Click it and Unblock the Notifications
രാഹുലിന്റെ പ്രതിഭയില്‍ വിശ്വാസം
രാഹുലിന്റെ പ്രതിഭയില്‍ ഇപ്പോഴും തനിക്കു പൂര്‍ണ വിശ്വാസമുണ്ടെന്ന് ദ്രാവിഡ് വ്യക്തമാക്കി. ഇംഗ്ലണ്ട് ലയണ്‍സിനെതിരായ കഴിഞ്ഞ മല്‍സരത്തില്‍ ആദ്യ പന്തില്‍ തന്നെ അദ്ദേഹം പുറത്തായി. പക്ഷെ രാഹുലില്‍ തനിക്ക് ഇപ്പോഴും പ്രതീക്ഷ നഷ്ടപ്പെട്ടിട്ടില്ല.
മികച്ച കഴിവുള്ള കളിക്കാരന്‍ തന്നെയാണ് അദ്ദേഹം. ഇനി ഇന്ത്യ എയ്‌ക്കൊപ്പം ചതുര്‍ദിന മല്‍സരങ്ങളില്‍ താരം കളിക്കുന്നുണ്ട്. അന്താരാഷ്ട്ര ക്രിക്കറ്റില്‍ മൂന്നു ഫോര്‍മാറ്റിലും തിളങ്ങാനാവുമെന്ന് തെളിയിച്ച താരമാണ് രാഹുലെന്നും ദ്രാവിഡ് കൂട്ടിച്ചേര്‍ത്തു.
മൂന്നു ഫോര്‍മാറ്റിലും സെഞ്ച്വറി
ഏകദിനം, ടെസ്റ്റ്, ട്വന്റി20 തുടങ്ങി മൂന്നു ഫോര്‍മാറ്റിലും സെഞ്ച്വറി നേടിയ താരമാണ് രാഹുല്‍. എല്ലാ ബാറ്റ്‌സ്മാന്‍മാര്‍ക്കുമുള്ള റെക്കോര്‍ഡല്ല ഇത്. പ്രതിഭ തെളിയിച്ചു കഴിഞ്ഞ താരമാണ് അദ്ദേഹം. അതുകൊണ്ടു തന്നെ അദ്ദേഹത്തിന്റെ ഫോമില്‍ തനിക്കു ആശങ്കയില്ലെന്നും ദ്രാവിഡ് പറഞ്ഞു.
ഇംഗ്ലണ്ട് ലയണ്‍സിനെതിരായ അഞ്ചു മല്‍സരങ്ങളുടെ ഏകദിന പരമ്പര 4-1നു സ്വന്തമാക്കിയ ശേഷം മാധ്യമങ്ങളോടു സംസാരിക്കുകയായിരുന്നു ഇന്ത്യന്‍ വന്‍മതില്‍.
എ ടീമില്‍ എന്തിന് സീനിയര്‍ താരങ്ങള്‍
ഇന്ത്യന്‍ സീനിയര്‍ ടീമില്‍ അംഗങ്ങളായ അജിങ്ക്യ രഹാനെ, റിഷഭ് പന്ത്, രാഹുല്‍ എന്നിവരെയും ഇന്ത്യന്‍ എ ടീമില്‍ ഉള്‍പ്പെടുത്തിയതിനെക്കുറിച്ച് ദ്രാവിഡിന്റെ മറുപടി ഇങ്ങനെയായിരുന്നു. ഇന്ത്യന്‍ എ ടീം രണ്ടു കാര്യങ്ങള്‍ ചേര്‍ന്നതാണ്. സീനിയര്‍ ടീമില്‍ നിന്നുള്ള ചില കളിക്കാരും സെലക്ടര്‍മാര്‍ക്കു പ്രതീക്ഷയുള്ള ചില താരങ്ങളുമുള്‍പ്പെടുന്നതാണ് എ ടീം. ഇവരില്‍ ഒരു വിഭാഗത്തെ കുറച്ചു കാലത്തേക്കു മാത്രം ആശ്രയിക്കുമ്പോള്‍ മറ്റു ചിലരെ ദീര്‍ഘകാലത്തേക്കും ഉപയോഗിക്കും. വളരെ സന്തുലിതമാണ് എ ടീമെന്നും ദ്രാവിഡ് വിശദമാക്കി.
