റേസിം​ഗ് ലോകത്തെ ഞെട്ടിച്ച് നിക്കോ റോസ്ബർ​ഗ് വിരമിച്ചു

ലോക ചാമ്പ്യൻ നിക്കോ റോസ്ബർ​ഗ് ഫോർമുല വൺ മത്സരങ്ങളിൽ നിന്ന് വിരമിച്ചു. കരിയറിലെ ആദ്യ ഫോർമുല വൺ ചാമ്പ്യൻ പട്ടം സ്വന്തമാക്കി അഞ്ച് ദിവസങ്ങൾക്ക് ശേഷമാണ് റേസിം​ഗ് ലോകത്തെ ഞെട്ടിച്ച് റോസ്ബർ​ഗ് വിരമിക്കൽ പ്രഖ്യാപനം നടത്തിയത്.

ഇരുപത്തിയഞ്ച് വർഷത്തെ റേസിം​ഗ് കരിയറിൽ ഫോർമുല വൺ ചാമ്പ്യനാകുക എന്നതായിരുന്നു തന്റെ സ്വപ്നമെന്ന് വിരമിക്കൽ പ്രഖ്യാപന കുറുപ്പിൽ റോസ്ബർ​ഗ് പറഞ്ഞു. ആ​ഗ്രഹ സാഫല്യത്തിന്റെ നെറുകയിലാണ് താനിപ്പോൾ. അതുകൊണ്ട് തന്നെ വിരമിക്കാൻ ഇതിനെക്കാൾ മികച്ച സമയമില്ല. ഇനി കുടുംബത്തോടൊപ്പം കൂടുതൽ സമയം ചിലവഴിക്കണം. റോസ്ബർ​ഗ് പറയുന്നു.

സഹതാരം ഹാമിൽട്ടനെ അഞ്ച് പോയിന്റുകൾക്ക് പിന്തള്ളിയായിരുന്നു 31കാരനായ റോസ്ബർ​ഗ് കിരീടം നേടിയത്. നിർണ്ണായകമായ അബുദബി ​ഗ്രാൻപ്രീയിൽ രണ്ടാം സ്ഥാനത്ത് ഫിനിഷ് ചെയ്തതോടെയാണ് മൂന്ന് തവണ ചാമ്പ്യനായ ഹാമിൽ‌ട്ടണെ മറികടക്കാൻ റോസ്ബർ​ഗിന് കഴിഞ്ഞത്. സീസണിലെ 21 ​ഗ്രാൻപ്രീകളിൽ ഒൻപതെണ്ണത്തിൽ റോസ്ബർ​ഗ് ജേതാവായി.

1982ൽ ലോകചാമ്പ്യനായ കെകെയുടെ മകനാണ് നിക്കോ റോസ്ബർ​ഗ്. 2006ൽ വില്യംസൺന്റെ ഡ്രൈവറായിട്ടാണ് ഫോർമുല വൺ അരങ്ങേറ്റം. 2010ലാണ് മെഴ്സിഡസിലെത്തുന്നത്. 2012ൽ ചൈനീസ് ​ഗ്രാൻപ്രീയിൽ ജേതാവായി.

പിന്നീടിങ്ങോട്ട് 22 ​ഗ്രാൻ‌പ്രീ വിജയങ്ങൾ ഈ ജർമ്മൻ താരം സ്വന്തമാക്കി. കഴിഞ്ഞ രണ്ട് സീസണിലും സഹതാരം ലൂയി ​ഹാമിൽട്ടൺന്റെ കുതിപ്പിന് മുന്നിൽ രണ്ടാം സ്ഥാനത്താകാനായിരുന്നു വിധി. ജെൻസൻ ബട്ടൻ, ഫെലിപ് മസ്സ എന്നിവരും ഈ സീസണോടെ ഫോർമുല വണ്ണിനോട് വിട പറഞ്ഞിരുന്നു