ബാറ്റ് ആകാശത്ത്,പന്ത് മൈതാനത്ത്!സഞ്ജുവിന്റെ 'ഫ്ലയിംഗ് ബാറ്റ്'കണ്ട് അമ്പരന്ന് ചെപ്പോക്ക്;ഗാലറിയിൽ ചിരിപ്പൂരം

ഐപിഎൽ 2026-ൽ കൊൽക്കത്ത നൈറ്റ് റൈഡേഴ്‌സിനെതിരായ മത്സരത്തിൽ ചെന്നൈ സൂപ്പർ കിംഗ്‌സ് സ്റ്റാർ ബാറ്റ്സ്മാൻ സഞ്ജു സാംസണിന്റെ ഒരു അപ്രതീക്ഷിത നീക്കം ചെപ്പോക്ക് സ്റ്റേഡിയത്തെ ഒന്നടങ്കം ചിരിപ്പിച്ചു. ബാറ്റിംഗിനിടെ സഞ്ജുവിന്റെ കയ്യിൽ നിന്നും ബാറ്റ് തെറിച്ചുപോയതാണ് ഗാലറിയിലും സോഷ്യൽ മീഡിയയിലും ചർച്ചാവിഷയമായിരിക്കുന്നത്. ഹൈ വോൾട്ടേജ് മത്സരത്തിനിടയിൽ ആരാധകർക്ക് ആശ്വാസമേകുന്ന ഒരു രസകരമായ നിമിഷമായി ഇത് മാറി.

മിസ്റ്ററി സ്പിന്നിനെതിരെ 'പറക്കും ബാറ്റ്'

32 പന്തുകളിൽ നിന്നും 48 റൺസ് നേടിയാണ് സഞ്ജു പുറത്തായത്. എന്നാൽ, മത്സരത്തിന്റെ എട്ടാം ഓവറിലായിരുന്നു നാടകീയമായ ഈ സംഭവം. കെകെആർ സ്പിന്നർ വരുൺ ചക്രവർത്തിയുടെ പന്തിനെ ഗാലറിയിലേക്ക് സിക്സർ പറത്താനുള്ള ശ്രമത്തിലായിരുന്നു സഞ്ജു. എന്നാൽ ഷോട്ട് പൂർത്തിയാക്കുന്നതിനിടെ ബാലൻസ് നഷ്ടമായ സഞ്ജുവിന്റെ കയ്യിൽ നിന്നും ബാറ്റ് വഴുതിപ്പോയി. പന്ത് സ്ക്വയർ ലെഗ് മേഖലയിലേക്ക് പോയപ്പോൾ ബാറ്റ് അല്പം ദൂരെയുള്ള 30 യാർഡ് സർക്കിളിന് സമീപമാണ് ചെന്നിറങ്ങിയത്.

ബാറ്റ് പറക്കുന്നത് കണ്ട് കളിക്കാരും അമ്പയർമാരും ഒരുനിമിഷം അമ്പരന്നെങ്കിലും തൊട്ടുപിന്നാലെ സ്റ്റേഡിയത്തിൽ ചിരി പടർന്നു. അമ്പയർ പോയി ബാറ്റ് എടുത്തു കൊണ്ടുവരികയും ഡെവാൾഡ് ബ്രെവിസ് അത് വാങ്ങി സഞ്ജുവിന് കൈമാറുകയും ചെയ്തു. ഗൗരവമേറിയ മത്സരത്തിനിടയിലെ ഈ 'ലൈറ്റ് മൊമെന്റ്' ആരാധകർ ശരിക്കും ആസ്വദിച്ചു.

ചെന്നൈയുടെ റൺവേട്ട; ആയുഷ് മ്ഹാത്രെയുടെ വെടിക്കെട്ട്

ആദ്യം ബാറ്റ് ചെയ്ത ചെന്നൈ സൂപ്പർ കിംഗ്‌സ് നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 192 റൺസെന്ന മികച്ച സ്കോറാണ് പടുത്തുയർത്തിയത്. പവർപ്ലേ ഓവറുകളിൽ തന്നെ ചെന്നൈ തങ്ങളുടെ ആക്രമണോത്സുകമായ ശൈലി വ്യക്തമാക്കി. റുതുരാജ് ഗെയ്‌ക്‌വാദ് (6) നേരത്തെ പുറത്തായെങ്കിലും യുവതാരം ആയുഷ് മ്ഹാത്രെ വെടിക്കെട്ട് ബാറ്റിംഗാണ് കാഴ്ചവെച്ചത്. വെറും 17 പന്തിൽ നിന്ന് 38 റൺസെടുത്ത ആയുഷ് ചെന്നൈക്ക് മികച്ച അടിത്തറ നൽകി. പവർപ്ലേ അവസാനിക്കുമ്പോൾ ചെന്നൈ 72/2 എന്ന ശക്തമായ നിലയിലായിരുന്നു.

സഞ്ജുവിന്റെ പോരാട്ടവും കാർത്തിക് ത്യാഗിയുടെ വേഗതയും

മിഡിൽ ഓവറുകളിൽ സഞ്ജു സാംസൺ (32 പന്തിൽ 48) ഇന്നിംഗ്‌സ് നയിച്ചു. അർദ്ധസെഞ്ച്വറിക്ക് തൊട്ടടുത്തെത്തിയ സഞ്ജുവിനെ കാർത്തിക് ത്യാഗിയുടെ മാരകമായ ഒരു പന്താണ് പുറത്താക്കിയത്. 148 കിലോമീറ്റർ വേഗതയിൽ പാഞ്ഞെത്തിയ പന്തിൽ സഞ്ജു ക്ലീൻ ബൗൾഡാവുകയായിരുന്നു. കൂട്ടിന് ഡെവാൾഡ് ബ്രെവിസ് 41 റൺസ് (29 പന്ത്) കൂടി ചേർത്തതോടെ ചെന്നൈ സ്കോർ 190 കടന്നു. കെകെആറിനായി സുനിൽ നരെയ്ൻ മികച്ച നിയന്ത്രണത്തോടെ പന്തെറിഞ്ഞപ്പോൾ കാർത്തിക് ത്യാഗി 2 വിക്കറ്റുകൾ വീഴ്ത്തി. മറുപടി ബാറ്റിങ്ങിനെത്തിയ കൊൽക്കത്ത അടിമുടി വിറച്ചാണ് ചെയ്സ് തീർത്തത്. നൂർ അഹമദിന്റെ സ്പിൻ വലയിൽ കുടുങ്ങിയ കെകെആർ 160 റൺസിന് ഇന്നിങ്സ് അവസാനിപ്പിച്ചു.