Click it and Unblock the Notifications
അഞ്ചാം ബൗളര്‍?
അഞ്ചാം ബൗളറായി ഇന്ത്യക്കു ഇനിയുള്ള മല്‍സരങ്ങളില്‍ സ്ഥിരമൊരാളെ കണ്ടെത്തേണ്ടിയിരിക്കുന്നു. കഴിഞ്ഞ രണ്ടു മല്‍സരങ്ങളില്‍ ഹര്‍ദിക് പാണ്ഡ്യയും കേദാര്‍ ജാദവും കൂടി 21 ഓവറുകള്‍ ബൗള്‍ ചെയ്തിരുന്നു. 129 റണ്‍സ് ഇരുവരും വിട്ടുകൊടുത്തെങ്കിലും ഒരു വിക്കറ്റ് പോലും ലഭിച്ചില്ല. ഇതു തീര്‍ച്ചയായും ഇന്ത്യയുടെ വീക്ക്‌നെസ് തന്നെയാണ്.
ഓസ്‌ട്രേലിയക്കെതിരേ ഇന്ത്യ ജയിച്ച കഴിഞ്ഞ കളിയില്‍ ഹര്‍ദിക്കിന്റെയും ജാദവിന്റെയും ബൗളിങിലെ പോരായ്മ തുറന്നു കാണിക്കപ്പെട്ടിരുന്നു. മറ്റു ബൗളര്‍മാര്‍ക്കെതിരേ പതറിയ ഡേവിഡ് വാര്‍ണറും ആരോണ്‍ ഫിഞ്ചും അനായാസമാണ് ഹര്‍ദിക്കിനും ജാദവിനുമെതിരേ റണ്‍സ് നേടിയത്.
ജാദവിനു പകരം ജഡേജ
ആദ്യ രണ്ടു മല്‍സരങ്ങളിലും കേദാര്‍ ജാദവിനെ ബാറ്റിങില്‍ ഇന്ത്യ താഴേക്കിറക്കിയത് താരത്തില്‍ ടീം മാനേജ്‌മെന്റിനുള്ള വിശ്വാസക്കുറവ് കൊണ്ടാണെന്ന് സംശയിക്കേണ്ടിയിരിക്കുന്നു. ഫിനിഷറായി ജാദവിനെ ഉപയോഗിക്കാമോയെന്ന കാര്യത്തില്‍ ഇന്ത്യക്ക് ഇപ്പോഴും ആശയക്കുഴപ്പമുണ്ടെന്ന് വ്യക്തം.
ഇതോടെ രവീന്ദ്ര ജഡേജയെ പകരക്കാരനായി ടീമിലുള്‍പ്പെടുത്തണമോയെന്ന് ഇന്ത്യ ആലോചിക്കേണ്ടിയിരിക്കുന്നത്. മികച്ച സ്പിന്നറും അതിനേക്കാള്‍ മികച്ച ഫീല്‍ഡറുമായ അദ്ദേഹം ബാറ്റിങിലും മോശമല്ല. അഞ്ചാം ബൗളറായും ഇന്ത്യക്കു കളിപ്പിക്കാവുന്ന താരമാണ് ജഡേജ. ഇനിയുള്ള മല്‍സരങ്ങളില്‍ ജാദവിനെ പുറത്തിരുത്തി ജഡേജയെ ഇറക്കുമോയെന്നാണ് ഇനി അറിയാനുള്ളത്.
മധ്യ ഓവറുകളിലെ സമ്മര്‍ദ്ദം
ഇതുവരെ കളിച്ച രണ്ടു മല്‍സരങ്ങളിലും ഇന്ത്യന്‍ ബൗളിങ് മികച്ചതായിരുന്നു. 19 വിക്കറ്റുകള്‍ രണ്ടു കളികളില്‍ ഇന്ത്യ കൊയ്തിരുന്നു. എന്നാല്‍ മധ്യ ഓവറുകളില്‍ വിക്കറ്റെടുത്ത് എതിര്‍ ടീമിനെ സമ്മര്‍ദ്ദത്തിലാക്കുന്നതില്‍ ഇന്ത്യ അത്ര വിജയിച്ചിട്ടില്ലെന്നു കാണാം.
ബുംറയുടെയും ഭുവനേശ്വറിന്റെയും ഓപ്പണിങ് സ്‌പെല്ലുകള്‍ കഴിഞ്ഞാല്‍ പിന്നീടെത്തുന്ന കുല്‍ദീപിനും ചഹലും അനായാസം റണ്‍സ് വിട്ടുകൊടുക്കുന്നത് തലവേദനയാണ്. ദക്ഷിണാഫ്രിക്കയ്‌ക്കെതിരായ ആദ്യ കളിയില്‍ ഏഴിന് 158 റണ്‍സെന്ന നിലയില്‍ നിന്നും അവര്‍ 227 വരെയെത്തിയത് മധ്യ ഓവറുകളില്‍ ഇന്ത്യന്‍ ബൗളര്‍മാരുടെ പോരായ്മ കൊണ്ടു തന്നെയാണ്. ഓസീസിനെതിരായ കളിയിലും ഇത് കണ്ടു. ആറിന് 244 റണ്‍സെന്ന നിലയില്‍ നിന്നും ഓസീസ് 316 വരെയെത്തിയിരുന്നു.
