ഇംഗ്ലണ്ടിനെതിരേയുള്ള മൂന്നാം ഏകദിന മല്സരത്തില് ഇന്ത്യക്കു മികച്ച തുടക്കം നല്കിയതോടെ വമ്പന് നേട്ടത്തിന് അവകാശികളായിരിക്കുകയാണ് രോഹിത് ശര്മ- ശിഖര് ധവാന് സഖ്യം. ഏകദിനത്തില് ഏറ്റവുമധികം സെഞ്ച്വറി കൂട്ടുകെട്ടുകളുണ്ടാക്കിയ ലോകത്തിലെ രണ്ടാമത്തെ ഓപ്പണിങ് ജോടിയായി ഇവര് മാറി. 17ാം തവണയാണ് രോഹിത്- ധവാന് സഖ്യം ഇന്ത്യക്കു വേണ്ടി സെഞ്ച്വറിക്കു കൂട്ടുകെട്ട് പടുത്തുയര്ത്തിയത്.
ഓസ്ട്രേലിയയുടെ മുന് ഇതിഹാസ ജോടികളായ ആദം ഗില്ക്രിസ്റ്റ്- മാത്യു ഹെയ്ഡന് എന്നിവരെ പിന്തള്ളിയിരിക്കുകയാണ് രോഹിത്- ധവാന് സഖ്യം. ഇന്ത്യ- ഇംഗ്ലണ്ട് മൂന്നാം ഏകദിനത്തിനു മുമ്പ് ഗില്ലി-ഹെയ്ഡന് സഖ്യത്തോടൊപ്പം രണ്ടാംസ്ഥാനം പങ്കിടുകയായിരുന്നു ഇന്ത്യന് ജോടി. എന്നാല് ഈ മല്സരത്തില് ഓപ്പണിങ് വിക്കറ്റില് 103 റണ്സെടുത്തതോടെ രോഹിത്- ധവാന് സഖ്യം രണ്ടാംസ്ഥാനത്തേക്കുയരുകയായിരുന്നു.
ഇനി ഇന്ത്യയുടെ തന്നെ മുന് സ്വപ്ന ജോടികളായ സച്ചിന് ടെണ്ടുല്ക്കര്- സൗരവ് ഗാംഗുലി സഖ്യം മാത്രമേ രോഹിത്- ധവാന് ജോടിക്കു മുന്നിലുള്ളൂ. 21 തവണയാണ് ഇവര് ഏകദിനത്തില് സെഞ്ച്വറി കൂട്ടുകെട്ടുണ്ടാക്കിയിട്ടുള്ളത്. ഈ സഖ്യത്തിനൊപ്പമെത്താന് രോഹിത്- ധവാന് ജോടിക്കു ഇനി നാലു സെഞ്ച്വറി കൂട്ടുകെട്ടുകള് കൂടി മതി.
ഏകദിനത്തിലെ ഏറ്റവുമധികം സെഞ്ച്വറി കൂട്ടുകെട്ടുകളുണ്ടാക്കിയ ഓപ്പണിങ് ജോടികളുടെ ലിസ്റ്റെടുത്താല് ടോപ്പ് ഫോറില് രണ്ടും ഇന്ത്യന് സഖ്യങ്ങളാണെന്നത് അഭിമാനിക്കാന് വക നല്കുന്നു. 15 സെഞ്ച്വറി കൂട്ടുകെട്ടുകളുമായി വെസ്റ്റ് ഇന്ഡീസിന്റെ ജോര്ഡന് ഗ്രീനിഡ്ജ്- ഡെസ്മണ്ട് ഹെയ്ന്സ് സഖ്യമാണ് ലിസ്റ്റില് നാലാംസ്ഥാനത്ത്.
അതേസമയം, ഏകദിനത്തില് 5000 റണ്സ് പൂര്ത്തിയാക്കിയ സഖ്യമെന്ന നേട്ടവും രോഹിത്-ധവാന് ജോടിയെ തേടിയെത്തി. ഈ നേട്ടം കൈവരിച്ച ലോക ക്രിക്കറ്റിലെ ഏഴാമത്തെയും ഇന്ത്യയുടെ രണ്ടാമത്തെയും സഖ്യമാണിത്. 8227 റണ്സോടെ സച്ചിന്- ഗാംഗുലി ജോടിയാണ് ലിസ്റ്റില് ഒന്നാമത്. ശ്രീലങ്കയുടെ മഹേല ജയവര്ധനെ- കുമാര് സങ്കക്കാര (5992), തിലകരത്നെ ദില്ഷന്- കുമാര് സങ്കക്കാര (5475), മര്വന് അട്ടപ്പട്ടു- സനത് ജയസൂര്യ (5462) എന്നിവരാണ് രണ്ടു മുതല് നാലു വരെ സ്ഥാനങ്ങളില്. ഓസ്ട്രേലിയയുടെ ആദം ഗില്ക്രിസ്റ്റ്- മാത്യു ഹെയ്ഡന് സഖ്യം (5409), വിന്ഡീസിന്റെ ഡെസ്മണ്ട് ഹെയ്ന്സ്- ജോര്ഡന് ഗ്രീനിഡ്ജ് (5206) സഖ്യം ആറാമതും നില്ക്കുന്നു.
ഇംഗ്ലണ്ടിനെതിരേയുള്ള മൂന്നാം ഏകദിനത്തില് രോഹിത് പുറത്തായതോടെയാണ് ഓപ്പണിങ് സഖ്യം വേര്പിരിഞ്ഞത്. സ്പിന്നര് ആദില് റഷീദിന്റെ ഗൂഗ്ലിയില് രോഹിത് ബൗള്ഡാവുകയായിരുന്നു. 37 ബോളില് ആറു ബൗണ്ടറികളോടെ 37 റണ്സെടുത്താണ് ഹിറ്റ്മാന് മടങ്ങിയത്.