സച്ചിന് പറഞ്ഞത്
ധോണി അഫ്ഗാനിസ്ഥാനെതിരായ മത്സരത്തില് പോസിറ്റീവ് മൈന്ഡോടെ ബാറ്റ് ചെയ്യണമെന്നായിരുന്നു സച്ചിന് പറഞ്ഞത്. അഫ്ഗാനെതിരെ സ്ട്രൈക്ക് റൊട്ടേഷന് ധോണിയുടേത് മോശമായിരുന്നുവെന്നും സച്ചിന് പറഞ്ഞിരുന്നു. ഒരുപാട് പന്തുകള് ധോണി പാഴാക്കി. ഇത് ഇന്ത്യക്ക് നല്ലൊരു ടോട്ടല് നിഷേധിച്ചെന്നും സച്ചിന് പറഞ്ഞിരുന്നു. ജാദവും ധോണിയും ചേര്ന്നുള്ള 57 റണ്സ് കൂട്ടുകെട്ട് വളരെ പതിയെയാണ് മുന്നോട്ട് പോയതെന്നും, ടീം നന്നായി സ്കോര് ചെയ്യേണ്ട സമയമായിരുന്നു അതെന്നും സച്ചിന് പറഞ്ഞിരുന്നു.
ട്രോള് ക്യാമ്പയിന്
ധോണി ആരാധകര് മാസ്റ്റര് ബ്ലാസ്റ്ററുടെ ഈ പരാമര്ശത്തെ നല്ല രീതിയില് എടുത്തിട്ടില്ല. അദ്ദേഹത്തിന്റെ പ്രകടനങ്ങളെ എടുത്ത് കാണിച്ച് വിമര്ശിച്ചിരിക്കുകയാണ് ആരാധകര്. സ്വന്തം റെക്കോര്ഡുകള്ക്ക് വേണ്ടി ബാറ്റ് ചെയ്ത താരമായിരുന്നു സച്ചിനെന്നാണ് ധോണി ആരാധകരുടെ വിമര്ശനം. അതേസമയം സച്ചിനെതിരെ അതിരൂക്ഷമായ വിമര്ശനമാണ് ട്വിറ്ററില് നടക്കുന്നത്. ധോണിയെ പിന്തുണയ്ക്കുകയും സച്ചിനെ മോശം കളിക്കാരനായി കാണിക്കുകയുമാണ് ഇവര്.
ട്രോള് ഇങ്ങനെ
എന്നെ സംബന്ധിച്ച് ധോണിയാണ് മികച്ച കളിക്കാരന് എന്ന് ഒരു ആരാധകന് പറയുന്നു. ക്രിക്കറ്റിലെ രാജാവാണ് ധോണിയെന്ന് മറ്റൊരാള് പറയുന്നു. സച്ചിന് സ്വന്തം റെക്കോര്ഡുകള്ക്ക് വേണ്ടിയാണ് കളിച്ചത്. സ്വന്തം മകനെ ടീമില് എത്തിക്കുന്നതിന് വേണ്ടിയാണ് സച്ചിന് ശ്രമിക്കുന്നതെന്നും ധോണി ആരാധകര് പറയുന്നു. സച്ചിന് 200 നഷ്ടമായപ്പോള് നിരാശ തോന്നി എന്ന് പറഞ്ഞിരുന്നുവെന്നും, എന്നാല് ധോണി അത് പറഞ്ഞില്ലെന്നു ചിലര് വാദിക്കുന്നു. സച്ചിന്റെ സ്കോര് 90 കഴിഞ്ഞാല് വിറച്ചിരുന്നുവെന്നും വരെ പരിഹാസമുണ്ട്. സച്ചിന് രണ്ട് ലോകകപ്പ് ഫൈനല് കളിച്ചിട്ടുണ്ട്. എന്നാല് 50 റണ്സ് തികച്ചെടുക്കാന് സാധിച്ചിട്ടില്ലെന്നും ധോണി ആരാധകര് പരിഹസിക്കുന്നു.