പകരക്കാരനായെത്തിയ പന്തിന്റെ അരങ്ങേറ്റം പാളിയോ?; സച്ചിന്‍ ടെണ്ടുല്‍ക്കര്‍ക്ക് പറയാനുള്ളത്

പന്തിന്റെ അരങ്ങേറ്റം മോശമാക്കിയില്ല

പന്തിന്റെ ആദ്യ മത്സരം മോശമാക്കിയില്ലെന്നാണ് ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ക്ക് പറയാനുള്ളത്. അതേസമയം, പന്ത് അരങ്ങേറുമ്പോള്‍ തന്നെ ചില കാര്യങ്ങള്‍ പരിശോധിക്കേണ്ടതുണ്ടെന്ന് സച്ചിന്‍ പറഞ്ഞു. ഏതെങ്കിലും ബൗളര്‍ക്ക് പരിക്കേറ്റാല്‍ ആരാണ് പകരമായി പന്തെറിയുകയെന്ന് സച്ചിന്‍ ചോദിക്കുന്നു. നേരത്തെ വിജയ് ശങ്കര്‍ പാക്കിസ്ഥാനെതിരെ ഭുവനേശ്വര്‍ കുമാറിന്റെ പകരക്കാരനായി പന്തെറിഞ്ഞിരുന്നു.

പന്തോ വിജയ് ശങ്കറോ?

പന്ത് എല്ലായിപ്പോഴും ആക്രമണാത്മക ബാറ്റിങ് പുറത്തെടുക്കുന്ന കളിക്കാരനാണെന്ന് സച്ചിന്‍ ചൂണ്ടിക്കാട്ടി. ഡൈനാമിറ്റ് എന്നാണ് താന്‍ അവനെ വിളിക്കുന്നത്. ശേഷിക്കുന്ന ഇന്ത്യയുടെ മത്സരങ്ങള്‍ക്കും പന്തിനെ കളിപ്പിക്കണമോ എന്ന ചോദ്യത്തില്‍നിന്നും സച്ചിന്‍ ഒഴിഞ്ഞുമാറി. ഇക്കാര്യം തീരുമാനിക്കേണ്ടത് ക്യാപ്റ്റനും കോച്ചും അടങ്ങിയ ടീം മാനേജ്‌മെന്റാണ്. ഓരോ കളിയിലും വ്യത്യസ്തമായ കാര്യങ്ങള്‍ പരിശോധിക്കേണ്ടതുണ്ടെന്നും ഇതിഹാസതാരം വ്യക്തമാക്കി.

പാണ്ഡ്യയും ഋഷഭ് പന്തും

പന്തിന് ബാറ്റ് ചെയ്യാന്‍ കഴിയുന്നുണ്ടെന്ന കാര്യത്തില്‍ സച്ചിന് സംശയമില്ല. ഐപിഎല്ലില്‍ എത്രയോ തവണ അത് കണ്ടതാണ്. പന്തിനെ പോലുള്ള ഒരു കളിക്കാരന് വളര്‍ന്നുവരാന്‍ സമയം ആവശ്യമാണ്. കൂടുതല്‍ കളിക്കുമ്പോള്‍ കൂടുതല്‍ കാര്യങ്ങള്‍ പഠിക്കാനാകും. പന്തും ഹാര്‍ദിക് പാണ്ഡ്യയും നന്നായി സ്‌കോര്‍ ചെയ്യുന്നവരും വിക്കറ്റിനിടയിലെ ഓട്ടത്തില്‍ മിടുക്കരുമാണ്. ഇംഗ്ലണ്ടിനെതിരെ ഇരുവരും ബാറ്റ് ചെയ്യുമ്പോള്‍ മത്സരം ഇന്ത്യയുടെ വരുതിയാണെന്ന് താന്‍ ചിന്തിച്ചിരുന്നതായും സച്ചിന്‍ പറഞ്ഞു.