ഫൈനലില് കടക്കും
നിര്ണായകമായ അവസാന സൂപ്പര് ഫോര് മല്സരത്തില് ബംഗ്ലാദേശിനെ പരാജയപ്പെടുത്തി പാകിസ്താന് ഫൈനലില് കടക്കുമെന്ന് തനിക്കുറപ്പുള്ളതായി പാക് കോച്ച് മിക്കി ആര്തര് വ്യക്തമാക്കി. പാകിസ്താന് അതിനു സാധിക്കുമെന്ന് തനിക്കുറപ്പുണ്ട്. ഇന്ത്യക്കെതിരായ തൊട്ടുമുമ്പത്തെ കളിയിലെ തോല്വിയില് നിന്നും ടീം പാഠമുള്ക്കൊണ്ടതായും അദ്ദേഹം കൂട്ടിച്ചേര്ത്തു.
പാകിസ്താന് കണക്കുതീര്ക്കും
ബംഗ്ലാദേശിനെ തോല്പ്പിച്ച് പാകിസ്താന് ഫൈനലിലെത്തുമെന്നും തുടര്ന്നു ടൂര്ണമെന്റില് അവരോടേറ്റ രണ്ടു തോല്വികള്ക്കും കണക്കുതീര്ക്കുമെന്നും ആര്തര് വ്യക്തമാക്കി.
ഗ്രൂപ്പുഘട്ടത്തില് എട്ടു വിക്കറ്റിനും സൂപ്പര് ഫോറില് ഒമ്പത് വിക്കറ്റിനുമാണ് പാകിസ്താന് ഇന്ത്യക്കു മുന്നില് തകര്ന്നടിഞ്ഞത്.
ഇന്ത്യ നിഷ്പ്രഭരാക്കി
പാകിസ്താനെ നിഷ്പ്രഭരാക്കുന്ന പ്രകടനമാണ് ഇന്ത്യ കാഴ്ചവച്ചതെന്നു ആര്തര് സമ്മതിച്ചു. ഇന്ത്യന് ബൗളിങ് നിരയെ സമ്മര്ദ്ദത്തിലാക്കാന് തങ്ങളുടെ ബാറ്റ്സ്മാന്മാര്ക്കായില്ല. ഇന്ത്യക്കെതിരേ തുടക്കത്തില് തന്നെ വിക്കറ്റ് വീഴ്ത്തിയാല് വിജയസാധ്യതയുണ്ടായിരുന്നു. എന്നാല് ഫീല്ഡിങിലെ ചില പിഴവുകള് ടീമിന് തിരിച്ചടിയായെന്നും ആര്തര് വിശദമാക്കി.