ഏകദിനത്തിനു പിന്നാലെ രാഹുല്‍ ടെസ്റ്റ് ടീമിലും, സൂപ്പര്‍ താരം വയനാട്ടില്‍ ബാറ്റേന്തും

മുംബൈ: സസ്‌പെന്‍ഷനു ശേഷം മല്‍സരരംഗത്തു തിരിച്ചെത്തിയ ഇന്ത്യന്‍ യുവ ബാറ്റ്‌സ്മാന്‍ ലോകേഷ് രാഹുല്‍ വയനാട്ടില്‍ കളിക്കും. ഇംഗ്ലണ്ട് ലയണ്‍സിനെതിരേ നടക്കാനിരിക്കുന്ന അനൗദ്യോഗിക ടെസ്റ്റിനുള്ള ഇന്ത്യന്‍ എ ടീമില്‍ രാഹുലിനെയും ഉള്‍പ്പെടുത്തി. വിലക്ക് നീങ്ങിയ ശേഷം ഇംഗ്ലണ്ട് ലയണ്‍സിനെതിരായ ഏകദിന പരമ്പരയിലും താരം കളിച്ചിരുന്നു. വയനാട്ടില്‍ ഫെബ്രുവരി ഏഴു മുതല്‍ 10 വരെ നടക്കുന്ന ടെസ്റ്റിലാണ് രാഹുല്‍ ഇന്ത്യക്കായി ബാറ്റേന്തുക.

മഹാരാഷ്ട്ര താരം അങ്കിത് ബാവ്‌നെയാണ് 14 അംഗ ഇന്ത്യന്‍ എ ടീമിനെ നയിക്കുന്നത്. സീനിയര്‍ ടീമിലെ മുന്‍ പേസറായിരുന്ന ജാര്‍ഖണ്ഡില്‍ നിന്നുള്ള വരുണ്‍ ആരോണിനെ ടീമിലുള്‍പ്പെടുത്തിയിട്ടുണ്ട് . 2015ല്‍ ബെംഗളൂരുവില്‍ ദക്ഷിണാഫ്രിക്കയ്‌ക്കെതിരേ നടന്ന ടെസ്റ്റിലാണ് വരുണ്‍ അവസാനമായി ഇന്ത്യക്കായി പന്തെറിഞ്ഞത്. രഞ്ജി ട്രോഫിയുടെ ഈ സീസണിലെ മികച്ച പ്രകടനമാണ് പേസര്‍ക്കു എ ടീമില്‍ ഇടം നേടിക്കൊടുത്തത്. രഞ്ജിയില്‍ ഏഴു കളികളില്‍ നിന്നും വരുണ്‍ 25 വിക്കറ്റെടുത്തിരുന്നു.

കാര്യമായ സര്‍പ്രൈസുകളൊന്നുമില്ലാതെയാണ് സെലക്ടര്‍മാര്‍ എ ടീമിനെ തിരഞ്ഞെടുത്തിരിക്കുന്നത്. ആഭ്യന്തര ക്രിക്കറ്റില്‍ മികച്ച പ്രകടനം നടത്തിയ മിക്ക കളിക്കാരും ടീമിലിടം നേടി. രഞ്ജി ട്രോഫിയില്‍ കേരളത്തെ ചരിത്രത്തിലാദ്യമായി സെമി ഫൈനല്‍ വരെയെത്തിക്കുന്നതില്‍ നിര്‍ണായക പങ്കുവഹിച്ച ജലജ് സക്‌സേനയെയും ഇത്തവണ എ ടീമിനൊപ്പം കാണാം.

ഇന്ത്യന്‍ എ ടീം
അങ്കിത് ബാവ്‌നെ (ക്യാപ്റ്റന്‍), ലോകേഷ് രാഹുല്‍, എആര്‍ ഈശ്വരന്‍, പ്രിയങ്ക് പഞ്ചാല്‍, റിക്കി ഭൂയ്, സിദ്ധേഷ് ലാദ്, കെഎസ് ഭരത്, ജലജ് സക്‌സേന, എസ് നദീം, മയാങ്ക് മര്‍ക്കാണ്ടെ, നവ്ദീപ് സെയ്‌നി, ശര്‍ദ്ദുല്‍ താക്കൂര്‍, ആവേശ് ഖാന്‍, വരുണ്‍ ആരോണ്‍