ലോകകപ്പ്: കുതിപ്പ് തുടരാന്‍ പാകിസ്താന്‍...... അവസാന പോരാട്ടത്തിന് അഫ്ഗാനിസ്ഥാന്‍

പാകിസ്താന് വേണം ജയം

സെമി ഫൈനല്‍ സാധ്യത സജീവമാക്കാന്‍ പാകിസ്താന് അഫ്ഗാനെതിരെ ജയം അത്യാവശ്യമാണ്. അവസാന മത്സരം ബംഗ്ലാദേശിനെതിരെയാണ്. അതില്‍ കൂടി വിജയിച്ചാല്‍ പാകിസ്താന് സെമി ഉറപ്പിക്കാം. പക്ഷേ ഇംഗ്ലണ്ട് അവസാന രണ്ട് മത്സരങ്ങളില്‍ തോല്‍ക്കുകയും വേണം. പാകിസ്താന് ബാറ്റിംഗ് നിരയുടെ ഫോമാണ് ആശ്വാസം നല്‍കുന്നത്. ബാബര്‍ അസമിന്റെ ഗംഭീര ഫോമും പ്രതീക്ഷയാണ്. ഹാരിസ് സൊഹൈലിന്റെ വരവും ടീമിന് പ്രതീക്ഷ നല്‍കിയിരിക്കുകയാണ്.

അഫ്ഗാന് തിരിച്ചടിക്കുമോ

അഫ്ഗാനിസ്ഥാന്‍ ടൂര്‍ണമെന്റില്‍ നിന്ന് നേരത്തെ തന്നെ പുറത്തായ ടീമാണ്. ഇതുവരെ ഇന്ത്യക്കെതിരെ നടത്തിയ പോരാട്ടമാണ് അഫ്ഗാന് ഓര്‍ത്തുവെക്കാനുള്ളത്. ബാറ്റിംഗ് നിരയ്ക്ക് വലിയ ഇന്നിംഗ്‌സുകള്‍ കളിക്കാന്‍ സാധിക്കാത്തത് വലിയ പ്രതിസന്ധിയാണ്. ഗുല്‍ബാദിന്‍ നയിബ്, അസ്ഗര്‍ അഫ്ഗാന്‍, മുഹമ്മദ് നബി, ഹസ്രത്തുള്ള സസായ് എന്നിവര്‍ വലിയ ഇന്നിംഗ്‌സുകള്‍ കളിക്കുമെന്ന പ്രതീക്ഷയിലാണ് അഫ്ഗാനിസ്ഥാന്‍.

ബൗളിംഗ് കരുത്ത്

പാകിസ്താന്റെ ബൗളിംഗ് നിര ടൂര്‍ണമെന്റിലെ ഏറ്റവും ശക്തമായ നിരയാണ്. മുഹമ്മദ് ആമിര്‍ വിക്കറ്റ് വേട്ടക്കാരിലും മുന്നിലാണ്. ഷഹീന്‍ അഫ്രീദി ഫോം കണ്ടെത്തിയത് അപ്രതീക്ഷിതമാണ്. വഹാബ് റിയാസും ഷദാബ് ഖാനും ബൗളിംഗിന് മൂര്‍ച്ച കൂട്ടുന്നു. അതേസമയം അഫ്ഗാന്‍ സ്പിന്‍ ബൗളിംഗിലാണ് പ്രതീക്ഷ പുലര്‍ത്തുന്നത്. റാഷിദ് ഖാന്‍, മുഹമ്മദ് നബി, മുജീബ് റഹ്മാന്‍ എന്നിവര്‍ നല്ല ഫോമിലാണ് കളിക്കുന്നത്.

പാകിസ്താന്‍ മുന്‍തൂക്കം

പാകിസ്താന് മത്സരത്തില്‍ വ്യക്തമായ മുന്‍തൂക്കമുണ്ട്. ദക്ഷിണാഫ്രിക്ക, ന്യൂസിലന്റ് ടീമുകളോടുള്ള പാകിസ്താന്റെ ജയം ആധികാരികമായിരുന്നു. ടൂര്‍ണമെന്റില്‍ തോല്‍വി അറിയാതെ വന്ന ടീമിനെയാണ് പാകിസ്താന്‍ പരാജയപ്പെടുത്തിയത്. ഫഖര്‍ സമാനും ഇമാം ഉള്‍ഹക്കും ചേര്‍ന്ന ഓപ്പണിംഗ് സഖ്യം മികച്ച തുടക്കം പാകിസ്ാന്‍ നല്‍കുന്നുണ്ട്. ഭയപ്പെട്ടിരുന്ന മധ്യനിര മികവിലേക്കുയര്‍ന്നതും പാകിസ്താന്റെ ആശങ്ക ഇല്ലാതാക്കിയിരിക്കുകയാണ്.