ്റംസ് തീരുവ നല്‍കിയാല്‍ മാത്രമേ കപ്പ് അധികൃതര്‍ക്ക് കൈമാറുകയുള്ളുവെന്ന് കസ്റ്റംസ് ഉദ്യോഗസ്ഥര്‍ പറയുന്നു. 28വര്‍ഷങ്ങള്‍ക്കുശേഷമാണ് ഇന്ത്യ ലോകകപ്പ് നേടുന്നത്.

ഈ അവസരത്തില്‍ ഒറിജിനല്‍ ട്രോഫിയല്ല ടീം ഇന്ത്യയ്ക്ക് കൈമാറിയതെന്ന റിപ്പോര്‍ട്ട് ആരാധകര്‍ക്കിടയില്‍ നിരാശയുണ്ടാക്കിയിട്ടുണ്ട്. കസ്റ്റംസ് തീരുവ നല്‍കി അധികൃതര്‍ ട്രോഫി എന്ന് കസ്റ്റംസ് ഉദ്യോഗസ്ഥരില്‍ നിന്നും തിരിച്ചെടുക്കുമെന്നകാര്യത്തില്‍ വ്യക്തതയില്ല.