കമ്രാന് അക്മലാണ് ഗംഭീറുമായി തനിക്കു കളിക്കളത്തിനു പുറത്ത് അടുത്ത സൗഹൃദമുണ്ടായിരുന്നതായി വെളിപ്പെടുത്തിയത്. ഗംഭീറിനെപ്പോലെ കളിക്കളത്തില് വളരെ വൈകാരികമായി പ്രതികരിക്കുന്ന താരമാണ് അക്മല്. എതിര് ടീമിലെ താരവുമായി കൊമ്പുകോര്ക്കാന് അദ്ദേഹത്തിന് ഒരു മടിയുമുണ്ടായിട്ടില്ല. പലപ്പോഴും ഇത് ഏറ്റുമുട്ടലിന്റെ വക്കിലുമെത്തിയിട്ടുണ്ട്. ടീമംഗങ്ങളും അംപയര്മാരും ഇടപെട്ടായിരുന്നു രംഗം ശാന്തമാക്കിയിരുന്നത്.
ഒരു തവണ കളിക്കളത്തില് വച്ച് ഇന്ത്യയും പാകിസ്താനും തമ്മിലുള്ള പോരാട്ടത്തിനിടെ ഗംഭീറും അക്മലും തമ്മില് കടുത്ത വാക്കേറ്റമുണ്ടായികുന്നു. 2010ല് നടന്ന ഏഷ്യാ കപ്പിനിടെയായിരുന്നു ഇത്. ശ്രീലങ്ക വേദിയായ ടൂര്ണമെന്റിന്റെ സെമി ഫൈനലില് ഗംഭീര് ബാറ്റ് ചെയ്യുന്നതിനിടെ അക്മല് പല തവണ വിക്കറ്റിനായി അപ്പീല് ചെയ്യുകയായിരുന്നു.
ഇതില് അസ്വസ്ഥനും കുപിതനുമായ ഗംഭീര് അക്മലിനെതിരേ തിരിയുകയും ഇരുവരും തമ്മില് രൂക്ഷമായ വാക്കേറ്റം നടക്കുകയും ചെയ്തു. ഇത് അതിരുവിടുമെന്ന് ഉറപ്പായതോടെ അംപയര്മാര് ഇടപെട്ടാണ് ഇരുവരെയും മാറ്റിയത്.
തെറ്റിദ്ധാരണയും കളിയിലെ സമ്മര്ദ്ദവും കാരണമുണ്ടായ പെരുമാറ്റം മാത്രമായി ഗംഭീറുമായുള്ള അന്നത്തെ ഏറ്റുമുട്ടലിനെ കണ്ടാല് മതി. ഗംഭീറും താനും നല്ല സുഹൃത്തുക്കളാണ്. ലിസ്റ്റ് എ ക്രിക്കറ്റില് നിരവധി മല്സരങ്ങളില് തങ്ങള് കളിച്ചിട്ടുണ്ട്. ക്രിക്കറ്റ് പര്യടനങ്ങള്ക്കിടെ അഅന്നു നിരന്തരം ഗംഭീറുമായി കണ്ടു മുട്ടാറുണ്ടായിരുന്നുവെന്നും ഒരുമിച്ച് ഭക്ഷണം കഴിക്കാറുണ്ടായിരുന്നുവെന്നും അക്മല് വെളിപ്പെടുത്തി.
പാകിസ്താനു വേണ്ടി 53 ടെസ്റ്റുകളിലും 157 ഏകദിനങ്ങളിലും 58 ടി20കളിലും അക്മല് കളിച്ചിട്ടുണ്ട്. എന്നാല് 2017നു ശേഷം അദ്ദേഹം ദേശീയ ടീമിനു പുറത്താണ്.
ഗംഭീറുമായുള്ള ഏറ്റുമുട്ടല് പോലെ തന്നെ 2012ല് ഇന്ത്യയും പാകിസ്താനും തമ്മിലുള്ള പരമ്പരയ്ക്കിടെ ഇന്ത്യന് പേസര് ഇഷാന്ത് ശര്മയുമായും അക്മല് കളിക്കളത്തില് കൊമ്പുകോര്ത്തിരുന്നു.
ഗംഭീറുമായുള്ള അന്നത്തെ വാക് പോര് പോലെ തന്നെ ഇഷാന്തുമായുള്ള ഏറ്റുമുട്ടലിനെയും കണ്ടാല് മതി. കളിക്കളത്തില് സാധാരണ താന് അധികം സംസാരിക്കാറില്ല. ഗൗതമും ഇഷാന്തും നല്ല വ്യക്തികളാണ്. അവരെ ഞങ്ങള് ബഹുമാനിക്കുന്നു, അവര്ക്കു തിരിച്ചും അങ്ങനെ തന്നെ. കളിക്കളത്തില് എന്തൊക്കെ സംഭവിക്കുന്നോ അതൊക്കെ അവിടെ തന്നെ അവസാനിക്കുമെന്നും അക്മല് വിശദമാക്കി.