ഐപിഎല്ലില്‍ ധോണിയെ കടത്തിവെട്ടി കോലി, പ്രതിഫലം 15 കോടി!

ബെംഗളൂരു: ഐ പി എല്ലില്‍ ഏറ്റവും കൂടുതല്‍ പ്രതിഫലം പറ്റുന്ന കളിക്കാരന്‍ ആര്. യുവരാജ് സിംഗ്, എം എസ് ധോണി... അല്ല ഇവരാരുമല്ല. ഇന്ത്യയുടെ ടെസ്റ്റ് ടീം ക്യാപ്റ്റനായ വിരാട് കോലിക്കാണ് ആ റെക്കോര്‍ഡ്. ബാംഗ്ലൂര്‍ റോയല്‍ ചാലഞ്ചേഴ്‌സിന് വേണ്ടി കളിക്കുന്ന വിരാട് കോലി ഒരു വര്‍ഷം പ്രതിഫലമായി പറ്റുന്നത് 15 കോടി രൂപയാണ്. ബി സി സി ഐ തന്നെയാണ് ഇക്കാര്യം പുറത്തുവിട്ടത്.

12.5 കോടിയാണ് കോലിയുടെ മൂല്യമെങ്കിലും ബാംഗ്ലൂര്‍ ടീം താരത്തിന് 15 കോടി നല്‍കുന്നതായിട്ടാണ് ബി സി സി ഐ വ്യക്തമാക്കിയത്. എം എസ് ധോണിയെ പുനെ ടീം 12.5 കോടി രൂപയ്ക്കാണ് വാങ്ങിയത്. ധോണിയുടെ കൈവശം കിട്ടുന്നതും ഇതേ തുകയായിരിക്കും. ശിഖര്‍ ധവാന്‍, എ ബി ഡിവില്ലിയേഴ്‌സ്, ആര്‍ അശ്വിന്‍, ഡ്വെയ്ന്‍ ബ്രാവോ, തുടങ്ങിയവര്‍ക്കും ലേലത്തില്‍ കാണിച്ചിരിക്കുന്ന അതേ തുക തന്നെയാണ് കിട്ടുക.

ഹര്‍ഭജന്‍ സിംഗ്, അമ്പാട്ടി റായിഡു എന്നിവര്‍ക്ക് ലേലത്തില്‍ കാണിച്ചിരിക്കുന്നതിലും കൂടിയ തുക നല്‍കിയാണ് മുംബൈ ഇന്ത്യന്‍സ് നിലനിര്‍ത്തിയിരിക്കുന്നത്. ഹര്‍ഭജന് 8 കോടിയും റായിഡുവിന് 6 കോടിയും ഇത് പ്രകാരം കൈവശം കിട്ടും. കിംഗ്‌സ് ഇലവന്‍ പഞ്ചാബിന്റെ ഡേവിഡ് മില്ലര്‍, കൊല്‍ക്കത്ത ക്യാപ്റ്റന്‍ ഗൗതം ഗംഭീര്‍, സുനില്‍ നരൈന്‍, മനന്‍ വോറ തുടങ്ങിയ കളിക്കാര്‍ക്ക് കണക്കില്‍ കാണിച്ചിട്ടുള്ളതിലും കുറഞ്ഞ തുക നല്‍കിയാണ് അതാത് ടീമുകള്‍ നിലനിര്‍ത്തിയിരിക്കുന്നത്.