Click it and Unblock the Notifications
2018 ഐപിഎല് പതിപ്പില് 9.4 കോടി രൂപയ്ക്ക് സ്റ്റാര്ക്കിനെ കൊല്ക്കത്ത നൈറ്റ് റൈഡേഴ്സ് വാങ്ങിയെങ്കിലും സീസണ് മുഴുവന് താരം സൈഡ് ബെഞ്ചിലിരുന്നു. തൊട്ടടുത്ത വര്ഷമാകട്ടെ ലോകകപ്പിനും ആഷസ് പരമ്പരയ്ക്കും തയ്യാറെടുപ്പുകള് നടത്തണമെന്ന് ചൂണ്ടിക്കാട്ടി താരം ഇന്ത്യയിലേക്ക് വന്നില്ല.എന്തായാലും 2020 ഐപിഎല് സീസണ് കളിക്കാനും മിച്ചല് സ്റ്റാര്ക്കിന് താത്പര്യമില്ല. കാരണം അടുത്തവര്ഷം ഇംഗ്ലണ്ടില് പുതിയ 'ദി ഹണ്ട്രഡ്' ലീഗിന് തുടക്കമാവുകയാണ്.
ക്രിക്കറ്റിലെ പുതിയ പരീക്ഷണമായ 'ദി ഹണ്ട്രഡ്' ലീഗില് സ്റ്റാര്ക്കിന് പങ്കെടുക്കണം. ഇരു ടീമുകളും നൂറു പന്തുകള് വീതം കളിക്കുന്ന മത്സരരീതി ഇംഗ്ലീഷ് ആന്ഡ് വെയില്സ് ക്രിക്കറ്റ് ബോര്ഡാണ് ആവിഷ്കരിച്ചിരിക്കുന്നത്. ഇംഗ്ലണ്ടിലെ എട്ടു പ്രധാന നഗരങ്ങളെ അടിസ്ഥാനപ്പെടുത്തിയാണ് ഫ്രാഞ്ചൈസികള്. ദി ഹണ്ട്രഡ് ലീഗില് വെല്ഷ് ഫയറിനായി മിച്ചല് സ്റ്റാര്ക്ക് കളിക്കും.
ഒക്ടോബര് 20 -ന് നടന്ന ലേലത്തില് 1.6 ലക്ഷം ഡോളറിനാണ് (1.14 കോടി രൂപ) ഫ്രാഞ്ചൈസി സ്റ്റാര്ക്കിനെ സ്വന്തമാക്കിയത്. ഓസ്ട്രേലിയന് ബാറ്റ്സ്മാന് സ്റ്റീവ് സ്മിത്തും ഇംഗ്ലീഷ് വെടിക്കെട്ട് ബാറ്റ്സ്മാന് ജോണി ബെയര്സ്റ്റോയും വെല്ഷ് ഫയര് ക്യാംപില് സ്റ്റാര്ക്കിനൊപ്പമുണ്ട്.
ജോ റൂട്ടിന്റെ കാര്യത്തിലും ചിത്രം വ്യത്യസ്തമല്ല. ഐപിഎല്ലില് പങ്കെടുക്കുന്നതിനെക്കാള് സ്വന്തം നാട്ടില് നടക്കുന്ന ദി ഹണ്ട്രഡ് ലീഗില് കളിക്കാന് ജോ റൂട്ടും താത്പര്യപ്പെടുന്നു. ലേലത്തില് ട്രെന്ഡ് റോക്കറ്റ്സ് ടീമാണ് ഇംഗ്ലീഷ് ടെസ്റ്റ് നായകനെ വാങ്ങിയത്.
നേരത്തെ, 2018 ഐപിഎല് ലേലത്തില് ജോ റൂട്ടിനെ സ്വന്തമാക്കാന് ടീമുകളാരും മുന്നോട്ടു വന്നിരുന്നില്ല. തുടര്ന്ന് ലോകകപ്പും ആഷസും മുന്നിര്ത്തി 2019 സീസണില് നിന്നും ജോ റൂട്ട് പിന്മാറി. എന്തായാലും ഡിസംബര് 19 -ന് കൊല്ക്കത്തയില് നടക്കുന്ന താരലേലത്തിന് 971 താരങ്ങള് പേരു നല്കിയിട്ടുണ്ട്. ആകെ 73 ഒഴിവുകള് മാത്രമേ ഇക്കുറിയുള്ളൂ.
എന്തായാലും ഐപിഎല്ലിനെ കടത്തിവെട്ടാന് ദി ഹണ്ട്രഡ് ലീഗിന് കഴിയുമോയെന്ന് ഉറ്റുനോക്കുന്നുണ്ട് ക്രിക്കറ്റ് ലോകം. കാരണം സമകാലീന ക്രിക്കറ്റ് നിര്വചനങ്ങള് ദി ഹണ്ട്രഡ് ലീഗ് പൊളിച്ചെഴുതും.ഓരോ ഇന്നിങ്സിലും നിയമപരമായ 100 പന്തുകളാണ് ദി ഹണ്ട്രഡ് ലീഗ് അനുവദിക്കുന്നത്. ഒരോവറില് പത്തു പന്തുകള് എറിയാം. ഒരു ബൗളറിന് തുടര്ച്ചയായി അഞ്ച് അല്ലെങ്കില് പത്ത് പന്തുകള് എറിയാനാണ് അനുവാദം. അതായത് ആവശ്യമെങ്കില് രണ്ടു ബൗളര്മാരെ കൊണ്ട് (അഞ്ചു പന്തുകള് വീതം) ഓവര് പൂര്ത്തിയാക്കാന് ക്യാപ്റ്റന് കഴിയും.
ഓരോ പത്തു പന്തുകള് പൂര്ത്തിയാവുമ്പോഴുമാണ് ബൗളിങ് എന്ഡുകള് മാറേണ്ടത്. ഇന്നിങ്സില് 20 പന്തുകള് മാത്രമേ ഒരു ബൗളറിന് പരമാവധി എറിയാന് അവസരമുള്ളൂ. പവര്പ്ലേയ്ക്ക് 25 പന്തുകളുടെ ദൈര്ഘ്യമുണ്ട്. പവര്പ്ലേ സമയത്ത് രണ്ടു ഫീല്ഡര്മാര് മാത്രം 30 വാര സര്ക്കിളിന് പുറത്തുനില്ക്കും രണ്ടര മണിക്കൂറാണ് ദി ഹണ്ട്രഡ് ലീഗില് ഒരു മത്സരം പൂര്ത്തിയാവാനുള്ള സമയം.
Continue with Google