തന്നെ സംബന്ധിച്ച് വിക്കറ്റ് കീപ്പിങെന്നത് പുതുമയുള്ള കാര്യമല്ലെന്നു രാഹുല് വ്യക്തമാക്കി. ക്രിക്കറ്റ് പിന്തുടരുന്നവര്ക്കറിയാം തന്നെക്കുറിച്ച്. വിക്കറ്റ് കീപ്പിങില് നിന്നും അധികകാലം വിട്ടുനില്ക്കാറില്ല. ഐപിഎല് കിങ്സ് ഇലവന് പഞ്ചാബിനു വേണ്ടി വിക്കറ്റ് കാക്കാറുള്ള താന് കര്ണാടകയ്ക്കു വേണ്ടി കളിക്കുമ്പോഴെല്ലാം വിക്കറ്റ് കീപ്പര് കൂടിയായിരുന്നു. അതുകൊണ്ടു തന്നെ വിക്കറ്റ് കീപ്പിങിലെ ടച്ച് കൈവിടാറില്ല. ടീമിന് ആവശ്യമെങ്കില് ഒന്നിലധികം റോള് ഏറ്റെടുക്കാന് ആഗ്രഹിക്കുന്നയാള് കൂടിയാണ് താനെന്നും രാഹുല് വിശദമാക്കി.
ഭയത്തോടെയും അതിലേറെ സമ്മര്ദ്ദത്തോടെയുമാണ് ഇന്ത്യക്കു വേണ്ടി വിക്കറ്റ് കീപ്പറായി ഇറങ്ങാറുള്ളതെന്നു രാഹുല് വെളിപ്പെടുത്തി. കാണികളില് നിന്നുള്ള കടുത്ത സമ്മര്ദ്ദമാണ് ഇതിനു കാരണം. കളിക്കിടെ ഒരു തവണ പന്ത് കൈകളില് നിന്നും വഴുതിപ്പോയാല് ധോണിയുടെ പകരക്കാരാവാന് കഴിയില്ലെന്നു ആളുകള് കരുതുകയും ചെയ്യും. ധോണിക്കു പകരം വിക്കറ്റ് പിറകില് മറ്റൊരാളെ അംഗീകരിക്കുക ആളുകള്ക്കു ബുദ്ധിമുട്ടാണ്. അതുകൊണ്ടു തന്നെ ധോണിയുടെ പകരക്കാരനായി കളിക്കുന്നത് കടുത്ത സമ്മര്ദ്ദമുണ്ടാക്കുന്നതായും രാഹുല് കൂട്ടിച്ചേര്ത്തു.
ഇന്ത്യയുടെ എക്കാലത്തെയും മികച്ച വിക്കറ്റ് കീപ്പറുടെ നിരയിലാണ് ധോണിയുടെ സ്ഥാനം. ഇന്ത്യക്കായി 350 ഏകദിനങ്ങളില് നിന്നും 444 പേരെയാണ് അദ്ദേഹം പുറത്താക്കിയിട്ടുള്ളത്.
ഏകദിന ക്രിക്കറ്റില് ലോകത്തില് ഏറ്റവുമധികം പേരെ പുറത്താക്കിയ മൂന്നാമത്തെ വിക്കറ്റ് കീപ്പര് കൂടിയാണ് ധോണി. ഓസ്ട്രേലിയയുടെ മുന് ഇതിഹാസം ആദം ഗില്ക്രിസ്റ്റ് (482), ശ്രീലങ്കയുടെ മുന് ഇതിഹാസം കുമാര് സങ്കക്കാര (472) എന്നിവരാണ് ആദ്യ രണ്ടു സ്ഥാനങ്ങളിലുള്ളത്. കഴിഞ്ഞ വര്ഷം ജുലൈയിലാണ് ധോണി അവസാനമായി ഇന്ത്യക്കു വേണ്ടി കളിച്ചത്. ലോകകപ്പിന്റെ സെമി ഫൈനലില് ന്യൂസിലാന്ഡിനെതിരേയായിരുന്നു ഇത്.