കോലി ദുരന്തം ക്യാപ്റ്റന്‍!! അവരുടെ ഏഴയലത്ത് എത്തില്ല... കടന്നാക്രമിച്ച് വീണ്ടും ഗംഭീര്‍

കോലി അവര്‍ക്കൊപ്പമെത്തില്ല

ഐപിഎല്‍ ക്യാപ്റ്റന്‍സി പരിഗണിക്കുമ്പോള്‍ ചെന്നൈ സൂപ്പര്‍ കിങ്‌സ് നായകന്‍ എംഎസ് ധോണി, മുംബൈ ഇന്ത്യന്‍സ് നായകന്‍ രോഹിത് ശര്‍മ എന്നിവര്‍ക്കൊപ്പമെത്താന്‍ കോലിക്കാവില്ലെന്നു ഗംഭീര്‍ ചൂണ്ടിക്കാട്ടി. രോഹിത്തിനു കീഴില്‍ മുംബൈ നാല് ഐപിഎല്‍ ട്രോഫികളും ധോണിയുടെ ക്യാപ്റ്റന്‍സിയില്‍ ചെന്നൈ മൂന്നു കിരീടങ്ങളും നേടിയിട്ടുണ്ട്.
ഇത്തവണത്തെ ഫൈനലില്‍ ചെന്നൈയെ ഒരു റണ്‍സിനു തോല്‍പ്പിച്ചാണ് മുംബൈ തങ്ങളുടെ നാലാം കിരീടം കൈക്കലാക്കിയത്. ഇതോടെ ഏറ്റവുമധികം തവണ ജേതാക്കളായ ടീമായി മുംബൈ മാറുകയും ചെയ്തിരുന്നു.

രോഹിത് കേമന്‍ തന്നെ

രോഹിത്തിന്റെ ക്യാപ്റ്റന്‍സിയെ ഗംഭീര്‍ പ്രശംസിച്ചു. രോഹിത് വളരെ മികച്ച ക്യാപ്റ്റനാണ്. ഐപിഎല്ലിനെക്കുറിച്ചു പറയുകയാണെങ്കില്‍ നാലു ട്രോഫികള്‍ ഇതിനകം അദ്ദേഹം ഏറ്റുവാങ്ങിക്കഴിഞ്ഞു.
ടൂര്‍ണമെന്റിലെ ഏറ്റവും മികച്ച നായകനും അദ്ദേഹം തന്നെ. ഏഷ്യാ കപ്പില്‍ ഇന്ത്യയെയും ജേതാക്കളാക്കിയത് രോഹിത്താണെന്നു ഗംഭീര്‍ ചൂണ്ടിക്കാട്ടി.
ക്യാപ്റ്റന്‍സി താരതമ്യം ചെയ്യുകയാണെങ്കില്‍ കോലിക്കും മുകളിലായിരിക്കും രോഹിത്തിന്റെ സ്ഥാനമെന്നും അദ്ദേഹം പറഞ്ഞു.

താരതമ്യം അര്‍ഹിക്കുന്നില്ല

രോഹിത്, ധോണി എന്നിവരുമായി കോലിയെ താരതമ്യം ചെയ്യുന്നതു പോലും ശരിയല്ലെന്നു ഗംഭീര്‍ പറഞ്ഞു. ഐപിഎല്ലില്‍ യഥാക്രമം നാലും മൂന്നും ട്രോഫികള്‍ ഏറ്റുവാങ്ങിയിട്ടുള്ള നായകന്‍മാരാണ് ഇരുവരും. കോലിയാവട്ടെ ഇക്കാര്യത്തില്‍ വട്ടപ്പൂജ്യവുമാണ്. അതുകൊണ്ടു തന്നെ ക്യാപ്റ്റന്‍സി വിലയിരുത്തിയാല്‍ കോലി ഈ രണ്ടു പേരേക്കാളും ഏറെ പിറകിലാണ്. ഐപിഎല്ലിലെ ക്യാപ്റ്റന്‍മാര്‍ക്കു മാര്‍ക്കിട്ടാല്‍ തലപ്പത്ത് രോഹിത്തായിരിക്കും. ഇതു രാജ്യം മുഴുവന്‍ അറിയുന്ന കാര്യമാണെന്നും ഗംഭീര്‍ വിശദമാക്കി.