IPL 2026:'സഞ്ജു ക്യാപ്റ്റനാവണമെന്ന് നിർബന്ധമില്ല!ഹാർദിക്കിന്റെ ഇമേജ് മാറ്റാൻ സിഎസ്‌കെയ്ക്ക് മാത്രമേ സാധിക്കൂ'

വരുന്ന ഐപിഎൽ സീസണിലേക്ക് ചെന്നൈ സൂപ്പർ കിങ്സിന് ഒരു വമ്പൻ ട്രേഡിംഗ് തന്ത്രം ഉപദേശിച്ച് മുൻ സിഎസ്‌കെ താരം സുബ്രഹ്മണ്യം ബദ്രീനാഥ് രംഗത്ത്. മുംബൈ ഇന്ത്യൻസ് താരം ഹാർദിക് പാണ്ഡ്യയെ ചെന്നൈ സൂപ്പർ കിങ്സ് സ്വന്തമാക്കണമെന്നും, അതിനായി സിഎസ്‌കെ തങ്ങളുടെ പ്രധാന താരങ്ങളായ ശിവം ദുബെയെയും ആയുഷ് മാത്രെയെയും മുംബൈയ്ക്ക് ട്രേഡ് ചെയ്യണമെന്നുമാണ് ബദ്രീനാഥ് ആവശ്യപ്പെടുന്നത്.

സഞ്ജു - ഋതുരാജ് - ഹാർദിക്: ചെന്നൈയുടെ പുതിയ കോർ ത്രിമൂർത്തികൾ!

ഹാർദിക് ചെന്നൈയിൽ എത്തിയാൽ ടീമിന്റെ ബ്രാൻഡ് വാല്യൂ മറ്റൊരു തലത്തിലേക്ക് ഉയരുമെന്ന് ബദ്രീനാഥ് വിശ്വസിക്കുന്നു. "ഞാൻ മുംബൈ ഇന്ത്യൻസ് മാനേജ്‌മെന്റിൽ ഉണ്ടെങ്കിൽ, ചെന്നൈ സൂപ്പർ കിങ്സിൽ നിന്നും ശിവം ദുബെയെയും ആയുഷ് മ्हाത്രെയെയും വാങ്ങി പകരം ഹാർദിക് പാണ്ഡ്യയെ ചെന്നൈയ്ക്ക് നൽകും. സഞ്ജു സാംസൺ, ഋതുരാജ് ഗെയ്ക്‌വാദ്, ഹാർദിക് പാണ്ഡ്യ എന്നിവരടങ്ങുന്ന ഒരു കോർ ത്രിമൂർത്തികൾ ( ഒത്തുചേർന്നാൽ അത് സിഎസ്‌കെ എന്ന ബ്രാൻഡിനെ വിസ്മയിപ്പിക്കുന്ന മറ്റൊരു തലത്തിലേക്ക് എത്തിക്കും."

എംഎസ് ധോണിയുമായുള്ള ബന്ധം; ഹാർദിക് ക്യാപ്റ്റനാവട്ടെ!

സഞ്ജു സാംസണെ തന്നെ ചെന്നൈയുടെ ക്യാപ്റ്റനാക്കണം എന്ന് നിർബന്ധമില്ലെന്നും ഹാർദിക് പാണ്ഡ്യ ക്യാപ്റ്റൻ സ്ഥാനം ആവശ്യപ്പെടുകയാണെങ്കിൽ അത് നൽകാൻ സിഎസ്‌കെ തയ്യാറാകണമെന്നും ബദരീനാഥ് കൂട്ടിച്ചേർത്തു.

"സഞ്ജു സാംസണെ തന്നെ സിഎസ്‌കെയുടെ ക്യാപ്റ്റനാക്കണം എന്ന് ഇവിടെ യാതൊരു നിയമവുമില്ല. ഒരുപക്ഷേ ഹാർദിക് പാണ്ഡ്യ ക്യാപ്റ്റൻ സ്ഥാനം ആവശ്യപ്പെടുകയാണെങ്കിൽ, ഞാൻ അവനെ ചെന്നൈയുടെ നായകനാക്കും. കാരണം എംഎസ് ധോണിയുമായി അത്രമേൽ മികച്ചൊരു ബന്ധമാണ് ഹാർദിക്കിനുള്ളത്. കുറഞ്ഞത് മൂന്ന് മികച്ച സീസണുകളെങ്കിലും ഇനിയും ഹാർദിക്കിന്റെ ഉള്ളിലുണ്ട്. ചെന്നൈ ടീമിന് അവിശ്വസനീയമായ ഒരു ബാലൻസ് നൽകാൻ അവന് സാധിക്കും, അവനെ കേന്ദ്രീകരിച്ച് സിഎസ്‌കെയ്ക്ക് ഒരു പുതിയ ടീമിനെ തന്നെ കെട്ടിപ്പടുക്കാം."

ഹാർദിക്കിന്റെ ഇമേജ് മാറ്റാൻ ചെന്നൈയ്ക്ക് സാധിക്കും

മറ്റ് ഫ്രാഞ്ചൈസികളെക്കാൾ ഹാർദിക് പാണ്ഡ്യയ്ക്ക് ഏറ്റവും അനുയോജ്യം ചെന്നൈ സൂപ്പർ കിങ്സ് ആയിരിക്കുമെന്നും ബദരീനാഥ് ചൂണ്ടിക്കാണിക്കുന്നു.

"മറ്റ് ടീമുകളിലേക്ക് പോകുന്നതിനേക്കാൾ ഹാർദിക് പാണ്ഡ്യയ്ക്ക് ഗുണം ചെയ്യുക ചെന്നൈ സൂപ്പർ കിങ്സിൽ എത്തുന്നതാണ്. കാരണം ഒരു കളിക്കാരന്റെ ഇമേജ് ഏറ്റവും മികച്ച രീതിയിലേക്ക് മാറ്റിയെടുക്കാൻ സിഎസ്‌കെയ്ക്ക് പ്രത്യേക കഴിവുണ്ട്. ഐപിഎൽ 2027-ൽ (IPL 2027) ഹാർദിക് പാണ്ഡ്യ ചെന്നൈ സൂപ്പർ കിങ്സിന്റെ മഞ്ഞക്കുപ്പായത്തിൽ കളിക്കുമെന്നാണ് ഞാൻ പ്രതീക്ഷിക്കുന്നത്." ബദ്രീനാഥ് പറഞ്ഞു നിർത്തി.

മുംബൈ ഇന്ത്യൻസിൽ ആരാധകരുടെ ഭാഗത്ത് നിന്നും കടുത്ത വിമർശനങ്ങൾ നേരിടേണ്ടി വന്ന ഹാർദിക് പാണ്ഡ്യ, ബദരീനാഥ് നിർദ്ദേശിച്ചതുപോലെ ധോണിയുടെയും ചെന്നൈയുടെയും തണലിലേക്ക് മാറുമോ എന്നത് വരും ദിവസങ്ങളിൽ ക്രിക്കറ്റ് ലോകം ഉറ്റുനോക്കുന്ന ഒന്നായിരിക്കും.