ദക്ഷിണാഫ്രിക്കയ്‌ക്കെതിരായ ഏകദിന പരമ്പര; ലങ്കയെ മാത്യൂസ് നയിക്കും, ടീമില്‍ പുതുമുഖവും

കൊളംബോ; ദക്ഷിണാഫ്രിക്കയ്‌ക്കെതിരേ നടക്കാനിരിക്കുന്ന ഏകദിന ക്രിക്കറ്റ് പരമ്പരയില്‍ ശ്രീലങ്കന്‍ ടീമിനെ സ്റ്റാര്‍ ഓള്‍റൗണ്ടര്‍ എയ്ഞ്ചലോ മാത്യൂസ് നയിക്കും. 15 അംഗ ടീമില്‍ ലങ്ക ഒരു പുതുമുഖ സ്പിന്നറെയും ഉള്‍പ്പെടുത്തിയിട്ടുണ്ട്. ഇടംകൈയ്യന്‍ സ്പിന്നര്‍ പ്രഭാത് ജയസൂര്യയാണ് ലങ്കന്‍ ടീമില്‍ ഇടം നേടിയ പുതുമുഖ താരം.

ഈ വര്‍ഷം ജനുവരിയിലായിരുന്നു മാത്യൂസിനെ ഏകദിന, ട്വന്റി ക്യാപ്റ്റനായി ലങ്ക വീണ്ടും നിയമിച്ചത്. എന്നാല്‍, പരിക്കിനെ തുടര്‍ന്ന് ചില പരമ്പരകളില്‍ താരത്തിന് വിട്ടുനില്‍ക്കേണ്ടിവന്നിരുന്നു. ദക്ഷിണാഫ്രിക്കയ്‌ക്കെതിരായ അഞ്ച് മല്‍സരങ്ങളുടെ ഏകദിന പരമ്പരയ്ക്ക് ഈ മാസം 29ന് ദാംബുല്ലയിലാണ് തുടക്കമാവുക.