ലോകകപ്പ്: അവരെ കൈവിടരുത്... ജയിക്കാന്‍ തീര്‍ച്ചയായും വേണം, നിര്‍ദേശവുമായി ഭാജി

കു-ചാ തുടരട്ടെ

ടൂര്‍ണമെന്റില്‍ ഇന്ത്യയുടെ ഇതുവരെ നടന്ന മല്‍സരങ്ങളിലെല്ലാം കുല്‍ദീപ്- ചഹല്‍ സഖ്യം കളിച്ചിരുന്നു. മികച്ച പ്രകനവും ഇവര്‍ കാഴ്ചവച്ചിട്ടുണ്ട്. രണ്ടു പേരും കൂടി ഒമ്പത് വിക്കറ്റുകള്‍ ഇതിനകം നേടിക്കഴിഞ്ഞു. ഇവയില്‍ ആറും ചഹലിനായിരുന്നു. ലോകകപ്പിലെ ശേഷിച്ച മല്‍സരങ്ങളിലും കു-ചാ സഖ്യത്തെ തന്നെ കളിപ്പിക്കണമെന്ന് ഭാജി ആവശ്യപ്പെട്ടു.
മികച്ച സ്പിന്‍ കോമ്പിനേഷനാണ് ഇവരുടേത്. ടീം മാനേജ്‌മെന്റ് ഇവരില്‍ തന്നെ ഉറച്ചുനില്‍ക്കണം. കഴിഞ്ഞ രണ്ടര വര്‍ഷത്തിനിടെ ഇന്ത്യയുടെ മികച്ച പ്രകടനത്തിനു പിന്നില്‍ കുല്‍ദീപിന്റെയും ചഹലിന്റെയും വലിയ പങ്കു തന്നെയുണ്ടെന്നും ഭാജി വിശദമാക്കി.

മറ്റു ടീമുകള്‍ക്കില്ല

കുല്‍ദീപിനെയും ചഹലിനെയും പോലെ മിടുക്കരായ രണ്ടു സ്പിന്നര്‍മാര്‍ മറ്റു ടീമുകള്‍ക്കൊന്നുമില്ലെന്നു ഭാജി അഭിപ്രായപ്പെട്ടു. മറ്റുള്ള ടീമുകള്‍ മധ്യ ഓവറുകളില്‍ സ്ഥിരമായി സ്പിന്നര്‍മാരെക്കൊണ്ട് പന്തെറിയിക്കാറില്ല. അതുകൊണ്ടു തന്നെ കുല്‍ദീപും ചഹലും ഒരുമിച്ച് തന്നെ കളിക്കണമെന്നാണ് താന്‍ ആഗ്രഹിക്കുന്നതെന്ന് ഭാജി സൂചിപ്പിച്ചു.

സ്പിന്‍ ബൗളിങ് എളുപ്പമല്ല

ഇംഗ്ലണ്ടിലെ സാഹചര്യങ്ങള്‍ പരിഗണിക്കുമ്പോള്‍ സ്പിന്‍ ബൗളര്‍മാര്‍ക്ക് അത്ര അനൂകൂലമായിരുന്നില്ല കാര്യങ്ങളെന്ന് ഭാജി ചൂണ്ടിക്കാട്ടി. എന്നാല്‍ കുല്‍ദീപും ചഹലും സാഹചര്യങ്ങള്‍ക്ക് അനുസരിച്ച് മാറ്റം വരുത്തിയതാണ് ഇന്ത്യക്കു മുതല്‍ക്കൂട്ടായത്.
ഇംഗ്ലണ്ടിലെ പിച്ചില്‍ രണ്ടു സ്പിന്നര്‍മാരെ ഒരുമിച്ച് കളിപ്പിക്കുന്നത് വളരെ ബുദ്ധിമുട്ടാണ്. മാത്രമല്ല കുല്‍ദീപും ചഹലും റിസ്റ്റ് സ്പിന്നര്‍മാരുമാണ്. മികച്ച ഇലവനാണ് ഇന്ത്യക്കു വേണ്ടതെങ്കില്‍ രണ്ടു പേരെയും ഉള്‍പ്പെടുത്തണമെന്നും ഭാജി നിര്‍ദേളിച്ചു.