രോഹിത്തിന് കടുത്ത നിരാശ; പുറത്തല്ലെന്ന് തെളിയിക്കുന്ന ചിത്രവുമായി താരം

മൂന്നാം അമ്പയറിന്റെ തീരുമാനം

മൂന്നാം അമ്പയറാണ് രോഹിത് പുറത്തായതായി വിധിക്കുന്നത്. റീപ്ലേയില്‍ പന്ത് ബാറ്റില്‍ കടന്നുപോകുമ്പോള്‍ ശബ്ദം കേള്‍ക്കുന്നുണ്ട്. എന്നാല്‍, പന്ത് ബാറ്റിലും പാഡിലും ഒരേസമയത്താണ് കടന്നു പോകുന്നത്. ഇത്തരമൊരു സാഹചര്യത്തില്‍ മൂന്നാം അമ്പയര്‍ ദീര്‍ഘനേരം പരിശോധിച്ച ശേഷമേ പുറത്താകല്‍ സ്ഥിരീകരിക്കൂ. എന്നാല്‍, രോഹിത് പുറത്താണെന്ന് മൂന്നാം അമ്പയര്‍ മൈക്കിള്‍ ഗഫ് ഉടനടി വിധിക്കുകയും ചെയ്തു.

പുറത്തല്ലെന്ന് രോഹിത്തിന്റെ തെളിവ്

തനിക്ക് നീതി ലഭിച്ചില്ലെന്ന് തെളിയിക്കുന്ന ചിത്രമാണ് ഇപ്പോള്‍ രോഹിത് ട്വിറ്ററില്‍ പോസ്റ്റ് ചെയ്തത്. പന്ത് പാഡില്‍ ഉരസുമ്പോള്‍ ബാറ്റുമായി ഏറെ അകലമുണ്ടെന്ന് രോഹിത്തിന്റെ ചിത്രം തെളിയിക്കുന്നു. ഇതോടെ അമ്പയറുടെ തീരുമാനം തെറ്റാണെന്ന അനുമാനത്തിലാണ് ക്രിക്കറ്റ് ആരാധകര്‍. കഴിഞ്ഞദിവസം തന്നെ രോഹിത്തിന്റെ പുറത്താകല്‍ ഏറെ വിവാദമുണ്ടാക്കിയിരുന്നു.

രോഹിത്തിനെ അനുകൂലിച്ച് ബ്രാഡ് ഹോഗ്ഗും

മുന്‍ ഓസീസ് താരം ബ്രാഡ് ഹോഗ്ഗും രോഹിത് പുറത്തല്ലെന്ന നിലപാടുകാരനാണ്. സാങ്കേതിക വിദ്യ ഇത്രയധികം പുരോഗമിച്ചിട്ടും അമ്പയര്‍ക്ക് ശരിയായ തീരുമാനം എടുക്കാന്‍ സാധിച്ചില്ലെന്ന് ഹോഗ്ഗ് പറഞ്ഞു. അഫ്ഗാനിസ്ഥാനെതിരെ കാര്യമായി സ്‌കോര്‍ ചെയ്യാന്‍ കഴിയാതിരുന്ന രോഹിത്തിന് വിന്‍ഡീസിനെതിരെ തിളങ്ങാന്‍ സാധിക്കുമായിരുന്നു. എന്നാല്‍, അമ്പയറുടെ തെറ്റായ തീരുമാനം രോഹിത്തിന് തിരിച്ചടിയായി.