ഇംഗ്ലണ്ടിന് തിരിച്ചടി; പീറ്റേഴ്‌സണ്‍ മടങ്ങുന്നു

ചെന്നൈ: ഇംഗ്ലണ്ടിന്റെ പ്രമുഖ ബാറ്റ്‌സ്മാന്‍ കെവിന്‍ പീറ്റേഴ്‌സണ് ലോകകപ്പിലെ ശേഷിക്കുന്ന മത്സരങ്ങളില്‍ കളിക്കാന്‍ കഴിഞ്ഞേക്കില്ലെന്ന് സൂചന. ഹെര്‍ണിയ ശസ്ത്രക്രിയക്ക് വിധേയനാകേണ്ടതിനാല്‍ പീറ്റേഴ്‌സണ്‍ ഉടന്‍ നാട്ടിലേക്ക് തിരിക്കുമെന്നാണ് റിപ്പോര്‍ട്ട്.

ലോകകപ്പിന് ശേഷം ശസ്ത്രക്രിയ നടത്താനാണ് നേരത്തെ നിശ്ചയിച്ചിരുന്നത്. എന്നാല്‍ ദക്ഷിണാഫ്രിക്കക്കെതിരായ മത്സരം കഴിഞ്ഞതോടെ പീറ്റേഴ്‌സന്റെ അസുഖം മൂര്‍ഛിച്ചുവെന്നാണ് സൂചന.അദ്ദേഹത്തെ പരിശോധിച്ച ഡോക്ടര്‍മാര്‍ ശസ്ത്രക്രിയ നീട്ടിക്കൊണ്ടുപോകാനാവില്ലെന്ന് വ്യക്തമാക്കുകയായിരുന്നു. ശസ്ത്രക്രിയയ്്ക്കുശേഷം ഒന്നര മാസമെങ്കിലും വിശ്രമം ആവശ്യമായതിനാല്‍ വേള്‍ഡ് കപ്പ് മത്സരങ്ങള്‍ മാത്രമല്ല ഐപിഎല്‍ മത്സരങ്ങളും പീറ്റേഴ്‌സണ് നഷ്ടമായേക്കുമെന്നാണ് റിപ്പോര്‍ട്ട്. പീറ്റേഴ്‌സണ് പകരം മധ്യനിര ബാറ്റ്‌സ്മാന്‍ മോര്‍ഗനെ തിരിച്ചുവിളിക്കാന്‍ അനുവദിക്കണമെന്ന് ഇംഗ്ലണ്ട് ഐസിസിയോട് അഭ്യര്‍ഥിച്ചിട്ടുണ്ട്.

ലോകകപ്പിനുള്ള 15 അംഗ ടീമില്‍ അംഗമായിരുന്ന മോര്‍ഗന്‍ കൈവിരലിന് പരിക്കേറ്റതിനെ തുടര്‍ന്ന് അവസാന നിമിഷം ഒഴിവാക്കപ്പെടുകയായിരുന്നു. ഡെക്കാന്‍ ചാര്‍ജേഴ്‌സാണ് പീറ്റേഴ്‌സണെ ഐപിഎലിന്റെ ഈ സീസണില്‍ ലേലത്തിനെടുത്തിരിക്കുന്നത്.