അവന്റെ ശരീരം അത്രയ്ക്ക് ദുർബലമാണ്! ഹാർദിക്കിന്റെ കരിയർ തുലാസിൽ, രോഹിത് ശർമ്മയും ഡേഞ്ചർ സോണിലെന്ന് കൈഫ്

വരാനിരിക്കുന്ന 2027 ഒഡിഐ ലോകകപ്പിൽ ഇന്ത്യൻ ടീമിലെ സൂപ്പർ ഓൾറൗണ്ടർ ഹാർദിക് പാണ്ഡ്യയുടെ പങ്കാളിത്തത്തെക്കുറിച്ച് വലിയ ആശങ്ക പ്രകടിപ്പിച്ച് മുൻ ഇന്ത്യൻ താരം മുഹമ്മദ് കൈഫ്. പരിക്കിന്റെ പിടിയിലായ ഹാർദിക്കിന് 2027 ലോകകപ്പ് കളിക്കാൻ സാധിക്കുമെന്ന് തനിക്ക് യാതൊരു ഉറപ്പും നൽകാൻ കഴിയില്ലെന്ന് കൈഫ് തുറന്നുപറഞ്ഞു. ഹാർദിക്കിന്റെ പരിക്കിന്റെ വിവരങ്ങൾ പുറത്തുവിടുന്നതിൽ ബിസിസിഐ കൂടുതൽ സുതാര്യത കാണിക്കണമെന്നും അദ്ദേഹം ആവശ്യപ്പെട്ടു.

തന്റെ യൂട്യൂബ് ചാനലിലൂടെയാണ് കൈഫ് പ്രതികരണവുമായി രംഗത്തെത്തിയത്:

"ഹാർദിക് പാണ്ഡ്യയുടെ കാര്യത്തിൽ എനിക്ക് യാതൊരു ഉറപ്പും നൽകാനാകില്ല. അദ്ദേഹത്തിന്റെ ശരീരം അത്രമാത്രം പരിക്കുകൾക്ക് വഴങ്ങുന്നതാണ്. നിലവിലെ ഇന്ത്യൻ ടീമിൽ ഹാർദിക്കിനോളം പോന്ന മറ്റൊരു മാച്ച് വിന്നറായ ഓൾറൗണ്ടർ ഇല്ലെന്നത് സത്യമാണ്. എന്നാൽ 2023-ലെ പരിക്കിന് ശേഷം അദ്ദേഹത്തിന്റെ ഫിറ്റ്നസ് പഴയതുപോലെയായിട്ടില്ല. ഹാർദിക്കിന്റെ പരിക്കിനെക്കുറിച്ചുള്ള ഔദ്യോഗിക വിവരങ്ങളൊന്നും പുറത്തുവരുന്നില്ല."

"കൃത്യമായി എന്താണ് സംഭവിച്ചതെന്ന് അറിയാൻ ആരാധകർക്കും അവകാശമുണ്ട്, നമുക്ക് കൂടുതൽ സുതാര്യത ആവശ്യമാണ്. ഹാർദിക്കിന്റെ കരിയറിലുടനീളം സ്ഥിതി ഇതായിരുന്നു. എന്താണ് സംഭവിച്ചതെന്നും അവൻ എന്തുകൊണ്ടാണ് പുറത്തിരിക്കുന്നതെന്നും അവന്റെ പരിക്കിനെക്കുറിച്ച് എപ്പോഴും ചോദ്യങ്ങളുണ്ട്," അദ്ദേഹം കൂട്ടിച്ചേർത്തു.

ഐപിഎൽ 2026-നിടെ കടുപ്പമേറിയ പുറംവേദനയും തുടർന്ന് തുടയിലെ പേശീവലിവും നേരിട്ട ഹാർദിക് ഇപ്പോൾ ബെംഗളൂരുവിലെ നാഷണൽ ക്രിക്കറ്റ് അക്കാദമിയിൽ പുനരധിവാസത്തിലാണ്. ഇതുമൂലം അഫ്ഗാനിസ്ഥാനെതിരായ ഏകദിന പരമ്പര നഷ്ടമായ ഹാർദിക്കിനെ വരാനിരിക്കുന്ന ഇംഗ്ലണ്ട് പര്യടനത്തിനുള്ള ടീമിലും ഉൾപ്പെടുത്തിയിട്ടില്ല.

അതേസമയം, ഇംഗ്ലണ്ട് പര്യടനത്തിനുള്ള ഏകദിന ടീമിൽ യുവ ഓപ്പണർ യശസ്വി ജയ്‌സ്വാളിനെ ഒഴിവാക്കി ഇഷാൻ കിഷനെ ഉൾപ്പെടുത്തിയതിനെയും കൈഫ് പിന്തുണച്ചു. മിഡിൽ ഓർഡറിൽ ബാറ്റ് ചെയ്യാനും ബാക്കപ്പ് വിക്കറ്റ് കീപ്പറായി തിളങ്ങാനും കിഷന് സാധിക്കുമെന്നതാണ് ഇതിന് കാരണം. നിലവിൽ ജയ്‌സ്വാളിന് കുറച്ചുകൂടി കാത്തിരിക്കേണ്ടി വരുമെങ്കിലും താരം ഭാവിയിൽ മൂന്ന് ഫോർമാറ്റിലും ഇന്ത്യയുടെ പ്രധാന കളിക്കാരനാകുമെന്നും കൈഫ് കൂട്ടിച്ചേർത്തു.

ഈയിടെയായി രോഹിത് ശർമ്മയുടെ ഫിറ്റ്നസിനെക്കുറിച്ചും അദ്ദേഹത്തിന് 2027 ലോകകപ്പ് കളിക്കാൻ കഴിയുമോ ഇല്ലയോ എന്നതിനെക്കുറിച്ചും ചർച്ചകൾ നടക്കുന്നുണ്ട്. ഐപിഎൽ 2026-ൽ ഈ സൂപ്പർ ബാറ്റർ പരിക്കിന്റെ പ്രശ്നങ്ങൾ നേരിട്ടിരുന്നു. എങ്കിലും, വിശ്രമിക്കേണ്ടെന്ന് തീരുമാനിച്ച അദ്ദേഹം അഫ്ഗാനിസ്ഥാൻ ഏകദിനത്തിൽ കളിച്ചു.

അദ്ദേഹം കളിക്കണമെന്നാണ് താൻ കരുതുന്നതെന്ന് കൈഫ് വ്യക്തമാക്കിയപ്പോൾ തന്നെ, രോഹിത്തിനെപ്പോലുള്ളവർ ദുർബലമായ ടീമുകൾക്കെതിരെ കളിച്ച് പരാജയപ്പെട്ടാൽ ഒരുപാട് നഷ്ടം സഹിക്കേണ്ടി വരുമെന്നും ചൂണ്ടിക്കാണിച്ചു.

ഇതുകൂടാതെ, ഫോം നിലനിർത്തിയാൽ രോഹിത് ശർമ്മയ്ക്ക് 2027 ലോകകപ്പ് കളിക്കാനാകുമെന്നും, ഉയരക്കാരനായ യുവ ഫാസ്റ്റ് ബൗളർ ഗുർനൂർ ബ്രാർ വരാനിരിക്കുന്ന ലോകകപ്പ് പദ്ധതികളുടെ ഭാഗമാണെന്നും കൈഫ് നിരീക്ഷിച്ചു. ദക്ഷിണാഫ്രിക്കയിലെ പിച്ചുകളിൽ ഗുർനൂറിന്റെ ബൗൺസ് ഇന്ത്യയ്ക്ക് വലിയ മുൻതൂക്കം നൽകുമെന്നാണ് കൈഫിന്റെ വിലയിരുത്തൽ.