ടീമിനെ കാത്തിരിയ്ക്കുന്നത് കാര്‍ മഴ

മുംബൈ: ശനിയാഴ്ച മുംബൈയില്‍ ലോകകപ്പ് നേടിയാല്‍ ഇന്ത്യന്‍ ടീമിനെ കാത്തിരിയ്ക്കുന്നത് പുതുപുത്തന്‍ കാറുകള്‍. ലോകകപ്പ് നേടിയാല്‍ എല്ലാ കളിക്കാര്‍ക്കും കാര്‍ നല്‍കുമെന്നു ഹ്യൂണ്ടായി മോട്ടോഴ്‌സ് ഇന്ത്യയാണ് പ്രഖ്യാപിച്ചിരിയ്ക്കുന്നത്.

ഹ്യൂണ്ടായിയുടെ പുതിയ വെര്‍ണ കാറാണ് ടീമംഗങ്ങള്‍ക്ക് നല്‍കുക. ഹ്യൂണ്ടായി മാനെജിങ് ഡയറക്റ്ററും സിഇഒയുമായ ഹാങ് വൂ പാര്‍ക്കാണ് ഇക്കാര്യം അറിയിച്ചത്. ഫൈനലില്‍ കളിക്കുന്ന ഇന്ത്യന്‍ ടീമിനെ അദ്ദേഹം ആശംസിച്ചു. ഇന്ത്യ കപ്പ് നേടുമെന്നും അദ്ദേഹം പ്രത്യാശിച്ചു.

ലോകകപ്പ് ക്രിക്കറ്റിന്റെ ഓഫീഷ്യല്‍ കാര്‍ പാര്‍ട്‌ണേഴ്‌സാണ് ഹ്യൂണ്ടായി. പുതിയ വേര്‍ണ ഇന്ത്യന്‍ കാര്‍ വിപണിയിലെത്തും മുമ്പെ ക്രിക്കറ്റ് താരങ്ങള്‍ക്ക് സമ്മാനിച്ചാല്‍ നേട്ടമുണ്ടാകുമെന്ന പ്രതീക്ഷയിലാണ് കമ്പനി.