IPL 2026: വൈഭവിന്റെ വീക്ക്‌നെസ് ആര്‍ച്ചറിനറിയാം? ചോദിച്ചപ്പോള്‍ മറുപടിയിങ്ങനെ!! വൈറല്‍

ക്രിക്കറ്റ് ലോകത്തെയാകെ ഞെട്ടിച്ചിരിക്കുകയാണ് 15 കാരൻ വൈഭവ് സൂര്യവംശിയുടെ ബാറ്റിങ് മികവ്. ഐപിഎല്ലിലെ നിർണായകമായ ക്വാളിഫയർ പോരാട്ടത്തിൽ വെറും 29 പന്തുകളിൽ നിന്നുമാണ് താരം 97 റൺസ് അടിച്ച് കൂട്ടിയത്. എന്നാൽ, മത്സരശേഷം ജോഫ്രാ ആർച്ചർ സൂര്യവംശിയെക്കുറിച്ച് പറഞ്ഞ കാര്യമാണ് ഇപ്പോൾ വൈറലായിരിക്കുന്നത്. നെറ്റ്സിൽ സൂര്യവംശിക്ക് പന്തെറിയാറുണ്ടോ എന്നും അവന്റെ ബലഹീനത എവിടെയാണെന്ന് അറിയാമോ എന്നുമുള്ള ചോദ്യത്തിനാണ് ജോഫ്രാ രസകരമായ മറുപടി നൽകിയത്.

സൂര്യവംശിയുടെ ബാറ്റിംഗ് ടീമിന് നൽകുന്ന ആത്മവിശ്വാസത്തെക്കുറിച്ച് ആർച്ചർ പറഞ്ഞത് ഇങ്ങനെയാണ്:

"ഡഗ്ഗൗട്ടിലിരുന്ന് അവന്റെ ബാറ്റിംഗ് കാണുന്നത് വലിയ ആവേശമായിരുന്നു. അവൻ എത്രത്തോളം കൂടുതൽ റൺസ് നേടുന്നുവോ, അത്രത്തോളം വലിയ സ്കോർ ഞങ്ങൾക്ക് ബൗളിംഗിൽ ഡിഫെൻഡ് ചെയ്യാൻ (Defend) കിട്ടും. അതുകൊണ്ട് അവൻ ക്രീസിൽ തുടർന്ന് 150 റൺസ് അടിച്ചുകൂട്ടിയാലും ടീമിലെ ബാക്കി കളിക്കാർക്ക് അത് വലിയ ഗുണം ചെയ്യും."

നെറ്റ്സ് പരിശീലനത്തിനിടെ ഈ യുവ അത്ഭുത താരത്തിന് പന്തെറിയാറുണ്ടോ എന്നും, അവന്റെ ബലഹീനതകൾ എവിടെയാണെന്ന് കണ്ടെത്തിയിട്ടുണ്ടോ എന്നുമുള്ള ചോദ്യത്തിന് വളരെ കൗതുകകരമായ മറുപടിയാണ് ആർച്ചർ നൽകിയത്.

"നെറ്റ്സിൽ ചിലപ്പോഴൊക്കെ ഞാൻ അവന് എതിരെ പന്തെറിയാറുണ്ട്. പക്ഷേ അവനെ വീഴ്ത്താൻ ഞാൻ എവിടെയാണ് പന്തെറിയാറുള്ളത് എന്ന രഹസ്യം ഇപ്പോൾ പറയില്ല, അത് ഈ ഐപിഎൽ സീസൺ ഒക്കെ കഴിഞ്ഞതിന് ശേഷം മാത്രം ഞാൻ വെളിപ്പെടുത്താം."

ടീമിലെ ഓരോ കളിക്കാരനും കൃത്യമായ സമയത്ത് ഫോമിലേക്ക് ഉയരുന്നത് രാജസ്ഥാൻ റോയൽസിന് കിരീടത്തിലേക്കുള്ള വഴി എളുപ്പമാക്കുമെന്ന ശുഭപ്രതീക്ഷയിലാണ് ജോഫ്ര ആർച്ചർ.

പവർപ്ലേയിലെ വിക്കറ്റുകളാണ് കളി തീരുമാനിക്കുന്നത്

തന്റെ ബൗളിംഗ് പ്രകടനത്തെക്കുറിച്ചും പവർപ്ലേയിലെ സമ്മർദ്ദത്തെക്കുറിച്ചും ആർച്ചർ വ്യക്തമാക്കിയത് ഇങ്ങനെയാണ്: "ബൗളിംഗ് ഫിഗേഴ്സിനപ്പുറം, ഞാൻ ഇന്ന് നന്നായി പന്തെറിഞ്ഞു എന്നാണ് കരുതുന്നത്. ഞങ്ങൾ എല്ലാവരും നന്നായി എറിഞ്ഞു. കൃത്യമായ ലെങ്തുകളിൽ പന്തെറിയുക എന്ന ഞങ്ങളുടെ പ്ലാനിൽ ഉറച്ചുനിന്നു, അതിനുള്ള പ്രതിഫലം ഇന്ന് ലഭിക്കുകയും ചെയ്തു. സാധാരണയായി പവർപ്ലേ ഓവറുകളിൽ കൂടുതൽ വിക്കറ്റുകൾ വീഴ്ത്തുന്ന ടീം തന്നെയാണ് മത്സരം ജയിക്കാറുള്ളത്. അതുകൊണ്ട് തന്നെ പവർപ്ലേയിൽ എറിയുക എന്നത് വലിയ സമ്മർദ്ദമുള്ള കാര്യമാണ്. എങ്കിലും ഞാൻ അത് ഏറ്റെടുക്കുകയും ടീമിനായി പരമാവധി മികച്ച രീതിയിൽ ചെയ്യാൻ ശ്രമിക്കുകയും ചെയ്യുന്നു."

ഹൈദരാബാദിന്റെ മാരക ബാറ്റർമാരെ പൂട്ടിയ തന്ത്രം

സൺറൈസേഴ്‌സിന്റെ വമ്പൻ അടിക്കാരെ നേരിടുമ്പോൾ ബൗളർമാർ പുലർത്തേണ്ട മാനസികാവസ്ഥയെക്കുറിച്ച് ആർച്ചർ തുറന്നുപറഞ്ഞു. "സത്യസന്ധമായി പറഞ്ഞാൽ, അത്തരം അപകടകാരികളായ ബാറ്റർമാർക്കെതിരെ പന്തെറിയുമ്പോൾ നമ്മൾ നമ്മുടെ നിയന്ത്രണം കൈവിടാതെ പിടിച്ചുനിൽക്കണം. അവർ അത്രമേൽ തകർത്തടിക്കുന്നവരാണ്. അതുകൊണ്ട് തന്നെ നമ്മൾ എറിയുന്ന നല്ല പന്തുകളും മോശം പന്തുകളും ഒരുപോലെ ബൗണ്ടറി കടന്നേക്കാം. അവിടെ പതറാതെ പിടിച്ചുനിൽക്കുക എന്നതാണ് പ്രധാനം. റൺസ് കൊടുക്കാതെ ഓവറുകൾ തീർക്കാൻ നോക്കിയാൽ അത് ഒരിക്കലും നടക്കില്ല, അതുകൊണ്ട് എപ്പോഴും വിക്കറ്റ് വീഴ്ത്തുന്നതിനെക്കുറിച്ച് മാത്രമേ ചിന്തിക്കാവൂ."