അവാര്‍ഡ് സച്ചിന്‍ റായുഡുവിനൊപ്പം പങ്കിട്ടു

ബാംഗ്ലൂര്‍: സച്ചിന്‍ ടെണ്ടുല്‍ക്കറെന്ന കളിക്കാരനെ വ്യത്യസ്തനാക്കുന്നത് കൡയിലെന്നപോലെ വ്യക്തിയെന്ന നിലയിലുള്ള ഗുണങ്ങള്‍ കൂടിയാണ്. പലപ്പോഴും പലകാര്യങ്ങളിലും സഹതാരങ്ങള്‍ക്ക് മാതൃകയാവാറുണ്ട് അദ്ദേഹം.

ഇപ്പോഴിതാ സ്‌പോര്‍ട്‌സ് മാന്‍ സ്പിരിറ്റിന്റെ കാര്യത്തില്‍ സച്ചിന്‍ വീണ്ടും താരമായിരിക്കുന്നു. ബാംഗ്ലൂരില്‍ നടന്ന ഐപിഎല്‍ മത്സരത്തിനിടെയാണ് റോയല്‍ ചലഞ്ചേഴ്‌സ് ബാംഗ്ലൂരിനെ തറപറ്റിച്ച മുംബൈ ഇന്ത്യന്‍സ് ക്യാപ്റ്റന്‍ സച്ചിന്‍ വീണ്ടും കളിക്കളത്തിലെ താരമായത്. പക്ഷേ ഇത് കളിയുടെ കാര്യത്തില്‍ അല്ലെന്ന് മാത്രം. ചിന്നസ്വാമി സ്‌റ്റേഡിയത്തില്‍ ഐ പി എല്‍ മത്സരത്തിന്റെ സമ്മാനവേളയിലാണ് സംഭവം നടന്നത്. മത്സരം കഴിഞ്ഞപ്പോള്‍ റോബിന്‍ ജാക്മാന്‍ സച്ചിന്‍ ടെണ്ടുല്‍ക്കറെ മാന്‍ ഓഫ് ദ മാച്ച് ആയി പ്രഖ്യാപിച്ചു. പക്ഷേ ആ അവാര്‍ഡ് ഒറ്റയ്ക്ക് സ്വീകരിക്കാന്‍ സച്ചിന്‍ തയ്യാറായില്ല. പകരം മുംബൈ ഇന്ത്യന്‍സിനെ വിജയത്തിലെത്തിക്കാന്‍ തനിയ്‌ക്കൊപ്പം ചേര്‍ന്ന് മികച്ച സ്‌കോര്‍ പടുത്തുയര്‍ത്തിയ അംബാട്ടി റായിഡുവിനെയും സച്ചിന്‍ ഒപ്പം കൂട്ടി.

സമ്മാനം റായിഡുവിന് നല്‍കിയില്ലെങ്കില്‍ അത് മോശമാണെന്ന് പറഞ്ഞ് സച്ചിന്‍ അവാര്‍ഡ് തുകയായ ഒരു ലക്ഷം രൂപയുടെ ചെക്കും റായിഡുവിന് നല്‍കി. തന്റെ ഇന്നിംഗ്‌സിന് സച്ചിനോട് കടപ്പെട്ടിരിക്കുന്നുവെന്നാണ് ഇതിനെക്കുറിച്ച് റായുഡു പ്രതികരിച്ചത്. മുംബൈ ഇന്ത്യന്‍സിനുവേണ്ടി സച്ചിന്‍ തെണ്ടുല്‍ക്കര്‍ പുറത്താകാതെ 55ഉം അംബാട്ടി റായുഡു പുറത്താകാതെ 63ഉം റണ്‍സ് ആണ് എടുത്തത്.