ബുധനാഴ്ച വൈകീട്ടോടെയാണ് ധോണി റിട്ടയേഴ്സെന്ന ഹാഷ് ടാഗ് ട്വിറ്ററില് ട്രെന്ഡിങായി മാറിയത്. ധോണിയുടെ ഭാവിയെക്കുറിച്ച് അനിശ്ചിതത്വം തുടരുന്നതിനാല് തന്നെ ഇത് ക്രിക്കറ്റ് പ്രേമികള്ക്കിടയില് വളരെ പെട്ടെന്നു വൈറലായി മാറുകയും ചെയ്തു.
ഒടുവില് ഇത് അവസാനിപ്പിക്കാന് സാക്ഷിക്കു തന്നെ രംഗത്തു വരേണ്ടി വന്നു. ഇവയെല്ലാം അഭ്യൂഹങ്ങള് മാത്രമാണ് ! ലോക്ക്ഡൗണ് ആളുകളുടെ മനോനില തെറ്റിച്ചിരിക്കുന്നു എനിക്കു മനസ്സിലാക്കാന് കഴിയും! എന്നായിരുന്നു സാക്ഷിയുടെ ട്വീറ്റ്. എന്നാല് അധികം വൈകാതെ അവര് ഇതു ഡിലീറ്റ് ചെയ്തു.
ധോണിയുടെ അന്താരാഷ്ട്ര ക്രിക്കറ്റിലെ ഭാവിയെക്കുറിച്ച് ഐപിഎല്ലില് ചെന്നൈ സൂപ്പര് കിങ്സിലെ സഹതാരമായ ഹര്ഭജന് സിങ് നേരത്തേ പ്രതികരിച്ചിരുന്നു.
ഐപിഎല്ലില് കളിക്കണമെന്ന് ധോണി 100 ശതമാനം ആഗ്രഹിക്കുന്നുണ്ട്. എന്നാല് അന്താരാഷ്ട്ര ക്രിക്കറ്റില് ഇനിയും കളിക്കാന് അദ്ദേഹത്തിനു ആഗ്രഹമുണ്ടോയെന്നതിനെക്കുറിച്ച് ഇനിയും അറിയേണ്ടതുണ്ട്. ഇന്ത്യക്കു വേണ്ടി ഒരുപാട് കളിച്ചു കഴിഞ്ഞു. അതിനാല് തന്നെ വീണ്ടും ദേശീയ ടീമിനായി കളിക്കാന് ധോണി ആഗ്രഹിക്കുന്നുണ്ടാവില്ലെന്നാണ് തനിക്കു തോന്നുന്നത്. ലോകകപ്പിലെ മല്സരം അദ്ദേഹത്തിന്റെ കരിയറിലെ അവസാനത്തേത് കൂടിയാണ്. ചില ആളുകള് ഇക്കാര്യം തന്നോടു പറയുകയും ചെയ്തിരുന്നതായും ഭാജി വ്യക്തമാക്കിയിരുന്നു.
കഴിഞ്ഞ വര്ഷം ഇംഗ്ലണ്ടില് നടന്ന ഐസിസിയുടെ ഏകദിന ലോകകപ്പിന്റെ സെമി ഫൈനലില് ന്യൂസിലാന്ഡിനെതിരേയാണ് 38 കാരനായ ധോണിയെ അവസാനമായി ഇന്ത്യന് ജഴ്സിയില് കണ്ടത്. ജൂലൈയില് നടന്ന ഈ കളിയില് കിവീസിനോടു തോറ്റ് ഇന്ത്യ ലോകകപ്പില് നിന്നു പുറത്തായിരുന്നു.
ലോകകപ്പിനു ശേഷം നടന്ന പരമ്പരകളില് നിന്നെല്ലാം ധോണി സ്വയം വിട്ടുനില്ക്കുകയായിരുന്നു. ഇതിനിടെ ധോണി വിരമിച്ചേക്കുമെന്ന തരത്തില് പല തവണ അഭ്യൂഹങ്ങള് വരികയും ചെയ്തിരുന്നു. എന്നാല് ഇവയോടൊന്നും അദ്ദേഹം പ്രതികരിച്ചിരുന്നില്ല. ഇതില് ഒടുവിലത്തേതാണ് ധോണി റിട്ടയേഴ്സെന്ന് കഴിഞ്ഞ ദിവസം ട്രെന്ഡിങായി മാറിയ ട്വീറ്റ്.