കളിക്കാർ മാത്രമല്ല, ഗംഭീറും ഉത്തരം പറയണം! ടി20 തകർച്ച ബിസിസിഐ പരിശോധിക്കണമെന്ന് സബാ കരീം

അയർലൻഡ്, ഇംഗ്ലണ്ട് പര്യടനങ്ങളിലെ നാണംകെട്ട ടി20 പരമ്പര പരാജയങ്ങൾക്ക് പിന്നാലെ ഇന്ത്യൻ ടീമിന്റെ പരിശീലകരും സപ്പോർട്ട് സ്റ്റാഫും ഉൾപ്പെടുന്ന മാനേജ്മെന്റിനെതിരെ ചോദ്യങ്ങളുമായി മുൻ ഇന്ത്യൻ സെലക്ടർ സബാ കരീം. വിദേശമണ്ണിൽ ഒരൊറ്റ മത്സരം പോലും ജയിക്കാനാകാതെ ടീം ഇന്ത്യ തകർന്നടിഞ്ഞ പശ്ചാത്തലത്തിൽ ബിസിസിഐ അടിയന്തരമായി ഇടപെടണമെന്നും കടുത്ത പുനഃപരിശോധന നടത്തണമെന്നും അദ്ദേഹം ആവശ്യപ്പെട്ടു. പരാജയങ്ങളുടെ ഉത്തരവാദിത്തം കളിക്കാരുടെ മേൽ മാത്രം കെട്ടിവെച്ച് പരിശീലകർക്ക് ഒഴിഞ്ഞുമാറാനാകില്ലെന്നാണ് മുൻ വിക്കറ്റ് കീപ്പർ ബാറ്ററുടെ നിലപാട്.

പരിശീലകർക്കും നായകനും ഒരുപോലെ ഉത്തരവാദിത്തമുണ്ട്

ഇംഗ്ലണ്ടിനെതിരായ ഏകദിന പരമ്പരയ്ക്ക് മുന്നോടിയായി പിടിഐയോട് സംസാരിക്കവെയാണ് സബാ കരീം മാനേജ്മെന്റിനെതിരെ തിരിഞ്ഞത്. വലിയ മാർജിനുകളിലുള്ള ഇത്തരം കനത്ത പരാജയങ്ങളിൽ നിന്ന് ആർക്കും ഒഴിഞ്ഞുമാറാനാകില്ലെന്ന് അദ്ദേഹം പറഞ്ഞു. ഹെഡ് കോച്ച് ഗൗതം ഗംഭീർ ഉൾപ്പെടുന്ന സപ്പോർട്ട് സ്റ്റാഫിനും, ക്യാപ്റ്റൻ ശ്രേയസ് അയ്യർക്കും വൈസ് ക്യാപ്റ്റൻ തിലക് വർമ്മയ്ക്കും ഇതിൽ തുല്യ പങ്കുണ്ട്. വിദേശ പര്യടനങ്ങളിൽ ടീമിന്റെ തന്ത്രങ്ങളും ആസൂത്രണങ്ങളും സെലക്ഷനും നിശ്ചയിക്കുന്നത് ഇവരുൾപ്പെടുന്ന തിങ്ക് ടാങ്കാണ്. അതിനാൽ ഈ വൻ തകർച്ചയിൽ ഇവരുടെ പങ്കിനെക്കുറിച്ച് ബിസിസിഐ കൃത്യമായി അന്വേഷിക്കണം.

ശ്രേയസ് അയ്യർക്ക് പിന്തുണ; പക്ഷേ സ്വന്തം ശൈലി കാണിക്കണം

നായകനെന്ന നിലയിൽ ശ്രേയസ് അയ്യർ നേരിടുന്ന കടുത്ത വിമർശനങ്ങളുടെ പശ്ചാത്തലത്തിൽ അദ്ദേഹത്തിന് സബാ കരീം പിന്തുണ പ്രഖ്യാപിച്ചു. രണ്ട് മോശം പരമ്പരകളുടെ പേരിൽ ക്യാപ്റ്റനെ മാറ്റുന്നതിനോട് തനിക്ക് യോജിപ്പില്ലെന്നും ഒരിക്കൽ വിശ്വസിച്ച് ഏൽപ്പിച്ച ഉത്തരവാദിത്തത്തിൽ ശ്രേയസിനെ ഇനിയും പിന്തുണയ്ക്കണമെന്നും അദ്ദേഹം പറഞ്ഞു. എന്നാൽ ടീമിന്റെ തന്ത്രങ്ങളിലും ആവശ്യമായ കളിക്കാരെ തിരഞ്ഞെടുക്കുന്നതിലും ശ്രേയസ് സ്വന്തം കാഴ്ചപ്പാടുകൾ വ്യക്തമാക്കേണ്ട സമയമാണിത്. ഭയമില്ലാതെ കളിക്കാൻ സാധിക്കുന്ന ഒരു പോസിറ്റീവ് അന്തരീക്ഷം ഡ്രെസ്സിങ് റൂമിൽ ഒരുക്കാൻ മാനേജ്മെന്റിന് സാധിക്കണമെന്നും അദ്ദേഹം ഓർമ്മിപ്പിച്ചു.

വേണ്ടത് സത്യസന്ധമായ സ്വയംവിമർശനം

ബിസിസിഐ വിളിച്ചുചേർക്കുന്ന അടുത്ത അവലോകന യോഗത്തിൽ പരാജയത്തിന്റെ യഥാർത്ഥ കാരണങ്ങൾ കണ്ടെത്താൻ കഴിയുമെന്ന് സബാ കരീം പ്രത്യാശ പ്രകടിപ്പിച്ചു. കളിക്കാരെ പ്രചോദിപ്പിക്കുകയും അവരുടെ മികച്ച പ്രകടനം പുറത്തെടുക്കാൻ സഹായിക്കുകയും ചെയ്യുക എന്നത് ഹെഡ് കോച്ചിന്റെ പ്രധാന ചുമതലയാണ്. ഈ പര്യടനത്തിൽ അതിന് സാധിക്കാതെ പോയതിന്റെ കാരണം ബിസിസിഐ കണ്ടെത്തണം. തെറ്റുകൾ പരസ്യമായി അംഗീകരിക്കാനും സത്യസന്ധമായ സ്വയംവിമർശനം നടത്തി കുറവുകൾ നികത്താനും ടീം തയ്യാറായാൽ മാത്രമേ ശക്തമായൊരു തിരിച്ചുവരവ് സാധ്യമാകൂ എന്ന് പറഞ്ഞാണ് അദ്ദേഹം നിർത്തിയത്. ഇം​ഗ്ലണ്ടിനെതിരായ മൂന്ന് മത്സരങ്ങൾ അടങ്ങുന്ന ഏകദിന പരമ്പരയ്ക്ക് ഇന്ന് തുടക്കമാവുകയാണ്. വിരാടും രോഹിതും ബുംറയുമെല്ലാം ടീമിലേക്ക് വലിയ ഇടവേളയ്ക്ക് ശേഷം തിരിച്ചെത്തുന്നു എന്ന പ്രത്യേകത കൂടി ഈ പര്യടനത്തിനുണ്ട്.