ആധുനിക ട്വന്റി20യിലെ വിജയതന്ത്രമെന്ത്? അത് ഇവരെ ആശ്രയിച്ചിരിക്കുമെന്ന് റിക്കി പോണ്ടിങ്

ലെഗ് സ്പിന്നര്‍മാര്‍ കളി നിയന്ത്രിക്കും

ആധുനിക ട്വന്റി20യിലെ താരങ്ങള്‍ വെടിക്കെട്ട് ബാറ്റ്‌സ്മാന്‍മാരെ സൂപ്പര്‍ ഫാസ്റ്റ് ബൗളര്‍മാരോ അല്ല. അത് ലെഗ് സ്പിന്നര്‍മാരാണെന്നാണ് പോണ്ടിങ് പറയുന്നത്. മത്സരത്തിന്റെ ഗതിനിര്‍ണ്ണയിക്കുന്നതില്‍ ഇവരുടെ പങ്ക് നിര്‍ണ്ണായകമാണ്. പൊതുവേ കൂറ്റന്‍ ഷോട്ട് കളിക്കുന്ന ട്വന്റികളില്‍ ഇവര്‍ക്ക് വിക്കറ്റ് സാദ്ധ്യത കൂടുതലാണ്. അതിനാല്‍ മികച്ച ലെഗ് സ്പിന്നര്‍മാരെ ടീമിലെത്തിക്കാനാണ് ഫ്രാഞ്ചൈസികള്‍ മത്സരിക്കുന്നത്.

ഐ.പി.എല്‍ ചരിത്രം ഇത് വ്യക്തമാക്കുന്നു

ട്വന്റി20യുടെ ഏറ്റവും വിജയകരമായ രൂപമാണ് ഐ.പി.എല്‍. ഇതില്‍ ലെഗ്‌സ്പിന്നര്‍മാരുടെ പ്രകടനം വിലയിരുത്തിയാല്‍ നമുക്ക് ഇത് മനസ്സിലാവുമെന്നും പോണ്ടിങ് പറയുന്നു. ഇന്ത്യന്‍ പ്രീമിയര്‍ ലീഗിന്റെ തുടക്ക സീസണില്‍ കൂടുതല്‍ ശ്രദ്ധ നേടിയതും ലെഗ് സ്പിന്നര്‍മാരാണ്. അനില്‍ കുംബ്ലെ,ഷെയ്ന്‍ വോണ്‍,ഷാഹിദ് അഫ്രീദി എന്നിവരുടെ ബൗളിങ് ഐ.പി.എല്ലിലെ ബൗളിങ് റെക്കോഡുകള്‍ പരിശോധിക്കുമ്പോള്‍ മനസ്സിലാവും അവര്‍ എത്രമാത്രം കളിയില്‍ വിലപ്പെട്ടതാണെന്ന്. രാജസ്ഥാന്‍ പ്രഥമ സീസണില്‍ കിരീടമുയര്‍ത്തിയപ്പോള്‍ ഷെയ്ന്‍ വോണിന്റെ സ്പിന്‍ ബൗളിങ് നിര്‍ണ്ണായക പങ്കുവഹിച്ചിരുന്നു.

അമിത് മിശ്രയുടെ ബൗളിങ്

39 ലെഗ് സ്പിന്നേഴ്‌സാണ് ഐ.പി.എല്ലില്‍ കളിച്ചത്. ഇതില്‍ ഏറ്റവും നേട്ടം കൊയ്ത ലെഗ് സ്പിന്നര്‍ അമിത് മിശ്രയാണ്. ഐ.പി.എല്ലില്‍ മൂന്ന് തവണ ഹാട്രിക്ക് നേടിയിട്ടുള്ള സ്പിന്നറാണ് മിശ്ര. 136 മത്സരങ്ങളില്‍ നിന്ന് 146 വിക്കറ്റാണ് മിശ്ര വീഴിത്തിയത്. മറ്റൊരു ലെഗ് സ്പിന്നറായ പീയൂഷ് ചൗളയെ നോക്കുക. കിങ്‌സ് ഇലവന്‍ പഞ്ചാബ്,കൊല്‍ക്കത്ത നൈറ്റ് റൈഡേഴ്‌സ് ടീമിനുവേണ്ടി 144 മത്സരത്തില്‍ നിന്ന് 140 വിക്കറ്റാണ് ചൗള വീഴ്ത്തിയത്. ഇന്ത്യയുടെ നിലവിലെ സൂപ്പര്‍ സ്പിന്നറായ യുസ്‌വേന്ദ്ര ചാഹലിനെ നോക്കുക. 70 മത്സരത്തില്‍ നിന്ന് 82 വിക്കറ്റുകള്‍ ചാഹല്‍ വീഴ്ത്തിക്കഴിഞ്ഞു. ഇവരുള്‍പ്പെടുന്ന ലെഗ് സ്പിന്നേഴ്‌സിന്റെ പ്രകടനങ്ങള്‍ ടീമിന്റെ ജയത്തില്‍ നിര്‍ണ്ണായകമാണ്. ഇതിന്റെ ഭാഗമായി ഡല്‍ഹി ടീമിലും സ്പിന്‍ ബൗളര്‍മാര്‍ക്ക് മുഖ്യ പ്രാധാന്യമാണ് നല്‍കുന്നത്.