T20 WC 2026: മണ്ടൻ ഷോട്ട്, വിക്കറ്റ് തുലച്ചു! തിലക് വർമ്മയുടെ 'അറ്റാക്കിംഗ്' ഗെയിമിനെതിരെ ഇതിഹാസങ്ങൾ

ടി20 ലോകകപ്പിലെ നിർണ്ണായകമായ സൂപ്പർ 8 പോരാട്ടത്തിൽ ദക്ഷിണാഫ്രിക്കയോട് ഇന്ത്യ 76 റൺസിന് നാണംകെട്ട തോൽവി ഏറ്റുവാങ്ങിയതിന് പിന്നാലെ യുവതാരം തിലക് വർമ്മയ്‌ക്കെതിരെ രൂക്ഷവിമർശനവുമായി ഇതിഹാസങ്ങൾ രംഗത്ത്. നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ വെറും രണ്ട് പന്തിൽ ഒരു റൺസ് മാത്രം നേടി പുറത്തായ തിലകിന്റെ ഉത്തരവാദിത്തമില്ലാത്ത ഷോട്ട് സെലക്ഷനെയാണ് മുഹമ്മദ് കൈഫും സുനിൽ ഗവാസ്കറും ചോദ്യം ചെയ്യുന്നത്.

മാർക്കോ യാൻസന്റെ പന്തിൽ അനാവശ്യമായി ക്രീസിന് പുറത്തിറങ്ങി വലിയ ഷോട്ടിന് ശ്രമിക്കുന്നതിനിടെയാണ് തിലക് വിക്കറ്റ് വലിച്ചെറിഞ്ഞത്. ആക്രമണോത്സുകമായ ക്രിക്കറ്റ് കളിക്കാൻ ശ്രമിക്കുന്നതിന് പകരം വിരാട് കോഹ്‌ലിയെപ്പോലെ ഇന്നിംഗ്‌സിന് നങ്കൂരമിടാനായിരുന്നു തിലക് ശ്രമിക്കേണ്ടതെന്ന് കൈഫ് ചൂണ്ടിക്കാട്ടി.

കോഹ്‌ലിയെ മാതൃകയാക്കൂ - കൈഫ്:

തന്റെ യൂട്യൂബ് ചാനലിലൂടെ കൈഫ് തന്റെ അതൃപ്തി വ്യക്തമാക്കി:

"തിലക് വർമ്മയ്ക്ക് കളിക്കാൻ തന്റേതായ ശൈലിയുണ്ട്. തുടക്കത്തിൽ കുറഞ്ഞ സ്ട്രൈക്ക് റേറ്റിൽ ബാറ്റ് ചെയ്യാൻ അദ്ദേഹത്തിന് സാധിക്കും. സ്ട്രൈക്ക് റേറ്റിന്റെ പേരിൽ അദ്ദേഹത്തിന് മേൽ വലിയ സമ്മർദ്ദമുണ്ടായിരുന്നു എന്നത് സത്യമാണ്. പുറത്തുനിന്നുള്ള വിമർശനങ്ങൾ താരങ്ങൾ ശ്രദ്ധിക്കാറുണ്ട്. എന്നാൽ തന്റെ റോളിൽ ഉറച്ചുനിൽക്കാൻ താരത്തെ പ്രേരിപ്പിക്കേണ്ടത് ടീം മാനേജ്‌മെന്റിന്റെ ഉത്തരവാദിത്തമാണ്. വിരാട് കോഹ്‌ലി ചെയ്യുന്നതുപോലെ ഇന്നിംഗ്‌സിനെ മുന്നോട്ട് കൊണ്ടുപോകുന്ന റോളാണ് അദ്ദേഹം ചെയ്യേണ്ടത്. ക്രീസിന് പുറത്തിറങ്ങി വലിയ ഷോട്ടിന് മുതിർന്നതിലൂടെ സ്വന്തം ഗെയിം പ്ലാനിൽ നിന്ന് അദ്ദേഹം മാറിപ്പോയി. മറ്റുള്ളവർ പറയുന്നത് കേൾക്കാൻ തുടങ്ങിയാൽ നിങ്ങൾക്ക് ഒരിക്കലും സ്വതന്ത്രമായി കളിക്കാൻ കഴിയില്ല."

ടീമിൽ ഇതിനകം തന്നെ നിരവധി പവർ ഹിറ്റർമാർ ഉള്ളതിനാൽ ഒരാളെങ്കിലും കളി ആഴത്തിൽ കൊണ്ടുപോകേണ്ടത് അനിവാര്യമാണെന്നും കൈഫ് ഓർമ്മിപ്പിച്ചു.

"ഒരു ചേസ് മാസ്റ്ററാകാൻ നിങ്ങൾ ആദ്യം ഇരുപതാം ഓവർ വരെ ബാറ്റ് ചെയ്യാൻ ശീലിക്കണം. അഭിഷേക് ശർമ്മ, ഇഷാൻ കിഷൻ, സൂര്യകുമാർ യാദവ്, ഹാർദിക് പാണ്ഡ്യ, റിങ്കു സിംഗ് എന്നിവരെല്ലാം തകർത്തടിക്കുന്നവരാണ്. അവിടെ ഒരാളെങ്കിലും വിക്കറ്റ് കാത്തുസൂക്ഷിക്കണം," അദ്ദേഹം കൂട്ടിച്ചേർത്തു.

ഗവാസ്കറുടെ വിമർശനം:

ഇന്ത്യൻ ബാറ്റിംഗ് ഇതിഹാസം സുനിൽ ഗവാസ്കറും തിലകിന്റെ സമീപനത്തിൽ അമ്പരപ്പും നിരാശയും രേഖപ്പെടുത്തി. സ്റ്റാർ സ്‌പോർട്‌സിനോട് അദ്ദേഹം പറഞ്ഞത് ഇങ്ങനെ:

"അദ്ദേഹം വളരെ ബുദ്ധിമാനായ ഒരു ബാറ്ററാണെന്നാണ് ഞാൻ കരുതിയിരുന്നത്, പക്ഷേ ഇന്നത്തെ സമീപനം എന്നെ നിരാശപ്പെടുത്തി. ഒരു വിക്കറ്റ് വീണതിന് തൊട്ടുപിന്നാലെ അത്തരമൊരു ഷോട്ടിന്റെ ആവശ്യം ഇല്ലായിരുന്നു. ആവശ്യമായ റൺ റേറ്റ് ഓവറിൽ 9.5 ആയിരുന്നു എന്നത് ശരിയാണ്, പക്ഷേ ഓരോ ഓവറിലും 15 റൺസ് വേണമെന്ന അത്ര വലിയ പ്രതിസന്ധി അപ്പോഴുണ്ടായിരുന്നില്ല."

ഈ ലോകകപ്പിലെ അഞ്ച് മത്സരങ്ങളിൽ നിന്ന് 118.88 സ്ട്രൈക്ക് റേറ്റിൽ 107 റൺസാണ് തിലക് നേടിയത്. ഫെബ്രുവരി 26-ന് ചെന്നൈയിൽ സിംബാബ്‌വെയ്‌ക്കെതിരെ നടക്കുന്ന മത്സരത്തിൽ തിലകിന് തന്റെ പക്വത തെളിയിക്കേണ്ടത് അനിവാര്യമാണ്.