ധോണി ഉയര്‍ത്തിയത് ഒറിജിനല്‍ കപ്പ്

മുംബൈ: വാങ്കഡെ സ്റ്റേഡിയത്തില്‍ ടീം ഇന്ത്യയ്ക്ക് കിട്ടിയത് ഒറിജിനല്‍ കപ്പ് തന്നെയാണെന്ന് ഇന്റര്‍നാഷണല്‍ ക്രിക്കറ്റ് കൗണ്‍സില്‍ വ്യക്തമാക്കി. അല്ലാതെ വന്ന റിപ്പോര്‍ട്ടുകളെല്ലാം തെറ്റാണെന്നും ഐസിസി അറിയിച്ചു.

ഇന്ത്യയ്ക്ക് സമ്മാനിച്ചത് യഥാര്‍ത്ഥ ട്രോഫിയല്ലെന്ന് ചില ചാനലുകള്‍ റിപ്പോര്‍ട്ട് ചെയ്തത് വിവാദമായി മാറിയ സാഹചര്യത്തിലാണ് വിശദീകരണവുമായി ഐസിസി രംഗത്തെത്തിയത്. ലോകകപ്പ് ഫൈനലുകളില്‍ സമ്മാനിയ്ക്കുന്നത് എപ്പോഴും യഥാര്‍ത്ഥ ലോകകപ്പാണെന്നും അവര്‍ വ്യക്തമാക്കി. ഇതേക്കുറിച്ച് മറ്റു ചോദ്യങ്ങള്‍ക്കൊന്നും യാതൊരു അടിസ്ഥാനവുമില്ല. ഇന്ത്യയ്ക്ക് സമ്മാനിച്ചത് ഐസിസി ലോകകപ്പ് 2011 എന്ന ലോഗോ പതിപ്പിച്ചത് തന്നെയാണ്.

വേള്‍ഡ് കപ്പ് ട്രോഫി മുംബൈ കസ്റ്റംസ് പിടിച്ചുവെച്ചുവെന്നും 35 ശതമാനം തീരുവ തന്നാല്‍ മാത്രമേ കപ്പ് വിട്ടുകൊടുക്കുകയുള്ളൂവെന്നും മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ മുംബൈ കസ്്റ്റംസ് പിടിച്ചെടുത്തത് പ്രചാരണത്തിനുപയോഗിക്കുന്ന ഡ്യൂപ്ലിക്കേറ്റ് കപ്പാണെന്ന് ഐസിസി അധികൃതര്‍ വിശദീകരിയ്ക്കുന്നു.