|
ധവാനെ പുറത്താക്കാന് അശ്വിന്
മങ്കാദിങ്ങിനായിരുന്നു അശ്വിന്റെ ശ്രമം. ഇതിനായി റണ്ണപ്പ് വേഗത കുറച്ചെങ്കിലും ധവാന് ക്രീസില്നിന്നും ബാറ്റ് വിട്ടിരുന്നില്ല. അശ്വിന് അടുത്ത പന്തെറിയാനെത്തിയപ്പോള് ധവാന് കണക്കിന് കളിയാക്കുകയും ചെയ്തു. അശ്വിന് പന്തെറിയാന് ആക്ഷനെടുക്കുമ്പോള് ക്രീസില്നിന്നും ഓടുന്നതായി ഭാവിച്ചായിരുന്നു ധവാന്റെ കളിയാക്കല്. ഗൗരവം വിടാതെയായിരുന്നു ധവാന്റെ പ്രകടനം.
കിങ്സ് ഇലവന് തോല്വി
മത്സരത്തില് കിങ്സ് ഇലവന് പഞ്ചാബിനെ ഡല്ഹി 5 വിക്കറ്റിന് തോല്പ്പിച്ചിരുന്നു. ആദ്യ ബാറ്റ് ചെയ്ത പഞ്ചാബിനെ മികച്ച ബൗളിങിലൂടെ ആതിഥേയര് 163 റണ്സില് പിടിച്ചുനിര്ത്തി. മറുപടിയില് നായകന് ശ്രേയസ് അയ്യരുടെയും (58*) ശിഖര് ധവാന്റെയും (56) ഇന്നിങ്സുകള് 19.4 ഓവറില് അഞ്ചു വിക്കറ്റിനു ഡല്ഹിയെ ലക്ഷ്യത്തിലെത്തിച്ചു. 49 പന്തില് അഞ്ചു ബൗണ്ടറികളും ഒരു സിക്സറുമടക്കമാണ് പുറത്താവാതെ 58 റണ്സുമായി ശ്രേയസ് ടീമിന്റെ ടോപ്സ്കോററായത്.
ബട്ലറെ അശ്വിന് പുറത്താക്കി
രാജസ്ഥാന് റോയല്സ് കിങ്സ് ഇലവന് പഞ്ചാബ് മത്സരത്തില് 43 പന്തില് 69 റണ്സെടുത്ത് ബാറ്റ് ചെയ്യുകയായിരുന്ന ബട്ലര് ടീമിനെ അനായാസം ജയിപ്പിക്കുമെന്ന തോന്നലുളവാക്കിയിരുന്നു. പന്തെറിയാനെത്തിയ അശ്വിന് അതിന് മുന്പേ ക്രീസ് വിട്ട ബട്ലറെ പുറത്താക്കുകയായിരുന്നു. അശ്വിന് അപ്പീലില് ഉറച്ചുനിന്നതോടെ മൂന്നാം അമ്പയര്ക്ക് വിടുകയും ബട്ലര് പുറത്താണെന്ന് വിധിക്കുകയുമായിരുന്നു. സംഭവം വന് വിവാദത്തിനും വഴിതെളിച്ചു.