മികച്ച നായകനും താരവും
ധോണി വളരെ മികച്ച ക്യാപ്റ്റനും താരവുമാണെന്നു ഫ്ളെമിങ് പറഞ്ഞു. ഏറെക്കാലമായി സിഎസ്കെയുടെ നട്ടെല്ലാണ് ധോണി. അതുകൊണ്ടു തന്നെ അദ്ദേഹം ഇല്ലാതിരിക്കുമ്പോള് അതു നികത്താന് കഴിയാതെ വരുന്നു. ധോണി വിട്ടുനില്ക്കുമ്പോള് വളരെ വലിയൊരു വിടവാണ് സൃഷ്ടിക്കപ്പെടുന്നത്. അത് നികത്തുകയെന്നത് തങ്ങള്ക്കു സാധിക്കുന്നുമില്ല. കാരണം അത്രയും വലുതാണ് ധോണിയെന്ന താരത്തിന്റെ അസാന്നിധ്യമെന്നും കോച്ച് വിശദമാക്കി.
ശരാശരിക്കും താഴെ
ഈ സീസണില് ധോണിയില്ലാതെ രണ്ടു മല്സരങ്ങളിലാണ് സിഎസ്കെ കളിച്ചത്. ഇവയില് ശരാശരിക്കും താഴെയായിരുന്നു ടീമിന്റെ പ്രകടനമെന്നു ഫ്ളെമിങ് ചൂണ്ടിക്കാട്ടി. ധോണിയുള്ളപ്പോള് ടീമിനൊരു ആശ്വാസമുണ്ടാവും. സിഎസ്കെ ടീമില് അനുഭവസമ്പന്നരായ ഒരു പിടി കളിക്കാരുണ്ട്. പക്ഷെ അവര്ക്കൊന്നും ധോണിയില്ലെങ്കില് കുറവ് നികത്താന് കഴിയുന്നില്ലെന്നത് നിരാശാജനകമാണെന്നും ഫ്ളെമിങ് പറയുന്നു.
മികച്ച കൂട്ടുകെട്ടുകളില്ല
മുംബൈക്കെതിരായ കളിയില് മികച്ച കൂട്ടുകെട്ടുകളുടെ അഭാവമാണ് സിഎസ്കെയുടെ പരാജയത്തിന്റെ മുഖ്യ കാരണമെന്ന് ഫ്ളെമിങ് വ്യക്തമാക്കി. മല്സരത്തില് സിഎസ്കെയ്ക്കു തുടര്ച്ചയായി വിക്കറ്റുകള് നഷ്ടമായിക്കൊണ്ടിരുന്നു. ഇത്തരത്തില് വിക്കറ്റുകള് കൈവിട്ടാല് കാര്യങ്ങള് കൈവിട്ടുപോവും. മറുഭാഗത്ത് മുംബൈക്കു വേണ്ടി രോഹിത് ശര്മയും എവിന് ലൂയിസും ചേര്ന്നുണ്ടാക്കിയ കൂട്ടുകെട്ടാണ് തുണയായതെന്നും കോച്ച് വിശദമാക്കി.