ധവാന് പകരം ഇന്ത്യന്‍ ഓപ്പണറാകുക കെ എല്‍ രാഹുല്‍; നാലാം സ്ഥാനത്ത് രണ്ടുപേര്‍

രാഹുലിന് തിളങ്ങാം

ടീമിലെ വിവിധ സ്ഥാനങ്ങളില്‍ മാറിക്കൊണ്ടിരിക്കുന്നത് എളുപ്പമുള്ള കാര്യമല്ല. സതാംപ്ടണില്‍ സൗത്ത് ആഫ്രിക്കയ്‌ക്കെതിരെ രാഹുല്‍ നേരത്തെ കളിക്കാന്‍ ഇറങ്ങേണ്ട സാഹചര്യമുണ്ടായിരുന്നു. തുടക്കത്തില്‍ വിക്കറ്റ് പോകാതെ പിടിച്ചുനില്‍ക്കാനും താരത്തിന് കഴിഞ്ഞു. ബൗണ്‍സും സ്വിങ്ങും ഉള്ള പിച്ചില്‍ രാഹുലിന് ഓപ്പണിങ് സ്ഥാനത്തും കാര്യമായ പങ്കുവഹിക്കാന്‍ കഴിയുമെന്നാണ് പ്രതീക്ഷ.

രാഹുല്‍ ദ്രാവിഡിനെ മാതൃകയാക്കാം

ടീമില്‍ വിവിധ സ്ഥാനങ്ങളില്‍ കളിക്കുന്നത് കളിക്കാരനെന്ന നിലയില്‍ മികവുകാട്ടാന്‍ സഹായിക്കുമെന്നാണ് ഇന്ത്യന്‍ ടീമിന്റെ ബാറ്റിങ് പരിശീലകന്‍ സഞ്ജയ് ബാംഗര്‍ പറയുന്നത്. രാഹുല്‍ ദ്രാവിഡ് ഈ രീതിയില്‍ കളിച്ചുവളര്‍ന്ന താരമാണെന്നും ബാംഗര്‍ ചൂണ്ടിക്കാട്ടുന്നു. മധ്യനിരയില്‍ കളിച്ചതിന് പിന്നാലെ ഓപ്പണറാകുമ്പോള്‍ എത്രമാത്രം വെല്ലുവിളിയുണ്ടെന്ന് മനസിലാക്കാം. പുതിയ പന്തില്‍ ബൗണ്‍സുണ്ടെങ്കിലും ബൗണ്ടറി നേടാന്‍ എളുപ്പമാണ്. ഇതിന് മാനസിക പരിവര്‍ത്തനവും ആവശ്യമാണെന്ന് ബാംഗര്‍ പറഞ്ഞു

നാലാം സ്ഥാനത്തേക്ക് രണ്ടുപേര്‍

രാഹുല്‍ ഓപ്പണറാകുമ്പോള്‍ വിജയ് ശങ്കര്‍, ദിനേഷ് കാര്‍ത്തിക് ഇവരില്‍ ആരെങ്കിലുമാകും നാലാം സ്ഥാനത്തിറങ്ങുക. പന്തുകൊണ്ടും സഹായിക്കാന്‍ കഴിയുമെന്നതിനാല്‍ വിജയ് ശങ്കറിനായിരിക്കും പ്രഥമ പരിഗണന. അതേസമയം, ദിനേഷ് കാര്‍ത്തിക്കിന് പരിചയസമ്പത്ത് തുണയാകും. കേദാര്‍ ജാദവിന് പകരം രവീന്ദ്ര ജഡേജയെ കളിപ്പിക്കാനുള്ള സാധ്യതയും നിലനില്‍ക്കുന്നുണ്ട്.