ഇറങ്ങിയത് കര്ണാടകയ്ക്കെതിരേ
കര്ണാടകയ്ക്കെതിരായ സൂപ്പര് ലീഗിലെ ഗ്രൂപ്പ് ബി മല്സരത്തിലാണ് വിദര്ഭയ്ക്കു വേണ്ടി ഉമേഷ് ഇന്നിങ്സ് ഓപ്പണ് ചെയ്യാനെത്തിയത്. അതര്വ ടെയ്ഡായിരുന്നു താരത്തിന്റെ ഓപ്പണിങ് പങ്കാളി.
നേരിട്ട ആദ്യ പന്തില് തന്നെ ബൗണ്ടറിയുമായാണ് ഉമേഷ് തുടങ്ങിയത്. എന്നാല് തൊട്ടടുത്ത പന്തില് താരം പുറത്താവുകയും ചെയ്തു. വിനയ് കുമാറിന്റെ ബൗളിങില് ഉമേഷിനെ കൗശിക്ക് പിടികൂടുകയായിരുന്നു.
ഉമേഷിന്റെ കരിയറില് ഇതാദ്യം
മികച്ച സ്വിങ് ബൗളറെന്ന നിലയില് ശ്രദ്ധേയനായ ഉമേഷ് കരിയറിലാദ്യമായാണ് ഒരു മല്സരത്തില് ഓപ്പണിങ് ബാറ്റ്സ്മാനായി ഇറങ്ങിയത്. ബാറ്റിങില് ആദ്യ അഞ്ചു സ്ഥാനങ്ങളില്പ്പോലും ഇതുവരെ അദ്ദേഹം പരീക്ഷിക്കപ്പെട്ടിട്ടില്ല.
ഉമേഷില് നിന്നും അതിവേഗ തുടക്കം ടീമിന് ലഭിക്കുമെന്ന കണക്കുകൂട്ടലിലാണ് വിദര്ഭ ഈ പരീക്ഷണത്തിന് മുതിര്ന്നത്. എന്നാല് ഇന്നിങ്സിലെ നാലാം പന്തില് തന്നെ വെറും നാലു റണ്സിന് ഉമേഷ് പുറത്താതോടെ വിദര്ഭയുടെ നീക്കം പാളുകയും ചെയ്തു.
വിദര്ഭയ്ക്കു തോല്വി
ഉമേഷിനെ വച്ച് നടത്തിയ പരീക്ഷണം ഫ്ളോപ്പാവുക മാത്രമല്ല മല്സരത്തില് കര്ണാടകയോട് വിദര്ഭ തോല്ക്കുകയും ചെയ്തു. ആറു വിക്കറ്റിനാണ് കര്ണാടക ജയിച്ചു കയറിയത്. ഇതോടെ കര്ണാടക ഫൈനലിലും ഇടംനേടി. മഹാരാഷ്ട്രയാണ് ഫൈനലില് കര്ണാടകയുടെ എതിരാളി.
ആദ്യം ബാറ്റ് ചെയ്ത വിദര്ഭ നിശ്ചിത 20 ഓവറില് ഏഴു വിക്കറ്റിന് 138 റണ്സാണ് നേടിയത്. അപൂര്വ്വ വംഖാഡെയാണ് (56) ടീമിന്റെ ടോപ്സ്കോറര്. മറുപടിയില് നാലു പന്തും ആറു വിക്കറ്റും ശേഷിക്കെ കര്ണാടക ലക്ഷ്യത്തിലെത്തി. ക്യാപ്റ്റന് മനീഷ് പാണ്ഡെ 49 റണ്സുമായി പുറത്താവാതെ നിന്നു.