വിരാട് കോലി
റെക്കോര്ഡുകള് തിരുത്തുന്നത് ശീലമാക്കി മാറ്റിയ ഇന്ത്യന് നായകന് വിരാട് കോലി മെല്ബണില് വീണ്ടും റെക്കോര്ഡിടാമെന്ന ശുഭപ്രതീക്ഷയിലാണ്. ഈ വര്ഷം മൂന്നു ഫോര്മാറ്റുകളിലുമായി 2653 റണ്സ് അദ്ദേഹം ഇതിനകം നേടിക്കഴിഞ്ഞു.
216 റണ്സ് കൂടി നേടിയാല് ഒരു കലണ്ടര് വര്ഷത്തില് ഏറ്റവുമധികം റണ്സെന്ന ശ്രീലങ്കന് ഇതിഹാസം കുമാര് സങ്കക്കാരയുടെ റെക്കോര്ഡ് തിരുത്താന് കോലിക്കാവും.
ഇതു മാത്രമല്ല ഓസ്ട്രേലിയയില് കൂടുതല് സെഞ്ച്വറികളെന്ന ഇതിഹാസ താരം സച്ചിന് ടെണ്ടുല്ക്കറുടെ റെക്കോര്ഡിനൊപ്പമെത്താന് കോലിക്ക് ഒരു സെഞ്ച്വറി കൂടി മതി. നിലവില് 11 സെഞ്ച്വറികളാണ് ഇന്ത്യന് നായകന്റെ അക്കൗണ്ടിലുള്ളത്.
നതാന് ലിയോണ്
ഈ ടെസ്റ്റ് പരമ്പരയിലെ ആദ്യ രണ്ടു ടെസ്റ്റുകളിലും ഓസീസ് ബൗളിങ് ആക്രമണത്തിന്റെ കുന്തമുനയായിരുന്നു സ്പിന്നര് നതാന് ലിയോണ്. നാട്ടില് ഇന്ത്യക്കെതിരേ ടെസ്റ്റില് കൂടുതല് വിക്കറ്റുകള് നേടിയ സ്പിന്നറെന്ന റെക്കോര്ഡിനൊപ്പമെത്താന് അദ്ദേഹത്തിന് 13 വിക്കറ്റുകള് കൂടിയാണ് വേണ്ടത്. നിലവിലെ റെക്കോര്ഡ് റിച്ചി ബെനൗഡിന്റെ പേരിലാണ്.
മിച്ചെല് സ്റ്റാര്ക്ക്
ഓസ്ട്രലിയയുടെ സ്റ്റാര് പേസറായ മിച്ചെല് സ്റ്റാര്ക്ക് ടെസ്റ്റില് 200 വിക്കറ്റുകളെന്ന നാഴികക്കല്ലിന് തൊട്ടരികിലാണ്. മെല്ബണില് നാലു വിക്കറ്റുകള് കൂടി നേടിയാല് അദ്ദേഹത്തിന് 200 വിക്കറ്റ് ക്ലബ്ബില് അംഗമാവാം. മെല്ബണില് അതിനു കഴിഞ്ഞാല് വേഗത്തില് 200 വിക്കറ്റെടുത്ത ഏഴാമത്തെ ഓസീസ് പേസറായി സ്റ്റാര്ക്ക് മാറും.
മാത്രമല്ല കഴിഞ്ഞ 10 വര്ഷത്തിനിടെ ലോക ക്രിക്കറ്റില് വേഗത്തില് 200 വിക്കറ്റ് തികച്ച മൂന്നാമത്തെ താരമെന്ന നേട്ടത്തിനും അദ്ദേഹം അവകാശിയാവും. പാകിസ്താന്റെ യാസിര് ഷാ, ഇന്ത്യയുടെ ആര് അശ്വിന് എന്നിവരാണ് ആദ്യ രണ്ടു സ്ഥാനങ്ങളിലുള്ളത്.