ജയിച്ചു, മുംബൈ - രാജസ്ഥാന്‍ ക്വാര്‍ട്ടര്‍ ഫൈനല്‍

By Muralidharan Ak

Published: Saturday, May 24, 2014, 9:23 [IST]

മുംബൈ: ഐ പി എല്‍ ക്രിക്കറ്റ് എന്നാല്‍ മാന്യന്മാരുടെ കളിയാണ് എന്ന് ഇത് കാണുന്നവര് പോയിട്ട് കളിക്കുന്നവര്‍ പോലും കരുതുന്നുണ്ടാവില്ല. രാഹുല്‍ ദ്രാവിഡിനെയും ലക്ഷ്മണെയും കൊണ്ട് പരസ്യം പറയിച്ചാല്‍ മാത്രം കളി മാന്യമാകില്ലെന്ന് ഐ പി എല്‍ ഭരണാധികാരികള്‍ തിരിച്ചറിഞ്ഞേ പറ്റൂ.

ടോസിട്ട ശേഷം പ്രവീണ്‍ കുമാറിന് പരിക്ക് പറ്റി എന്ന് പറഞ്ഞ് പ്രഗ്യാന്‍ ഓജയെ കളിപ്പിക്കാന്‍ തീരുമാനിച്ച മുംബൈ ഇന്ത്യന്‍സും അത് സമ്മതിച്ച മാച്ച് ഓഫീഷ്യലുകളും കളിയുടെ മാന്യതയ്ക്കാണ് വില പറഞ്ഞത്. രണ്ടാമത് ബൗള്‍ ചെയ്യുന്ന അവസ്ഥ മുതലാക്കാന്‍ വേണ്ടി ഫാസ്റ്റ് ബൗളറെ മാറ്റി സ്പിന്നറെ ടീമിലെടുത്ത് ഒരു തട്ടിപ്പ്.

എന്തായാലും ജീവന്മരണ പോരാട്ടത്തില്‍ ദില്ലിക്കെതിരെ മുംബൈ ജയിച്ചു. അവസാന കളിയില്‍ രാജസ്ഥാനെ തോല്‍പിച്ചാല്‍ പ്ലേ ഓഫിലും അവര്‍ക്ക് കളിക്കാം.

ഇതെന്ത് ന്യായം

സച്ചിന്‍, കുംബ്ലെ, പോണ്ടിംഗ്, ജോണ്‍ റൈറ്റ് തുടങ്ങിയ ഇതിഹാസ താരങ്ങള്‍ മെന്റര്‍മാരായുള്ള ടീമാണ് ഈ തീരുമാനമെടുത്തത് എന്നത് ക്രിക്കറ്റിന് തന്നെ മാനക്കേടാണ്.