പാകിസ്താന് വിജയിക്കണം
പാകിസ്താന് ഈ മത്സരം വിജയിക്കേണ്ട ഒന്നാണ്. ന്യൂസിലന്റിനെ സംബന്ധിച്ച് അങ്ങനെയല്ല. കിവീസ് ഏകദേശം സെമിയിലെത്തിയ ടീമാണ്. അതുകൊണ്ട് തന്നെ തോറ്റാലും പ്രശ്നമില്ല. പാകിസ്താന് ഈ മത്സരം ജയിച്ചാല് സെമി സാധ്യത വര്ധിപ്പിക്കാം. അതേസമയം ബാറ്റിംഗ് നിര ഫോം വീണ്ടെടുത്തതാണ് പാകിസ്താന് പ്രതീക്ഷ നല്കുന്നത്. മികച്ച ബൗളിംഗ് നിരയും ടീമിനൊപ്പമുണ്ട്. ശ്രീലങ്കയും ബംഗ്ലാദേശും സെമിക്കായി ശക്തമായ പോരാട്ടം കാഴ്ച്ചവെക്കുന്നത് കടുത്ത സമ്മര്ദം പാകിസ്താന് നല്കുന്നുണ്ട്.
കൂള് കിവീസ്
ടൂര്ണമെന്റില് ഏറ്റവും കൂളായി കളിക്കുന്ന ടീമാണ് കിവീസ്. ബാറ്റിംഗ് നിരയിലെ എല്ലാവരും ക്ലിക്കായിട്ടില്ലെങ്കിലും പ്രതീക്ഷയുള്ള താരങ്ങളാണ് എല്ലാവരും. കെയ്ന് വില്യംസന്റെ മാരക ഫോമിലാണ് ടീം മുന്നോട്ട് പോകുന്നത്. തുടര്ച്ചയായി രണ്ട് സെഞ്ച്വറിയടിച്ച് വില്യംസണ് ടൂര്ണമെന്റില് മികവ് കാണിച്ചിരിക്കുകയാണ്. റോസ് ടെയ്ലര് സ്ഥിരത കാണിക്കാത്തത് വലിയ പ്രശ്നമായിട്ടില്ല. മാര്ട്ടിന് ഗുപ്ടില്, കോളിന് മണ്റോ എന്നിവരുടെ ഓപ്പണിംഗ് സഖ്യം ക്ലിക്കാവാനാണ് ന്യൂസിലന്റ് ആഗ്രഹിക്കുന്നത്.
ബാറ്റിംഗ് പ്രതീക്ഷ
പാകിസ്താന് ഫഖര് സമാന്, ഇമാം ഉള് ഹക്ക്, ബാബര് അസം, ഹാരിസ് സൊഹൈല് എന്നിവരുടെ ഫോമില് മാരക പ്രതീക്ഷയാണ് ഉള്ളത്. സൊഹൈല് ദക്ഷിണാഫ്രിക്കന് ബൗളര്മാരെ നേരിട്ട രീതിയും മികച്ചതായിരുന്നു. അത്തരമൊരു താരം നാലാം നമ്പറിലോ അഞ്ചാം നമ്പറിലോ അത്തരമൊരു ബാറ്റ്സ്മാന്റെ ആവശ്യം പാകിസ്താനുണ്ടായിരുന്നു. അതേസമയം കിവീസിന് കോളിന് ഗ്രാന്ഡോമിന്റെ ഫോം വളരെ ഗുണം ചെയ്യും. ടോം ലാഥം, ജിമ്മി നീഷാം എന്നീ മിടുക്കരും ടീമിലുണ്ട്.
നേര്ക്കുനേര് പോരാട്ടം
ലോകകപ്പില് നേര്ക്കുനേര് പോരാട്ടത്തില് പാകിസ്താന് ബഹുദൂരം മുന്നിലാണ്. എട്ട് കളിയില് ആറെണ്ണവും ജയിച്ചത് പാകിസ്താനാണ്. ന്യൂസിലന്റ് രണ്ട് മത്സരമാണ് ജയിച്ചത്. ഇത്തവണ പക്ഷേ പാകിസ്താന് കാര്യങ്ങള് എളുപ്പമല്ല. ട്രെന്ഡ് ബൂള്ട്ടും മാറ്റ് ഹെന്റിയും അടങ്ങുന്ന ബൗളിംഗ് നിര മികച്ചതാണ്. അവര്ക്കെതിരെ പിടിച്ച് നില്ക്കണമെങ്കില് മികച്ച ബാറ്റിംഗ് തന്നെ വേണ്ടി വരും. മുഹമ്മദ് ഹഫീസിന്റെ ഫോമും നിര്ണായകമാകും. മറുവശത്ത് മുഹമ്മദ് ആമിര് നയിക്കുന്ന ബൗളിംഗിനെ നേരിടുക കിവീസിനും എളുപ്പമാകില്ല.