ധോണിക്ക് സമയമായിട്ടില്ല
ധോണിക്കു വിരമിക്കാന് സമയമായിട്ടില്ലെന്നാണ് മലിങ്കയുടെ അഭിപ്രായം. ഇനിയും ഒന്നോ, രണ്ടോ വര്ഷങ്ങള് കൂടി മല്സരംരംഗത്തു തുടരാന് അദ്ദേഹത്തിനു കഴിയും.
ലോകകപ്പ് പോലുള്ള വലിയ വേദികളില് തന്റെ റോളായ ഫിനിഷറുടേത് ഏറ്റെടുക്കാന് ശേഷിയുള്ള താരങ്ങളെ ധോണി തയ്യാറാക്കേണ്ടതുണ്ട്. നിലവില് ലോക ക്രിക്കറ്റിലെ ഏറ്റവും മികച്ച ഫിനിഷര് ധോണി തന്നെയാണ്. അദ്ദേഹത്തിന് പകരക്കാരനെ ലഭിക്കുക ദുഷ്കരമാണ്. യുവതാരങ്ങള് അദ്ദേഹില് നിന്നും കൂടുതല് പഠിക്കാന് ശ്രമിക്കണമെന്നും മലിങ്ക ആവശ്യപ്പെട്ടു.
ബുംറയെ പ്രശംസിച്ചു
ഇന്ത്യക്കു വേണ്ടി ലോകകപ്പില് ഉജ്ജ്വലമായി പന്തെറിയുന്ന പേസര് ജസ്പ്രീത് ബുംറയെ മലിങ്ക പ്രശംസിച്ചു. ഐപിഎല്ലില് മുംബൈ ഇന്ത്യന്സിലെ ടീമംഗങ്ങളാണ് ഇരുവരും. എട്ടു മല്സരങ്ങളില് നിന്നും 14 വിക്കറ്റുകള് ബുംറ ടൂര്ണമെന്റില് നേടിക്കഴിഞ്ഞു.
സ്വന്തം കഴിവിലുള്ള വിശ്വാസമാണ് ബുംറയുടെ ഏറ്റവും വലിയ കരുത്തെന്ന് മലിങ്ക ചൂണ്ടിക്കാട്ടി. സമ്മര്ദ്ദ ഘട്ടങ്ങളെ മറികടക്കാന് അദ്ദേഹത്തെ സഹായിക്കുന്നതും ഇതു തന്നെയാണെന്ന് ലങ്കന് പേസര് പറയുന്നു. എന്തു സമ്മര്ദ്ദം? സമ്മര്ദ്ദമുണ്ടെങ്കില് നിങ്ങള്ക്കു കഴിവില്ലെന്നാണ് അര്ഥം. കഴിവുണ്ടെങ്കില് സമ്മര്ദ്ദവുമുണ്ടാവില്ല. കഴിവും കണിശതയുമുണ്ടെങ്കില് ലക്ഷ്യം വയ്ക്കുന്ന എന്തും നേടിയെടുക്കാന് കഴിയും. വളരെ കഴിവുള്ള ബൗളറാണ് ബുംറ. തുടര്ച്ചയായി ഒരേ രീതിയില് പന്തെറിയാനുള്ള മിടുക്കും താരത്തിനുണ്ടെന്ന് മലിങ്ക കൂട്ടിച്ചേര്ത്തു.
പരിചയപ്പെട്ടത് 2013ല്
2013ലാണ് ആദ്യമായി ബുംറയെ പരിചയപ്പെടുന്നതെന്ന് മലിങ്ക വ്യക്തമാക്കി. കൂടുതല് പഠിക്കാനുള്ള അതിയായ ദാഹമുണ്ടായിരുന്ന ബുംറ എളുപ്പത്തില് പഠിച്ചെടുക്കുകയും ചെയ്യും. കൂടുതല് കാര്യങ്ങള് മനസ്സിലാക്കാനുള്ള താല്പ്പര്യമുണ്ടാവേണ്ടത് വളരെ പ്രധാനമാണ്.
യോര്ക്കറുകളും സ്ലോ ബോളുകളുമെലല്ലാം എറിയാന് ഏതു ബൗളര്ക്കും കഴിയും. എന്നാല് അതില് കൃത്യത വേണമെന്നതാണ് ഏറ്റവും പ്രധാനം. ഇക്കാര്യത്തിലാണ് ബുംറ മറ്റു ബൗളര്മാരില് നിന്നും വ്യത്യസ്തനാവുന്നതെന്നും മലിങ്ക വിശദമാക്കി.
ഇന്ത്യ ലോകകപ്പ് നേടും
2011ല് ധോണിക്കു കീഴില് ലോകകപ്പുയര്ത്തിയതു പോലെ ഇത്തവണയും ഇന്ത്യക്കു കിരീടം നേടാന് സാധിക്കുമെന്ന് മലിങ്ക പറഞ്ഞു. ഇന്ത്യന് ടീമിന് അതിനു കഴിയുമെന്ന് ഉറപ്പുണ്ട്. കാരണം കളിക്കളത്തിലെ മികച്ച പ്രകടനങ്ങളിലൂടെ അവര് അതു തെളിയിച്ചു കഴിഞ്ഞു. പരിചയ സമ്പന്നരായ കളിക്കാര് ഇന്ത്യന് നിരയിലുണ്ട്. രോഹിത് ശര്മയാവട്ടെ ഉജ്ജ്വലമായാണ് കളിക്കുന്നത്. ക്യാപ്റ്റന് വിരാട് കോലി സെമിയിലോ, ഫൈനലിലോ ടൂര്ണമെന്റിലെ തന്റെ ആദ്യ സെഞ്ച്വറി നേടുമെന്നാണ് പ്രതീക്ഷിക്കുന്നത്. കാരണം വലിയ മല്സരങ്ങള് അദ്ദേഹത്തിന്റെ വീക്ക്നെസാണെന്നും മലിങ്ക പറഞ്ഞു.