IPL 2026: റണ്ണും വിക്കറ്റും മാത്രമല്ല, ഇത്തവണ ഐപിഎല്ലിൽ പിഴയും ഒഴുകുകയാണ്! ലിസ്റ്റിൽ ഈ അപ്രതീക്ഷിത താരങ്ങളും

ഐപിഎൽ 2026 ആവേശകരമായ ഘട്ടത്തിലേക്ക് കടക്കുമ്പോൾ, മൈതാനത്തെ പ്രകടനങ്ങൾക്കൊപ്പം തന്നെ അച്ചടക്ക നടപടികളും ചർച്ചയാവുകയാണ്. ടൂർണമെന്റിന്റെ സുഗമമായ നടത്തിപ്പിനായി ബിസിസിഐ നിഷ്കർഷിച്ചിട്ടുള്ള നിബന്ധനകൾ ലംഘിച്ച നിരവധി താരങ്ങൾ ഇതിനോടകം തന്നെ കടുത്ത പിഴശിക്ഷകൾക്ക് വിധേയരായിട്ടുണ്ട്. സ്ലോ ഓവർ റേറ്റ് (Slow Over Rate) ആണ് ഈ സീസണിൽ ക്യാപ്റ്റൻമാരെ ഏറ്റവും കൂടുതൽ വലയ്ക്കുന്നത്. മുംബൈ ഇന്ത്യൻസ് നായകൻ ഹാർദിക് പാണ്ഡ്യ, ഗുജറാത്ത് ടൈറ്റൻസിന്റെ ശുഭ്മൻ ഗിൽ, ചെന്നൈ സൂപ്പർ കിംഗ്‌സിന്റെ റുതുരാജ് ഗെയ്‌ക്‌വാദ് എന്നിവർക്ക് നിശ്ചിത സമയത്തിനുള്ളിൽ ഓവറുകൾ പൂർത്തിയാക്കാൻ കഴിയാത്തതിനെ തുടർന്ന് 12 ലക്ഷം രൂപ വീതം പിഴ ചുമത്തിയിട്ടുണ്ട്.

ഇതിഹാസ താരം അജിങ്ക്യ രഹാനെയും സമാനമായ കാരണത്താൽ 12 ലക്ഷം രൂപ പിഴയൊടുക്കേണ്ടി വന്നു. എന്നാൽ പഞ്ചാബ് കിങ്സ് നായകൻ ശ്രേയസ് അയ്യർക്കാണ് ഈ കാര്യത്തിൽ ഏറ്റവും വലിയ തിരിച്ചടി നേരിട്ടത്. രണ്ട് തവണ സ്ലോ ഓവർ റേറ്റ് നിയമം ലംഘിച്ചതിനെ തുടർന്ന് രണ്ട് വട്ടം 12 ലക്ഷം രൂപ വീതം പിഴയാണ് അദ്ദേഹത്തിന് ചുമത്തപ്പെട്ടത്.

കളിക്കളത്തിലെ പെരുമാറ്റദൂഷ്യത്തെ തുടർന്ന് മാച്ച് ഫീസിന്റെ നിശ്ചിത ശതമാനം പിഴയായി നൽകേണ്ടി വന്ന താരങ്ങളും ഈ പട്ടികയിലുണ്ട്. റോയൽ ചലഞ്ചേഴ്‌സ് ബെംഗളൂരുവിന്റെ ടിം ഡേവിഡ്, ഡൽഹി ക്യാപിറ്റൽസിന്റെ നിതീഷ് റാണ, സൺറൈസേഴ്‌സ് ഹൈദരാബാദിന്റെ യുവ വിസ്മയം അഭിഷേക് ശർമ്മ, കൊൽക്കത്തയുടെ സ്പിന്നർ വരുൺ ചക്രവർത്തി എന്നിവർക്ക് തങ്ങളുടെ മാച്ച് ഫീസിന്റെ 25 ശതമാനം പിഴയായി ബിസിസിഐ വിധിച്ചു. ഐപിഎൽ പെരുമാറ്റച്ചട്ടം ലംഘിച്ചതിനെ തുടർന്നാണ് ഈ കർശന നടപടി. കളിക്കളത്തിലെ ആവേശം അതിരുവിടുന്നത് തടയാനും മാന്യമായ കളി ഉറപ്പാക്കാനുമാണ് ഇത്തരം നടപടികളിലൂടെ അധികൃതർ ലക്ഷ്യമിടുന്നത്.

ടൂർണമെന്റിലെ പോയിന്റ് പട്ടിക പരിശോധിച്ചാൽ അഞ്ച് മത്സരങ്ങളിൽ നാല് വിജയങ്ങളുമായി രാജസ്ഥാൻ റോയൽസാണ് എട്ട് പോയിന്റോടെ ഒന്നാമത് നിൽക്കുന്നത്. കളിച്ച നാല് മത്സരങ്ങളിലും തോൽവിയറിയാത്ത പഞ്ചാബ് കിംഗ്‌സ് ഏഴ് പോയിന്റോടെ തൊട്ടുപിന്നിലുണ്ട്. മൂന്ന് ജയങ്ങളുമായി ആർസിബി മൂന്നാം സ്ഥാനത്തും, രണ്ട് ജയങ്ങൾ വീതമുള്ള ഹൈദരാബാദ്, ഡൽഹി, ഗുജറാത്ത്, ലക്നൗ, ചെന്നൈ എന്നീ ടീമുകൾ യഥാക്രമം നാല് മുതൽ എട്ട് വരെ സ്ഥാനങ്ങളിലും നിലയുറപ്പിച്ചിരിക്കുന്നു. ഒരു ജയം മാത്രം സ്വന്തമാക്കിയ മുംബൈ ഒൻപതാം സ്ഥാനത്തും, ഇതുവരെ അക്കൗണ്ട് തുറക്കാത്ത കൊൽക്കത്ത പത്താം സ്ഥാനത്തുമാണ്.

വ്യക്തിഗത പ്രകടനങ്ങളിൽ സൺറൈസേഴ്‌സ് ഹൈദരാബാദിന്റെ ഹെൻറിച്ച് ക്ലാസൻ അഞ്ച് മത്സരങ്ങളിൽ നിന്ന് 224 റൺസുമായി ഓറഞ്ച് ക്യാപ്പ് നിലനിർത്തുന്നു. സഹതാരം ഇഷാൻ കിഷൻ 213 റൺസുമായി തൊട്ടുപിന്നിലുണ്ട്. രാജസ്ഥാന്റെ യുവതാരം വൈഭവ് സൂര്യവംശി (200), ആർസിബിയുടെ രജത് പാട്ടിദാർ (195), ചെന്നൈയുടെ സഞ്ജു സാംസൺ (185) എന്നിവരാണ് റൺവേട്ടയിൽ ആദ്യ അഞ്ചിലുള്ള മറ്റ് താരങ്ങൾ. പർപ്പിൾ ക്യാപ്പിനായുള്ള പോരാട്ടത്തിൽ ഗുജറാത്ത് ടൈറ്റൻസിന്റെ പ്രസിദ്ധ് കൃഷ്ണയും ചെന്നൈയുടെ അൻഷുൽ കംബോജും പത്ത് വിക്കറ്റുകൾ വീതം വീഴ്ത്തി തുല്യനിലയിൽ മുന്നേറുന്നു. രാജസ്ഥാൻ സ്പിന്നർ രവി ബിഷ്ണോയ് ഒൻപത് വിക്കറ്റുകളുമായി മൂന്നാം സ്ഥാനത്തും ജോഫ്ര ആർച്ചർ ഏഴ് വിക്കറ്റുകളുമായി നാലാം സ്ഥാനത്തുമുണ്ട്. വരും ദിവസങ്ങളിൽ പോരാട്ടം കൂടുതൽ കടുക്കുന്നതോടെ ഈ കണക്കുകളിൽ വലിയ മാറ്റങ്ങൾ പ്രതീക്ഷിക്കാം.