ആ താരത്തെ പുറത്തിരുത്തിയത് എന്തിന്? ​ഗംഭീർ ഇനിയും പഠിക്കാനുണ്ട്, മുന്നറിയിപ്പുമായി ​ഗാം​ഗുലി

2026 ടി20 ലോകകപ്പിൽ ഇന്ത്യ തുടർച്ചയായ രണ്ടാം തവണയും മുത്തമിട്ടതിന്റെ ആവേശത്തിലാണ് രാജ്യം. എന്നാൽ, ലോകകപ്പ് വിജയഘോഷങ്ങൾക്കിടയിലും ടീം സെലക്ഷനിലെ ചില വിരോധാഭാസങ്ങൾ ചൂണ്ടിക്കാട്ടി രംഗത്തെത്തിയിരിക്കുകയാണ് മുൻ നായകനും ബിസിസിഐ മുൻ പ്രസിഡന്റുമായ സൗരവ് ഗാംഗുലി. സ്റ്റാർ ബാറ്റർ ശ്രേയസ് അയ്യർക്ക് ടി20 ടീമിൽ ഇടമില്ലാത്തത് തന്നെ അമ്പരപ്പിക്കുന്നുവെന്നും ഇന്ത്യയുടെ പ്രതിഭകളുടെ അതിപ്രസരം ലോകക്രിക്കറ്റിൽ മറ്റൊരു രാജ്യത്തിനുമില്ലാത്തതാണെന്നും ഗാംഗുലി നിരീക്ഷിച്ചു.

ഇന്ത്യയുടെ അത്ഭുതപ്പെടുത്തുന്ന ബെഞ്ച് കരുത്ത്

ഇന്ത്യക്ക് ഒരേസമയം രണ്ട് ലോകോത്തര ടി20 ടീമുകളെ അന്താരാഷ്ട്ര തലത്തിൽ ഇറക്കാൻ സാധിക്കുമെന്ന് ഗാംഗുലി അവകാശപ്പെട്ടു. "ജസ്പ്രീത് ബുംറ ഫിറ്റാണെങ്കിൽ വിരാട് കോഹ്‌ലി, രോഹിത് ശർമ്മ എന്നിവരെ വെച്ച് നമുക്ക് മറ്റൊരു ടീമിനെ പടുത്തുയർത്താം. വിരാട്, രോഹിത്, കെ.എൽ രാഹുൽ, ഋഷഭ് പന്ത് എന്നിവർക്ക് പുറമെ യശസ്വി ജയ്‌സ്വാളിനെപ്പോലെയുള്ളവർക്ക് പോലും എല്ലാ മത്സരങ്ങളിലും അവസരം ലഭിക്കുന്നില്ല. ലോകത്തെ ഏത് ടീമിലും ഇടംപിടിക്കാൻ പ്രാപ്തിയുള്ള വൈഭവ് സൂര്യവംശി, ഹർഷിത് റാണ തുടങ്ങിയവരും പുറത്താണ്. ഇതിനെല്ലാം പുറമെയാണ് ശ്രേയസ് അയ്യർക്ക് ഒരു ടി20 മത്സരം പോലും ലഭിക്കാത്ത സാഹചര്യം. വൈറ്റ് ബോൾ ക്രിക്കറ്റിൽ അയ്യർക്ക് ഇടമില്ല എന്ന സത്യം എനിക്ക് വിശ്വസിക്കാനാവുന്നില്ല," ഗാംഗുലി റെവ്സ്പോർട്സിനോട് പറഞ്ഞു.

കഴിഞ്ഞ രണ്ട് ഐപിഎൽ സീസണുകളിലായി 950-ലധികം റൺസ് നേടിയ ശ്രേയസ് അയ്യർ, കൊൽക്കത്ത നൈറ്റ് റൈഡേഴ്സിനെ കിരീടത്തിലേക്കും പഞ്ചാബ് കിംഗ്സിനെ റണ്ണേഴ്സ് അപ്പിലേക്കും നയിച്ചിരുന്നു. എന്നിട്ടും ദേശീയ ടീമിൽ നിന്ന് അദ്ദേഹം തഴയപ്പെടുന്നത് ഇന്ത്യൻ ടീമിന്റെ ആഴത്തെയാണ് കാണിക്കുന്നതെന്ന് ഗാംഗുലി കൂട്ടിച്ചേർത്തു.

ഗംഭീറിന് മുന്നറിയിപ്പുമായി ഗാംഗുലി

ഇന്ത്യൻ ഹെഡ് കോച്ച് ഗൗതം ഗംഭീറിനെ പ്രശംസിക്കാനും ഗാംഗുലി മറന്നില്ല. വൈറ്റ് ബോൾ ക്രിക്കറ്റിൽ ഗംഭീർ ഒരു 'വിജയി' ആണെന്ന് അദ്ദേഹം പറഞ്ഞു. ഗംഭീറിന് കീഴിൽ ഇന്ത്യ ചാമ്പ്യൻസ് ട്രോഫി, ഏഷ്യ കപ്പ്, ഇപ്പോൾ ടി20 ലോകകപ്പ് എന്നിവ സ്വന്തമാക്കി. "പുറമെ പരുക്കനാണെന്ന് തോന്നുമ്പോഴും ഗംഭീർ ഒരു നല്ല മനുഷ്യനാണ്. കളിക്കാരെക്കാൾ ഉപരിയായി ടീമിന് പ്രാധാന്യം നൽകുന്ന ശൈലിയാണ് അദ്ദേഹത്തിന്റേത്," ഗാംഗുലി പറഞ്ഞു.

എങ്കിലും ടെസ്റ്റ് ക്രിക്കറ്റിൽ ഗംഭീർ ഇനിയും മെച്ചപ്പെടാനുണ്ടെന്ന് ഗാംഗുലി ഓർമ്മിപ്പിച്ചു. ന്യൂസിലൻഡിനോടും ദക്ഷിണാഫ്രിക്കയോടും നാട്ടിൽ വെച്ച് ഏറ്റുവാങ്ങിയ ദയനീയമായ ടെസ്റ്റ് പരമ്പര തോൽവികൾ ഇന്ത്യക്ക് തിരിച്ചടിയാണ്. നല്ല പിച്ചുകൾ ഒരുക്കാനും ടെസ്റ്റ് ക്രിക്കറ്റിലെ തന്ത്രങ്ങൾ മാറ്റാനും ഗംഭീർ തയ്യാറാകണമെന്നും 'ദാദ' ഉപദേശിച്ചു. ഇന്ത്യൻ ടീമിന്റെ ഹെഡ് കോച്ച് സ്ഥാനത്തേക്ക് വരുന്നതിന് മുമ്പ് ​ഗംഭീർ കൊൽക്കത്ത നൈറ്റ് റൈഡേഴ്സിന്റെ മെന്ററായിരുന്നു. അദ്ദേഹത്തിന്റെ തന്ത്രങ്ങളുടെ ഫലമായി കൊൽക്കത്ത നൈറ്റ് റൈഡേഴ്സ് മൂന്നാം ഐപിഎൽ കിരീടം സ്വന്തമാക്കുകയും ചെയ്തിരുന്നു.